و لي خلوة في رغد عيناك

بارت ٥٩

الطبلة تجمعات و الدراري كاملين خرجو مشاو اعوموا و تبعوهم البنات الصغار بقات غا رغد متكية حدا منعم داخلين من شمس ورا الظهر مهبطين الريدوات حنين كذلك فحالها واخدة مفرشة شعرها و حنان جايبة قرعة د الما مع كيسان واخدة بلاصة ..
- حنان : ا الله على راحة .. (دخلات فحنين هازة رجليها خاطاهم عليها) ..

- حنين : اربي ا حنان عطا الله تيساع مالك لاصقة حدايا ..

- حنان : ايييه اغذر الزمان .. (بدات كتضحك ليها حنين تا كملات موجهة كلامها لرغد) غيتعطل بهاء للي گالي راشد ..

- شافت رغد فيها : هادشي للي قالي .. (تيليفونها على عينيها) مشوشاني اسماء !

- حنين : مالها اسماء !

- رغد : مكتحاوبش ! مموالفاش ليها معندي نمرت تا واحد .. حتى من الخدمة شدات كونجي البارح مخدماتش و لا ول البارح المهم معمراتش بوسطها .. غتحمقني !

- حنان : عيطيليها تجي ! بهاء مكاينش للي تحشم منو و حنا بيناتنا بنات و الدراري بيناتهم ..

- رغد : وا طاطا باش غنقول ليها اجي للي بقا فيها المشكل !

- حنين بحلاوة الجماعة و حزن خفيف : فخبارها حالتك ؟

- حنات رغد عينيها : لا لا .. مدويناش منين جينا لهنا ! انصبر هاد الليلة لا مكاين والو نمشي انا و صخر للرباط نخلي معاكم منعم و نجيو ..

- حنين : معنديش مشكل .. سيرو على مولانا تجاوب .. واليديها راخيين الهم سعدات قلبهم .. ماماها الله اعمرها دار و لكن غالطة من جهتها .. سيرو جيبوها تلاها بمنعم تاني طيبليه حناكو بالبوسان ..

- ضحكات حنان : تفكرت داك النهار مسكينة بقات كتشمشم فيه كتسولني واش الريحة د لي بيبي مكتباعش (بدات كتضحك كتضرب سيقان ختها صابرة) هرباتني ..

- حنين : و مكتقاضاش الرويحة .. رغد بعدا باقا كنشم فيها ريحتها فاش كانت صغيرة .. دراري كيتبدلو مع الهرمونات و ريم باقا صغيرة تا تكبر و نشوفو هههههه

- رغد كتضحك معاهم تا رجع ليها بالها : انصوني عليها نيت فقصاتني ..

خدات تيليفونها من جديد كتصوني واااالو .. رجعات كتبات ميساج ممكونيكطياش و صيفطات sms والو .. تنهدات لاحت تيليفون على جنبها .. حاطة يديها على وجهها ..
- حنين : مالك ؟

- رغد : غا شويا د الحريق كالعادة متشغليش راسك ..

شافت بحزن فختها .. للي بدورها طبطبات على فين حاطة يديها كتحرك راسها بالسلب و تغمض عينيها أملا مدير والو فبالها كيف قالت ليها .. اللوم باقي اما على حالتها قبل متأكدة مليون فالمية رغد لو عرفات كاين شي غيسك كون خداتو كتحدي بعينين مغمضين .. كتصبر راسها بالمكتاب و الخير للي فيه معرفنا فعلتها نجاتها من شي حاجة .. شي حاجة قاصحة على قلوبهم و هي صحتها من بدايتها على قد الحال ..