و لي خلوة في رغد عيناك

بارت ١١

الأيام بداو كياخدو استقرارهم و الروتين بدا كياخد بلاصتو فحياة الكل .. كل واحد مكمل عادي فعالمو الخاص ..
كان اليوم واحد من الايام ديال آخر اسبوع فديسمبر قبل ميبدى العام الجديد .. خارجة من الباب الكبيرة فحالها معاها اسماء كيدويو على بروجيهم للي غيقدموا .. و لو خفتها و لكن ظريفة و معقولة فخدمتها .. و لو شوفاتها فهي هكاك نيت ماشي تصنع او ليهم شي دلالة .. كيدويو مرة مرة كيهربو على موضوعهم و اقلبوها ضحك ..
حتا صونا تيليفونها ..
و الرقم للي مصوني شحال مشافتو .. تكاد تنسى حياتها الثانية .. حتى ردها لواقعها ..

- اسماء : مالك ! .. ماماك ؟

- رغد بضحيكة خفيفة : لا غا خالتي .. شحال مهضرنا و صافي ..

- اوى جاوبي ..

حطات تيليفونها على وذنيها مستقبلة خديجة من الجهة الثانية و بلا مقدمات سمعات منها "ميرسيديس الگري للي اونفاص ليك" رمات عينيها لقات لوخرى سنيات ليها بالفار .. هي تقطع ..
و تمات ضايرة هي عند اسماء ..
- رغد : سمحيلي غنخليك هنا .. جات عندي تشوفني

- شافت فالطوموبيل و رجعات شافت فيها : واخا .. نشوفك من بعد ..

شيرات ليها ثم بقات واقفة كتساين طاكسي ادوز من حداها حاضية ظهر رغد غادا للطوموبيل .. هي للي فتحات الباب للي اللور كالعادة راكبة و بسكات سداتو كتساين باش غيصدموها هاد المرة ..
"سارة لاباس ؟"

- هزات عينيها فالمرايا للي لقدام ملقيا لعينيها الكوحل و هالتهم ثم دورات راسها للزاج كتشوف على برا : لاباس و نتي ؟

- خديجة : مزيان .. يالاه نوصلك للدار و نعلمك بللي كاين ..

سكتات شويا و هي كتسوق بيها للدار حتا بدات كلامها .. كتعلمها بللي كاين ..
خديجة : الصباح ديال 2 جانڤيي مع 8 تكوني فالباب ديال المدرسة فين كنتي واقفة .. جيبي حوايجك و اغراضك الشخصية عندك سيمانة ديال لونترنموه على حساب لاپاز ديال الرباط .. و لاباس للي غا هنا فالشمال .. حوايجك جيبي لي سيرڤاط و جواكط بلا متعمري شي حاجة اخرى غير اتغرقي راسك .. اللبسة ديالك راني موجداها ليك .. وجدي راسك للفياق مع ال6 و النعاس مع 9 و بعد المرات نوي بلونش (بلا نعاس) .. المهم رتاحي فالويكاند و الثنين غنجي نجيبك .. متدوي مع تا واحد لا مكنتش حداك .. للي سولك متجاوبيهش .. (حبسات حدا السيتي سكتات كتفكر ثاني .. ثم كملات ضايرة عندها بالجنب) و نسيت منقوليك الدنيا غتكون مخلطة .. (رجعات مقادة گلستها) هاد الساعة هادشي للي كاين ..

- رغد : و قرايتي ؟

- خديجة : شهادة طبية علينا مكاين للي يضيعك .. سيمانة دغيا الدوز .. كتقراو 4 ايام فالسيمانة .. ماشي شي حاجة ..

- واخا و مالين الدار ! كل ليلة كيعيطولي .. كي غندير !

- خديجة : كل ليلة نعطيك تيليفونك دوي معاهم و لقاي شي سبة لغياباتك .. قراية و لا للي بغيتي ..