و لي خلوة في رغد عيناك

بارت ٤٠

واخدة طاس ديال كافي كخيم و آثار ثمالة المشاعر باقا سكرتها معلقة وسطها .. كتشوف لبرى و غروب الشمس قريب ياخد بلاصتو ساني ذهبية لونو فيهم ..
- بهاء : عرفتي علاش جينا اليوم هنا ؟

- رغد : صحيح قالي بابا نحطو النقاط على الحروف .. نتجنبو المشاكل من بعد ..

- بهاء حاط مرافقو على الطبلة مشابك صبعان يديه كيشوف فيها : وي اگزاكتوموه .. شنو شروطك ا رغد .. للي قلتيها غنسمع ليها بتأني و تسمعي مني ..

حطات للي فيديها حانية عينيها مكتقدش تصبر بزاف قدام خلوتها بعينيه .. و بمعقول مقادة گلستها مكملة ..
- رغد : معنديش شرط صراحة .. للي كدير معاي كثر من وافي و موفي .. قابلة بيك كيف ما نتا .. و معنديش اعتراض على حاجة أخرى .. طلب واحد كنتمنى تساندني فأي خطوة غناخدها و توجهني لا كنت غالطة تراعيلي فحال اي واحد كتعزو .. و انا غندير جهدي حتى لو مكانش كافي نزيد .. فقط بقا كيف ما نتا .. و بغيني كيف ما أنا .. هادشي للي كاين ..

- بهاء : كلامك ا بنت الناس معقول و حقاني و انا معاك .. لا كانو هادو شروطك فراني قابل عليهم بعيني مغمضين .. ووجه الله غنبقى نبغيك تا آخر نهار فحياتي .. يكفي غا دابا سالبة عقلي ..

- رغد : حاشا واش كنشكك فيك .. و الشك هو للي عمرو يكون .. غا كنهضر موضوعيا .. بنادم كيبقى بنادم الحياة و ظروفها كيتبدلوا و الانسان كيلقى راسو مغير معاهم .. انا بغيت غا نقبطو فيد بعضياتنا منطلقوهومش .. (مفكرة) و حاجة أخرى (شافت فيه بتردد) داك النهار للي سخفتلك فيه ماشي اول مرة .. كنمرض شويا كثر من العادة بأبسط الأمور .. راسي كيضرني بزاف بميزتي كيتخربق لي مودي كامل كوني انثى .. تقدر تصبر عليا بلا عتاب ؟

فهم محتوى الكلام .. خدا السؤال للي عليه كلشي مجاوب ..
- بهاء : قابل ..

شافت فيه باقي عينيه عليها .. "قابل" لا علاقة مع سؤالها .. قابل بيها زعما ! كيف ما هي !؟ ..
- رغد : قابل نخدم ؟ عوالة ندفع كونكور لشركة د جدي ..

- بهاء : قابل تخدمي .. معنديش مشكل فهاد الناحية .. ثايق فيك و عارفة للي عليك و للي بعيد عليك .. ضاربة تمارة مغنحرمكش .. بالحق (هزات عينيها فيه) جدك لا !

عقدات حجبانها ..
- علاه ؟

- بهاء : الشركة فقنيطرة .. شنو غديري .. لانافيط مثلا ؟ و لا انا للي غنديرها و لا شنو ؟ مدينة اخرى و تكونو بعيدة على عيني منقبلهاش .. مفهمتش صراحة الفكـ..

- رغد مقاطعاه : لا لا بلاتي .. فهمتي غلط .. كاين فرع هنا ..

- بهاء محرك راسو بفهم : متاخديش الأمور شخصيا انني داوي على جدك .. الخدمة معنديش فيها مشكل .. كيف ما ليا حياتي ليك حياتك و لكن على عيني .. غير غتكرفصي على والو .. واخا ؟

- رغد : جو پاغطاج .. كلامك صحيح و لكن مخليتينيش نكمل كلامي ..

- بهاء : سمحيلي .. زربت و لكن كيف قلنا من الأول باش نتفاهمو ..