و لي خلوة في رغد عيناك

بارت ١٦

حلات عينيها فالصباح على صوت لارارم للي مفيقاها .. طفاتها دغيا لا تفيق ختها عندها غا السبت و الحد كترتاح فيهم .. ناضت بتثاقل كتجر رجليها عين مسدودة للحمام .. غسلات وجهها، حكات سنيناتها و توضات راجعة لبيتها لابسة الاسدال قايمة الصلاة .. هزات صاكها و هبطات للتحت توجد الفطور حتا شمات من الدروح ريحة القهوة لقات حنين كطبخها حداها عيسى للي هاز شي وراق ..
- صباح النور ..

جاوبوها ب "صباح الخير"

- عيسى : اجي تگلسي حدايا تفطري نوصلك لاگار ..

- بالهداوة جاوباتو : واخا ابابا .. خدام اليوم ؟

- عيسى : عملية ان شاء الله

- رغد : الله اعونك ..

جاوبها عيسى قبل مدخل فحوارهم حنين بدورها كتوصيها ..
- حنين : رغد ..حضي راسك فالطريق و توصلي علمينا بلا منعاودو و نعاودو .. و صبري وجدت شي حاجة تديها معاك لعمي ..

- هز عيسى حاجبو : اش درتي ؟

- شافت فيه كتقلي ليك السم : بيني و بينو مخليت ليك تا شويا

كملواها ضحك كتشوف فيهم و تضحك .. حتا وقفو هاز عيسى الصاك د الماكلة معاون رغد فحوايجها .. ركبوا فالطوموبيل ردات السمطة و مشاو فالسكات مرة مرة اهضرو على شي حاجة جديدة لا لقاوها فطريقهم كيطنز على الوقت تابعاه بالضحك ..
وصلها سلمات عليه هبطات مدابزة مع ما هازة ساك اضو و ساك صغير ديال الحوايج و الصاشية للي فيها سخرة ديال ماماها .. مشات للگيشي و خلصات البيي و هبطات كتساين فالتران ..
و كان الروطار كالعادة ..
زويونة هي .. جرب اهضر معاها واحد الدري كيناڤيطي باينة من الشوفة ساعة مدا منها والو ! الكلام عندها بالعبار واخا حشمتها بانت عليها و لو الجبهة للي مخرجة كأنه مكاين والو .. تفهم و احتارمها ثم رجع للور مخليها على خاطرها .. و لكن عينيه واكلينها ..

جا التران طلعو شدات بلاصة بزز باش لقاتها فاش هبط واحد گالس لسلا .. 40 دقيقة ديال الطريق حتا وصلات .. اول ما حطات رجليها فقنيطرة كانت عطسات
"اتشووو"

- رحمك الله ..

هزات عينيها فالصوت كان شاب شعر زعيعر شويا حروف كوحل كيشوف فيها كيضحك .. و إستفهامها زاد كثر فاش سمعات منو ..
- نتي رغد بنت عمي عيسى ياك ؟ مايمكنش نغلط فيك .. كبرتي تبارك الله ..

دورات راسها تشوف فالجناب لا يكون شي حد معاه تعقلوا و لكن لقات راسها غا هي وياه .. و ولات اكثر وحدة معاه فاش مشا التران و خوا القنت ..
- رغد : اه هي انا .. سمحلي معرفتكش ..

- بصح شحال هادي متشاوفنا .. كنشوفك غا فالتصاور حتا انا بداكشي باش عقلتك .. فين حنين و خويا عيسى ؟

- رغد : دابا واش عمك و لا خوك ؟

- الشاب بإحراج : كل مرة و شنو كنعيط ليه .. حتا هو عارف ..