و لي خلوة في رغد عيناك

بارت ٨٤

.. نهــار كبيــر و فرحــة أكبــر للجميــع ..

خصوصا لأسماء كعروس كيتوج زواجها قدام الكل بعرس اتجمعوا فيه الحباب افرحوا معاها انشطوا اتصوروا و اضحكوا .. فايقين بكري مشاو للصالون صپا تابع للقصر فين كلشي غيوجد تما جايا البنت للي غتقاد ليها المايكآب .. معاها البنات حاضرات من شيماء و رغد و ريم للي من جديد كاينة مكتخطاش ختها و المفاجئة الأكبر حضور مريم للي جات بعد إلحاح كبير من طرف أسماء علاين تبكي ليها .. و لبت هي و أنير مخليا راجلها عبد الله طالقهم افوجوا شويا او بالأحرى نوبتهم لحضور مناسبة من مناسباتهم .. كانت وصلات فالليل معيطة لرغد و ملقات غا لبسات عليها هي و بهاء من الفوق و مشاو ملقيين ليها .. من تما هضرة قليلة و ضيافتهم فقلب دارها بعدها كلشي طاح دودة بالعيا ..

و هاهوما تجمعوا عليها من جديد فنهارها .. ضيفة الشرف لالة العروسة عاطية كتقاد ضفارها الاولين و شعرها تسرح قبل و كيتفاهموا على المشيطة واقفة عليهم رغد معيطة ليها كتشوف فما معروض وسط بينوارها واقفة .. و مريم و شيماء عاد كتاب ليهم اتكلموا حتى هوما فنفس الحال جايين للدلال ناشطين مجموعين كصحابات ..
- مريم : نهار قالي بهاء سلمات عليك شيماء (حطات يديها على صدرها) سكت ليا القلب .. كنقول اناري ..

- شيماء ضحكات على تعبيرها : كنت ديك الساع تقريبا فقلب دارهم معاشرين شويا .. و لكن ماشي فحال هكا ..  ورا حبالت رغد و فاش ولات مزيان طراو بزاف ديال الحوايج خلاو المشاكل عندي فالدار و نخرج .. لقيتهم غا هوما و هاني معاهم ..

- مريم ببشاشة : مسيكينة رغد الله اعاونها و اعوضك الله خير .. للي مشا الله اعاونه .. قلت ليك ما فحالهم حد .. واخا علمتك وقتها بلاتي للهضرة (تبسمات ليها) خليت ليك ديري مابغيتي .. بالحق عقت بيك ديك الوقت هزيتي تيليفوني ..

- شيماء ببسمة مقربة ليها : انا فرحانة كثر للي خليتيه حدايا ديك الساع و فرحانة لحضورك معانا .. مدة ما شفتك زيانيتي تبارك الله ..

- مريم حشمات رادا خصلات شعرها الكحل : احنا جينا و زيد منجيش قدامك .. (شافت فيهم و فالدنيا قبل ما تحني راسها فيها بخفوت) شنو غنديرو دابا !

بنفس مستوى الصوت ..
- شيماء : كلشي محسوب على صحاب القاعة ..
للي سالات تقاد لينا الشعر و شويا ديال الماكياج نفرحو براسنا مع أسماء ..

.. هي نيت للي باقا فحيرة بين جوج شكيلات ديال شدة د الشعر .. كتسمع لرغد ما كتقول ..
- هادي هابطة غتجيها ساميل و زوينة تعطي ليكلا لوجهك مع الخصلات القداميين للي فتحتي ..

- الهير ستايلست : حتى لوخرى زوينة سامبل ..

- رغد : اسماء عنقها طويل و تزيدي ترفعي ليها الشعر و مع الثاج اتولي ديك البلاصة باينة كثر منها و خصوصا و كسوتها هابطة على الكثاف .. (بإقناع واخدة يديها لشعرها كترفعو و تخفظو) هانتي شوفي و للي بغيتيها نديروها .. نهارك هذا ماتندمي على والو .. فقط رأي ..