و لي خلوة في رغد عيناك

بارت ٨٧

السكات تلاه منهم بجوج فقط صوت الثلاجة للي محطوطة فالجنب .. طنينه الخفيف للي كيتسمع .. حرك راسو شويا للي سمع كلامه و جاه معقول .. هو كذلك رغد را ماشي ملَك و مجاش و تزوجها لو معرفهاش، لو معدنها مقاصوش و هوما گاع ساكنين مع بعض عزاب ففترة قاصحة .. و لكن كانت عفيفة و هو طاهر و حتى حد ما ينكرها راضيين ببعض فالحلال .. و كيشوف منطقيا انه :

"كي غيعرفو بعض لو ميتكلموش" ..

ما لقا غا ..

- مرحبا .. ما قلتي عيب و كلامك لا شر فيه من حقكم تكلموا مع بعض و تعطيو لبعض مهلة للتفكير .. (شاف فيه) ياك !

- تبسم : ضروري ا خاي بهاء .. كون هاني قبل ما منشوفها فحال وحدة ناوي معاها الزواج راني دايرها فحال ختي ..

- بهاء ضحك مفكر الحمقة للي عطاه الله : تانتا ! .. (سكت شويا محرك راسه) مرحبا ا سيدي نعلمها و تلاقاو معنديش مانع .. حتى الدنيا هادشي للي باغا ..

- بحماس شاف قدامه : و دعي معانا .. الله احفظك

- بهاء واقف كيفسخ عليه السورفيتة : لا ليكم الخير ببعض الله ايسر ليكم ..

- آمين .. (حنا راسو للتحت كيتبسم) آمين .. (رفع راسو) امتى غتجاوبني تاني ؟ ..

تذعق بقا كيضحك من خاطرو مفرش سنانه كيتبسم حتى السي محمد ..
- انا نهضر معاها و لا بغات نعلمك وقتها امتى كيخوى على حساب خدمتها و ختار للي يناسبك ..

- سي محمد براحة : كلشي مناسبني للي بغات هي مرحبا ..

جواب على الگانة ..
- بهاء : مرحبا ..

سكت شويا للي جبد ليه الخدمة .. بقا كيفكر شويا فموضوعه كيتحرك حداه بهاء الدين جامع حوايجه فكازيي تما معوج راسو فيه ..
- سي محمد : سمحليا ا خاي على السؤال و لكن واخا نعرف اختك فاياش خدامة ؟ ..

- بهاء بتلقائية : عندك شي اعتراض على خدمتها !

- محمد راجع قدامه بثقل : لا فمرة غا فضول ..

حاط للي فيديه واقف مواجهه طاوي يديه ..
- بهاء : من حقك .. (تبسم) شيماء موظفة فالداخلية ..

- وسع عينيه شويا بصدمة : الوزارة !

- ضحك عاطيه ظهره : هاداكشي للي عطا الله .. انا مشيت نجي و نكملو ..

خلاه خارج من ادراكه .. كيشوف فجنابه ساكت .. بنت الداخلية كخدمة و جمال و نسب كفيزازية و عز .. كيقول "غتشوف فيه هو ؟ .. شنو عنده ؟" .. دار خلاها ليه باه بلدية و ام فجنبو كتشبعوا الرضا .. من تما للهيه طالب معاشه حتى استقر مؤخرا .. حتى دخل بهاء الدين ميسرة الدنيا فتوازن للآخر ..
كيفكر
"ياكما زرب للي طلبها كبيرة؟" ..

و لكن للي كيهدنه هو "تفكيرها" للي طالبة وقت ..
زعما هذا كله "زهر" ! ..

تنهد شويا مكمل لابس عليه خارج من تما و نيشان لطاپي غولون ايمشي فيه شويا ديال الدم .. و لخدمته نيشان ياخد اجر حلال من عرق جبينه ..