و لي خلوة في رغد عيناك

بارت ٧٤

سكتات كتسمع ليه يديها راصيين .. شعره و لو ماشي فطوله كي عقلات عليه اخر مرة و لكن ممنعاتش يديها يمشيو لفروة رأسه و اتساراو صباعها بحرية وسط خصلاته .. حركتها خلات الرجفة طلع معاه مع حالته كملات .. مزيرها لعندو اكثر .. خايف تمشي ليه من يديه تاني .. تفوت هاد السويعة و تروح تخلي عليه فراغ ما هو فراغ ..

" رغد انا مضنيتش الامور غتاخد هاد المنحى .. لو عارف غلطي غيوصلنا لفين كنا كون .. "

- رغد مقاطعاه : خللي الكلام لمن بعد رتاح ..

ناطقة كلامها و شعرها قدامها مع راسها و عنقها المحني للقدام .. و بسمة خفيفة مزينة وجهها شافتو سكت فمرة و شفارو لي كيتحركو شويا و يديها للي باقيين كيف كانو ..
- رغد : كليتي شي حاجة ؟

- بهاء : لا ! (كحة خفيفة معرض ليها يدو) فخبارك مخاصكش تجلسي حدايا !

- رغد : علاه !

- بهاء : كنكح لا نمشي نمرضك  ..

جامع يديه من عليها انوض .. ساعة قبطاتو يالاه تهز عليها كيشوف فيها ..
- رغد : خليك .. بلاتي شويا (ميلة فيه راسها بحنان) عافاك ..

ضحك شويا حنا راسو و رجع رفعهم فيها .. كتساينو اقول ليها شي حاجة .. اي حاجة .. محسات بيه غا هو محني عندها مقبلها بالخف ملامسين ثغورهم فمدة قصيرة راجع لمكانو كيف طلبات منو .. بلا اعتراض منها و بلا علم منه غافلها .. مخليلها مدة قصيرة كتستوعب طهارة مشاعرها للي بدات كتبان من جديد، من الحبات التفاح للي نبتو فحنيكاتها و رموشها للي حلفو لا ثبتو .. متلفها بسؤال انقص شدة ضربات قلبها للي واصلين ليه ..
- بهاء : جرحك كي بقا ؟

- رغد بصوت خفيف : تجمعات كلها .. مي باقا حاضية معاها .. و نتا ؟ (رمشات بتوتر) صحتك ؟ ..

- بهاء كيشوف قدامو و ابهامه كيتحرك على ثوبها : راها مزيان دابا مرتاحة .. غا فاش راك هنا راني مزيان ..

تبسمات شويا .. بقات هكاك ملازماه متحرك ما تحركات .. فقط سكات فسكات كيرتاح وسط رابطة عطرها كيستنشقو براحة .. حتى عمض عينيه ..
" نوجدليك ما تاكل .. تشرب دوا دفا ترتاح "

حبسات يديها .. رفعات ليه راسو بالشويا متسللة من وسط لمساته .. حتى هز راسو فيها واقفة غاديين وراها جناب تكشيطتها بتحرر كل وحدة غادة فجانب على حدة .. طريقها للكوزينة داخلة ليها كأنها غا البارح كانت كتوجد الغدا وسطها .. نيشان للتحت البلاكار جابدة الخضرة و مشات للثلاجة لقات شي حاجات نافعين .. هازة كمايم التكشيطة بتركيز بادية شغالاتها ..

من تقشار لقطيع و سليق .. حتى ليدين تخللوا جنابها مشابكين فكرشها .. و ذقنو على كتافها
- بهاء : شنو دابا ؟

رمشات شويا و بسمة خفيفة مزينين حروف وجهها ..
- رغد : علاياش ..

- بهاء : متگوليش ليا غتمشي .. مباغيش واخا نعرف نسد عليك ..