و لي خلوة في رغد عيناك

بارت ١٩

فاقت الصباح على صوت لالاغم معلنة على 7 د الصباح .. يالاه تنوض توجد راسها باش تخضر لاجتماع لإختيار مؤطري بحث التخرج للي خاص انجزوه .. توضات و صلّت و دازت روتوشات شعرها حتى دازت فاتحة الباليزة للي سيفطات ليها حنان مخنتاها بالحوايج و لي برودوي .. نهار طلباتها مرضاتهاش و عمرها مترضها .. كتشوف فشنو كاين حتى لقات مسيوة ساتاه زرقة خفيفة و أنيقة عاطيينها الإنتعاش .. خلات شعرها فطبيعتو هزات صاكها و بالغينة خفيفة خارجة من مود السبرديلات .. هزات تيليفونها للي كيصوني و صاكها خارجة بالزربة تلحق تهبط .. سادة باب الدار گدردگ و هابطة فالدروج حتى خرجات كتجري لعندها فاتحة باب الطوموبيل .. ضورات وجهها لقاتها مركزة فقنت واحد
- اسماء : صباح الخير .. تعطلتــــاااي لاش تعطلي ! ..

- رغد بسلاسة : كون طلعتي ترتاحي تا نهبطو .. اليوم غا تعمار الوراق ماشي شي حاجة ياك . .. لاش غتعصبي ..

- شيرات بصبعها : بسباب هاديك الملهوفة الخانزة .. كتلاح على لي بروف كي الكلبة ..

رغد غا شافت علامن كدوي بدات كتضحك حتى بدات كضحك معاها اسماء .. تهدن ضحكها هي تشوف فيها
- مال لي پروف عورين !

- أسماء : اشمن خاصك تشوفي اش كيوصلني ..

- رغد : يالاه نفطرو و نمشيو .. لين نمشيو بعدا !

- أسماء : للي كان .. لا كانت قهوة نوقفو و لا لقينا شي محلابة احسن .. ملوي و حرشة و خبز واجدين غا احطو دغيا ..

- رغد : سير على الله ..

طلقات الفيتيس و حيدات رجليها على لومبرياج مخلية الطوموبيل تحرك سرعان ما تزادت سرعتها خارجين من الشارع فإتجاه مدرستهم العليا .. الطريق عامرة بأوقات الذروة فين كلشي خارج اخدم او خارج اقرى .. مرة مرة اسماء كتبغي تخرج عند شي واحد تسمعوا خل وذنيه و تردها رغد ب "الله انعل الشيطان .. هوما للي غالطين" واخا را هي للي غالطة صراحة .. مرة اضحكو مرة تعيب شي بنت بخفتها مرة تقلبها لصاحبها .. المهم راسها عامر ..
وصلوا لحدا واحد المحلابة فالشارع سطاسيونات بعيد فاش ملقاتش فين .. رجعو على رجليهم كيزربو قبل متعمر الدنيا كثر ما هي عامرة عليه .. دخلوا مزاحمين مع عيباد الله حتا فاتو داك الكونطوار للي فالدخلة للي كيسربيو الناس اومبورطي .. بعينين الشباب تابعينهم خداو طبلة يالاه ناضو منها نيت شي دراري .. كيهزو راسهم على واحد وقف عليهم جامع داكشي ناطق بلكنة طنجوية حرة ..
- الولد : شني تاكلوا ؟

- اسماء شافت فرغد : ياك حرشة بالعسل و حليب

- رغد حركات ليها راسها : حليب بالقهوة احسن مكنشربوش بوحدو ..

- الولد : واخا اختي .. باين بنات الداخيل مرحبا

اسماء ميقات فيه مكملة فحال لا مسمعاتوش عكس رغد للي جاوباتو بصوت خفيف مع ضحيكة
- الله ابارك فيك ..