و لي خلوة في رغد عيناك

بارت ٤٧

جمعو حوايجهم معاهم تا داك ليزار للي كان مفرش مباغيش بهاء اخليه وراه تا بالضحك طالبين التعويض فيه لسبب آخر .. ساعة لوطيل مكانش عندهم مشكل بتاتا فالموضوع .. هو براسو كان راسم بلان آخر .. بعدا فدارو و حرمتو و حوايجو كيبقاو دياولو ..ساعة خرجو فبلان اخر ..
المهم دفعو الباگاج ..
طلعو من جديد كيتساراو وادلاو .. كيدورو الزناقي فاطرين فوحدة من مقاهي د المدينة الحرشة و الملوي و اتاي و الجبن .. كان مذاق غزال و ريحة بهية فتحات ليهم الشهية .. كتفطر كتبنن و هو معاها كيقلب بعينيه شكون كيطيب ساعة كانت امرأة .. كيدوي معاها كيشكر فماكلتها بحماس و رغد كتضحك بصواب .. هربهااا ..

ماشي بزاف باش اضطرو اطلعو لطنجة مودعين ديك البلاصة للي عمرها تمشي من البال .. و عمر متنسى هي تفاصيلها .. واخدين الطريق لابسة غا صنيديلة محيداها فاتحين السرجم مهوي الدنيا .. طالقين فيروز كدندن معاها حافظة شويا مدوزين الطريق بيها يديها مشابكين مع دياولو .. هزات تيليفونها بليمنية لقات ماماها عيطات ليها .. مسمعاتهاش ... نقصات شويا ..
- رغد : انعيط لماما عيطات لي ..

- بهاء الدين : سلمي عليهم كاملين ..

خدات رقمها مدوزاه تقبط .. ببسمة خفيفة ملقية لصوت امها ..
" أبنت قلبي "

- رغد بفرحة : مامي صاڤا ؟ كلشي مزيان ؟

- حنين : الحمد لله و نتي ؟ اش خبارك ؟ فين بهاء لاباس عليه ؟

- بخجل كتشوف فيه حاضي مع الطريق : صاڤا الحمد لله ..

- حنين : كي داير الجو عندكم ؟ رتاحيتو شويا ؟

- رغد : وي زوين .. واخدين الطريق ان شاء الله لطنجة ..

- ضحكات بخفوت : المدينة العزيزة ..

- فهماتها ولات حمرة نطقات بالشويا : وا مامي حشومة عليك ..

- حنين : هاني مقلت والو .. يالاه احبيبة نخليك على خير و تهلاي فراسك .. (كتشوف فمها كتشير ليها) ميما منى كتسلم عليك حتى هي .. كنبوسوكم كاملين .. بالصحة و الراحة ..

- رغد : ميغسي مامي .. اعطيك الصحة بسلامة حتى نهضر معاكم ان شاء الله .. كنسلمو عليكم حتا حنا ..

قطعات حنين لاپيل كتشوف فمها .. عينيها حومر جامعة شعرها بقراصة لابسة بيجامة قطنية .. حداها فالطبلة دوليپران و قرعة د الما .. كتشوف فيها منى واقفة عليها فواطة فيديها يالاه قادات الغدا عاقدة حجبانها ..
- حنين : صافي رتاحيت ا ماما غا تهدني ..

- منى : عيقتي ا حنين .. عيقتي ابنت كرشي ..

- حنين : عادي .. عارفاني كي دايرة و رغد عندي .. را عاد شديت فراسي ..

- منى : تبقا مقابلاك هنا !

- حنين : ماشي داكشي .. فراقها صاڤا ولفتو من قرايتها و لكن المرحلة د الزواج جا على غفلة (ضحكات) امتى كبرو هادو ؟