و لي خلوة في رغد عيناك

بارت ٧٢

باقا حانية راسها شويا كلامه كيطلع و انزل فيها .. و عينيه لاصقين عليها كي الصقر .. كلامهم وسط الريح للي تحرك كيطير شعرها فإتجاه واحد مغطي بعض من تفاصيل ملامحها الحزينة .. للي لحظة بانت على وجهها بدون قصد .. هي ماشي متفكراتوش بل مفكراه غا هو حالته باقي ليها فالبال معندها معنى تعيط ليه و هو عيان و زيد دارهم مطرطقة اطباء ها باها و ها خوها و بالإضافة لعمها ان اقتضى الحال .. علاش غتجرجره فنص الليل لعندهم ! .. عكسها هو للي كيفكر علاش للي متخبروش على الأقل و هو اتحمل مسؤوليته ...
هو خوا قلبو من جهتها و هي سببها باقي لاصق فالحلق ..

و برودة كتماشى وسط الريح ملامس مع جلده و للي كيحوم بيناتهم شاهد على كلامهم خلاه اعدل من وقفتو فاش وعا بيه ..
" البرد عليها " .. ميل عينيه شويا ..
- بهاء : يالاه ندخلوا .. فاش تسالي العشية لبسي نوصلك معايا نمشي نشوفو ..

رفعات عينيها فيه لقاتو حاضيها .. مزادتش كلمة قلبات الدورة داخلة تابعها كذلك يديه فجيابو كالعادة رادهم ..
دخلوا حتى استوطن ديك النغمة الخفيفة و الضحك سمعهم .. بان طيفهم حتى لقاو اسماء و ياسر وجههم ليهم حاضيينهم جاوهم أهدئ من كي ناضو .. رجعوا جلسوا بدون اي رد فعل قوي ابين شنو طرى برا .. بدا هو كياكل ما خلاّ .. فحال لا مكان والو كيفها ...

نيت داخلة اسماء تعلمهم لاياش وصلوا فكلامهم .. تخرجهم من الغربة فالجو ..
- اسماء : منهنا 20 يوم .. اش بان ليكم ؟

- رغد براس مهزوز فيها : وي علاش لا .. لا تفاهمتوا عليها مزيانة .. غالبا زَيد من هنا 15 يوم ايعقد و انحضرو معاه ليلته و وراها نتوما .. (ببسمة) الله اكمل عليكم بالخير

- ياسر : بارك الله فيك ..

- رغد ببشاشة : نفرحو معاكم ان شاء الله ..

- ياسر : ان شاء الله (لبهاء) و نتا ا بهاء الدين ..

- خاتم الكلام : للي درتوها انا معاكم ..

- مالِك : نشاوروك لا عندك فكرة أخرى !

- تبسم ليه بالخف : معندي منزيد من غير الف مبروك ..

حداو الرضا من الجميع .. كملوا كياكلوا بالسكات كيتفاهموا فين ايقادو الخطوبة .. جابدين العيالات سميت لي تريتور للي كيعرفوا .. غاصو فتعاويدهم .. و نبيهة تنطق كل مرة
"وليد واحد للي عندي بغيت نفرح بيه" ..
و كل مرة تخرج ديك الكلمة كترفع رغد عينيها فيها بالخف و ترجع تحدرهم حتى ترفعهم فبهاء حاني راسو فالپلا الثاني للي تسربى كينقب منو بالسكات .. حتى حبس فمرة مشبك صبعانو .. و مرة مرة كيداخل هو و ياسر فأطراف حديث قصير .. و جاها الصوت آخر ..
" اش درتو ؟ "

ردات ليها رغد عينيها و حناتهم ..
- فاياش ؟

- اسماء : دويتو شويا ؟ ميهديكش الله باراكا !

- رغد : غيوصلني للدار اشوف منعم .. مكانش فخبارو مريض ..

كحزات حداها مخلية مسافة معقولة .. بصدمة ..
- اسماء : علاه متقوليهالوش !!