و لي خلوة في رغد عيناك

بارت ٢٦

كيغسلو الماعن نيت فديك الخصة كيباركو بنة ماكلتها .. و هي مسايعاها فرحة .. دخلات أميمة ناطقة بالجهد ..
- ا السلام ا البنات ..

- مريم : ها العروسة جات ..

ضارت رغد كتشوف فالبنت للي دخلات دايرة حجاب لابسة كسوة و صويك فكتفها حتا هي حروف كوحل فحال ختها .. حاضياها تا بداو العيالات بالتعشاق على النبي خاتمينها بتزغريتة داخلة حشمانة .. حتى نطقات فاش سالاو ..
- أميمة : لا اختي مبقيت باغا زواج .. انا عاجبني داك الخير للي عندك فالدار .. اربي شكون داك الزين ؟

كانت ختها متبعة معاها كتضحك حتى سرطات ضحكتها ضارت شافت فرغد للي واقفة كتسمع .. فحالها فحال عيالات الڤيلاج للي جاو اعاونو ..
رغد ماشي قل منها .. جاتها وقاحة دوي عليه فحال هكاك قدام امة لا إله إلا الله .. نيمات عينيها كطلع و تهبط فيها .. معندهاش الحق دوي عليه .. و زيد عرسها قرب اش هاد العبث ..
- ضارت مريم كتضحك ببلاهة : اويلي ا أميمة اش كتقولي .. السيد مزوج ..

- أميمة : اوى كون جبتوه ليا قبل ميتزوج .. شكون هادي للي دايا داك الزين ! ..

مريم بغات تبكي بالإحراج حتى تسمعات ليها
"انا" ..

عودات طلقات عينيها لمصدر الصوت تا كتشوف قدامها شابة اول مرة تشوفها .. غزالة اقل ميتقال .. هبطات عينيها ليديها للي فليسرية خاتم ذهبي .. طاوية يديها عاقدة حجبانها عرفات كحلاتها ..
- أميمة : نعام اختي ؟

- رغد حركات راسها : انا مزوجة داك الزين للي عجبك .. للي لقيتيه فدار ختك ..

حشمات حشمات مكانش كيصحاب ليها غتلقا مراتو تما .. لو و الواعرة كدوي على راجلها عاين باين .. مشات لعندها واخداها كتسلم عليها بالإحراج و رغد غا عاطياها حناكها و صافي .. كتشوف فيها بنص عين كتعتاذر ليها ..
- أميمة : سمحيلي اختي غا كنضحك .. (هزات يديها) راني مخطوبة حتى انا مبقالي والو و نتزوج .. قل من سيمانة .. مرحبا بيكم (شافت فختها و فالعيالات) ويلي اش درت ..

بقاو كيضحكو مشات مريم حدا ختها واقفة مجمعين مع رغد :
- مريم : هادي أميمة ختي الصغيرة .. معرفت اش جاها ..

- رغد : متشرفين ..

مشات من حداهم معاجبها حال بقاو كيشوفو فيها .. معيقاتش حتا هي .. حشومة فوجه مريم للي كدير ليها الخاطر تا للحد .. مشات كملات كتجمع .. باقي الوقت لهيه و قربو اساليو .. بقاو كينشرو الحوايج گالسة أميمة كتعاودليهم على ختها الكبيرة هوما للي كيسولوا فيها .. رغد خلاتهم كتنزل للسطح و ترجع تاني تخرج ليزور للريح للي كاديهم ..
زربو على الباقي صافي سالاو .. گالسين حتى تمات خارجة رغد طالقة الكونطاكط فاتحة الكوڤر مدخلة التقدية شويا بالشويا للكوزينة المهوية .. دارت مقراش اسخن جابدة البراد ..

هي تعيط لمريم .. جات عندها ..
- رغد : انمشي نجيب الملوي را عجنتو قبيلة ..

- مريم : نمشي نجيبو انا ؟