و لي خلوة في رغد عيناك

بارت ٢٧

خرجات من الدوش حناكها غيطرطقو كتشوف فجنابها بان ليها وجوه جداد شي طالع و شي هابط من ديك الدريبة .. خارجة بكسوة كمام مزيرة على خصرها النحيف و مطلوقة بدلال على الباقي مستورة و انيقة .. سوداء فيها دي موتيف صغار و فوطة فوق راسها .. خرجات كاملة كضور غادا للبيت فين مولفة كتشوفهم تا لقات تما ما إيطو كتفرج .. حيدات الصندالة ففم الباب داخلة كتبتاسم حتى لبنات للي معاها گالسين على كاس ديال اتاي .. دازت سلمات عليهم حتى گلساتها حداها كتضرب فظهرها ..
- ما إيطو : ايتش ايتش [كولي كولي]

- رغد : واخا هاني غناكل ..
الشلحة و الكلمات للي كيتعاودو مكانوش شي حاجة للي تخربق رغد او تحمق راسها بيهم .. الميساج وصل و حتى ما إيطو مكتدويش قدامها بزاف بالشلحة فقط لا عبرات على شي حاجة سهلة الفهم او صعبة هكا متفهمش اش كتقول ..
كتاكل عينيها على البنات للي كيديويو على الحلوة و الشكال للي يقادو .. كتشوف فيهم و كتسمع كلامهم و شرحهم .. مدخلاتش معاهم هي عارفة وحدة كديرها جداها ديال كاوكاو و الرخامة كديرها ماماها ساهلة اصلا و مع البادية و الحال مبيرد مغيحتاجوش الثلاجة .. غا بيت مكتوصلوش الشمس قاضي غرض .. سالات اتاي و الحرشة ديال الفران للي محطوطة تما حتا دخلات عليهم مريم كتصايب زيف حياتي عاقدا سيورو على شعرها للي جمعات ..
- مريم : رغد ساليتي .. كاوكاو نقاوه البنات لا بغيتي اجي بداي باش للي بقا نخدمو بيه حنا ..

حطات كاسها وقفو البنات عن الكلام كيشوفو فيها .. مصحابش ليهم غتقادها حتا هي .. ضارو شافو فمريم ناطقة بنت عمها
- أ مريم و حنا امتى ؟

- مريم : نساليو جوج شكال ديك الساع الكوزينة خودو فيها راحتكم !

- نطقات ختها : اوى حتا تسالا المونة ؟

- مريم : لا اختي ماشي دراري صغار باش نجيبو شويا .. عرس هذا .. و تا لا خاص عطا الله الدراري و لا هشام لا بهاء (مشيرة لرغد) راجلها اهبطو تا للفيلاج للي لتحت ميخصروش لينا ..

- كملات بنت عمها : اوى صافي غا منتحاشموش و صافي ..

- مريم : غا شربو اتاي ..

خلاتهم و خدات رغد معاها للي كتضحك بخفوت على القمعة اللخرة .. مزيرة فمها .. ماخرجو حتى حيدات الفوطة دايرة زيف غاديين لكوزينة الثانية لكبيرة ديال لاعياد و العراضات و توجاد .. دايزين عليهم ..
كان أمين و هشام معاه ولد عمو مجموعين تحت واحد الشجرة .. الظهر باقي ماوذن كيدويو .. و أمين عينيه على التيليفون كيجاوب على للي واصلوا كيقرى الجديد .. غافل على الفم للي تفتح و العينين للي تحركو واخدين حريتهم كيكتاشفو "البنت الجديدة" .. معارف اصلها و لا شكون .. حاضيها تا غابت و نفسها الوقيتة للي هز أمين فيه راسو شايف نظرتو .. مدور وجهو مشاف والو هبطو من جديد ..
- أمين : فين غبتي .. شفتي شي جن !

- هشام : لا كان فحال ما شافت عيني راني قابل بيه ..

- أمين : نعل الشيطان اصاحبي ! غا ضاحك