و لي خلوة في رغد عيناك

بارت ٤٥

فاقت الصباح على صوت البنات .. كيدورو حداها حلات عين وحدة كتشوف فيهم .. لقات ثريا على راسها ..
- صباح النور ا بنت العزاز .. نوضي النقاشة غتجي منهنا شويا باش نمشيو ..

- رغد : صباح النور اعميتو .. واخا انا نتوضى نصلي و نهبط ..

- ثريا : واخا احنى نهبطو .. (لبنتها) لقيتيها ا لينا ..

- لينا كتوريها السمطة : وي ماموه شيغي لقيتها ..

حركات راسها خلاتهم .. هبطات لتحت مقادين ليها گليسة د الحنة .. واقفة عليها حنين كتوجد الطبيلة حاطا اخر لمسة ..
- ثريا : حنين رغد هابطة .. غا تصلي ..

- حنين محركة راسها بتوتر : الله اقبل .. (مشات عندها واخدة يديها) لهلا اخطيك بقيتي معانا الايام للي فاتو كنقول غتمشي تا رجعتي فالليل .. اعطيك الخير ..

- ثريا : واش بنيتك .. رغد را بنتي اللولا .. متقولش هكا .. قوليلي اش ندير ..

- حنين : والو غا ديري تكشيطتك فالباليزة للي غنديو .. لينا وصيتها بعدا الله ارضي عليها سامعة .. لقات السمطة ؟

- ثريا كطبطب على يديها : لقات لقات .. حاول على راسك كتبانيلي مخلوعة ..

- حنين بعينين مميهين : صعيب الحال .. الله اصبرني ..

- ثريا : احنا معاك .. متهزي هم عافاك ..

- حنين كتحرك راسها : ربي احفظك ا ثريا اختي .. عارفة و الله ..

صلت و سالات جامعة الصلاية .. باليزاتها واجدين ففم الباب 3 بالمجموع مخلية وراها اخرين .. شافت تا لقات قميص جوهرة معلق .. لبساتو بلا مدير شي حاجة لوجهها .. خلاتو مرتاح تا تقادو العشية .. متحمسة يديها كيرجفو شويا بالخلعة كتثبتهم .. لبسات شريبيلها هابطة مع الدروج ..
خطوة و اخرى شافتها حنان للي يالاه داخلة من خدمتها معاها بنياتها طالقة حلوقها ..
- حنان : صلاة و سلام على رسول الله ...

خرجو من الكوزينة متعرضين ليها بحب و بجمال و سر طايح عليها .. متعرضة ليها حنين من بلاصتها كتشوف فيها مبسمة ليها و هي كلها خجل كتشوف فالأرض مشبكة يديداتها .. كتسمعهم كيزغرتو و اعاودو .. حناتهم تا هي حالة فمها كتنفس صابرة .. وصلات لتحت فاتحين اليدين مستقبلة حضنهم تا وصلات ليها واخداها عندها كتبوس فعنقها للي مداو منو سنين لا رطوبتو لا ريحتو الطفولية .. مزيرة عليها تا هيايا ضايرة منى شويا كتمسح دموعها .. عارفة بنتها حنيتها خايبة ..
تفارقات عليها كتشوف فيها ..
- حنين : الله اججبك امامي .. اجي تفطري تجي البنت تنقش ليك نمشيو ..

خداتها للطبلة كتسمعهم مبرزطين شي ناسي شي، شي گالس، شي مرتاح تا صونا الباب داخلة اسماء فيديها البنت .. عيطات ليها غاسلة يديها غادة لگليستها .. و كأنها حنتها بصح طلقو الاغاني هوما كيتسخرو و هوما معاها ناشطات .. نقشات يديها بجوج رشمة خفيفة و رجليها من للفوق مصورينها .. و خوفا لا متنشفش خرجات لبرى معاها اسماء هازة يد فضليلة كيضحكو اضربهم الريح .. عينيها على سميتو للمحنية فوسط يديها طالباها منها النقاشة و بلا فهم كتقول غا فضول بغات تعرف اسمو حتى رسماتو فيديها .. خدات تيليفونها طالبة من اسماء تصورها .. و صوراتها بلا تردد .. ملقات راسها غا داخلة عندو مسيفاطها ..
خرجات عندها حنان قلبات ليها النقشة لقاتها شادة فراسها دخلاتها معاها و لجليستها گلساتها جاو جداواتها قشروه ليها ببراصلي ذ الذهب واخدة حتى ماماها دايرة حقها ..