و لي خلوة في رغد عيناك

بارت ٥١

... گالسة كتروتوشيها ثريا عاطياها وجهها كتقادو ليها بتفنن مركزة معاها .. يديها للي طلقات كثر مع الزمان كتخدم ليها بكل حب .. كتضحك دايرة شال خفيف على كثفها على قبل وجه منعم الصغير للي كيرضع منها خوفا لا يتقاص بالبودر .. كتهضر و تضحك لابسة بينوار خفيف و صدريات ديال الرضع نافعينها و كولون دافي ..
حتى دخلات حنان كي الزواق لابسة مقادة ..
- حنان : فين وصلات الشارفة ؟

كتشوف فيه من طرف عينيها حابسة وجهها لعمتها..
- طاطا حنان لاباس ؟ گاع مشفتك هاد النهار ..

- حنان : حناك انا .. (بنص عين) يالاه جيت من الخدمة .. خديت غدا نعس نرتاح

- رغد : رتاحي رتاحي .. شحال بقالك للتقاعد ؟

خدات يديها لراسها كتمسح عليه بحنان زعما هو راه تهديد .. كتدوي شادة على سنانها .. ثريا شادة ضحكتها لا تورقها تخلطها ..
- حنان : ولدك يالاه تزاد ارغد .. نيتمو حشومة ..

- رغد رمشات بخفة : عزيزة عليك انا .. عارفة راني فِي گلبك ..

- حنان : و الله تا عاداك داك بهاء الدين ديالك .. (حنات راسها هابطة هازة عليه شويا الشال) الله على الحبيب و شحال غزال ما شاء الله .. العوينات العوينات ..

- رغد : الله احفظك اطاطا ديالي ..

- حنان : سبحان الله .. لا كرش لا هرمونات لا غلض لا تنفاخ الرجلين .. (خدات وجهها كتقبّلو حتى شافت ثريا دايرة يديها على جنابها) وا منبوسوش اثريا (هي تبعد كتبوسها غا بالشويا) الله على الحبيبة و لكن تمحنتي اقلبي ..

- رغد : فيها خير الحمد لله .. مبقى والو و نبرا

- حنان غمزاتها : و مرة مرة كونطرولي .. لمياء قطعات علينا البيليل ولينا عايشين فرعب

- رغد كتفقصها : المينوبوز باقي ؟ كنقول مشات منك من شحال هذا .. بلاصتك گاع منخاف

شافت فثريا عاقداهم .. كتشير ليها ..
- حنان : لا غنقـ|تلها ..

خدات يديها باستها كتضحك ..
- رغد : عارفاني كنحماق عليك .. حاشة واش نضحك عليك .. غا كنضحك معاك ..

- طبطبات على ظهرها بحب : عارفة عارفة .. انا كنتصطى على عوينات القطة ..

- رغد : و لكن بصح ا طاطا .. المينوپوز باقي ؟ ..

- حنان : لا بصح غنقـ|تلك دابا ..

بقات كتضحك عليها و هي كتخرج فيها غدايد الكبر للي كتكبرها .. خدات من عندها منعم الصغيور مفرشة فواطة على كتفها مخلياها كتكمل توجادها ..
لبسات تكشيطة مزيرة ثريا على خصرها مضمة .. خلات شعرها كيف هو جمعات غا القدام بمقيبط ذهبي فحال اكسيسواراتها من خاتم زواجها و طوانگ و البراصلي ديال دخلتها .. محسو غا بالباب للي دق .. مسموع صوتو من وراه "رغد !" .. مشات ثريا فاتحاه لقاهم قدامو .. لابس جليليبة فالصفر ..
- بهاء : سلام ..