و لي خلوة في رغد عيناك

بارت ١٢

سمع ما قالت .. رد تيليفونو فالجيب دار نظاظرو على عينيه محرك رجليه عندها .. لا كانت شي ابتسامة و لا شي وزة شافتها غا قبيلات .. راها تمحات .. فالبلاصة ..
كحاز حتا لحداها كيشوف فيها مع طويل مصلاحش ليها تهز راسها فيه .. واخا مدايرة والو .. راه الاحراج وصل لآخره ..

"سارة ؟"

هزات راسها فيه عينيها تايهين فجنابو .. مقداتش ترصيهم فيه .. هالتو بوحدها و كاريزما بلا مندويو عليها لدرجة عينيه باقا مشافت شكلهم و لا لونهم .. الهيبة مع الدم ..
- رغد بإستفهام .. مشدات تا لعب لقربو ليها : نعام ؟

- أمين بجمود كحاز حداها كثر خانقها : سارة نتي ؟

- ردات شعرها ورا وذنيها و بوجه حمر جاوباتو .. هو اصلا عارف اسمها لاش هاد الشكليات ديال "سارة" .. جاوبات كتهزهز راسها ..
- انا سارة ..آذ

- حرك راسو راجع خطوة اللور مقاطعها : فين حوايجك ؟

- سكتات مشيرة رغد على الباليزة للي ولا يبان منها شويا : راها ..

- مشا عاطيها بالظهر : جيبيها و تبعيني ..

صحابليها سولها باش اعاونها .. ساعة عطاها النخال و زاد مشا لايح رجليه كيخطوي للطوموبيل .. حتا شد يدو دارها على فمو اتهبض بخاطرو مشافوا حد .. وااا اقولوا ليه "را سارة كتقريها" اشك فيهم كاملات الا هي ..
علاش ؟
و لا فكرة .. بوحدها عاطية التيقار لبنادم .. ضعيفة و البراءة عاطية منها ديما ادخل القاها ناعسة .. رد يديه فجياب الجاكيطة كيخمم "واش دابا هادي هي للي مشات جبدات ليهم سميت المامبا من البون" .. ضار شاف فيها بنص عين لقاها جارة باليزتها حاضية الطريق تابعاه ممحنة .. بيناتهم نفس حال المسافة للي سابقها بيهم فالأول .. حل الطموبيل jeep ديال تمارة و الطرقان و ركب و خلاها تا توصل على خاطرها ..
دقائق قليلة ممكن تحد فجوج .. شافها من المراية فتحات الكوفر اللور و رد عينيه قدامو ..

رغد ديك الساع صدمتها لاعبة عليها بدورها .. التلفة للي عمرها تلفاتها شداتها فهاد اللحظات .. حشمانة منو .. امكن حيت مهيب و لا امكن عليها نيت ..
اول مرة تفرش قدام شي حد ..
اول مرة تعرف على حقيقتها قدام شي واحد كتعرفو و لو من بعيد ..

قبل متسد الباب ديال الكوڤر قشعات ساك صغير حداه و جوج سبرديلات باينين دياولوا حتا دقيقة مكتعداها فترتيب اشيائها .. حولات عينيها راضخاه قبل متحرك معارفا فين تركب .. و قالت كيف مولفة مع خديجة حتا فتحات الباب للي اللور و ركبات و رداتو ساكتة ..

سي أمين هز حاجب شاف فيها من المرايا ..
- شيفورك انا ؟

- بإستفهام قرب اطفي البنت : نعام ؟

- أمين : تحركي قدامي .. شيفروك انا للي تگلسيلي اللور ؟

بلا متزيد الهضرة فتحات الباب و سداتو ثم فتحات للي لقدام راكبة .. ردات السمطة حاطة يديها و ساكادوها على رجليها منطقات بحرف .. هز يديه الكبار الذكوريين داير امارش محرك من تما ريحتو فايحة كتسارا فأرض مالكها بحرية مختارقة جيوبها الانفية مسطوكية فالمخ مكلاصياها كيف مكلاصيا للي دازو عليها ..