و لي خلوة في رغد عيناك

بارت ١ - "ظـــــلال"

#و _لي_خلوة_في_رغد_عينـــاك 🤎

الفصل الأول : ظـــــلال

بين يديك كبرت، و في دفئ قلبك اِحتميت، و بين ضلوعك، و من عطائك اِرتويت، فكيف لا أحبك ...

○○ فيوم من ايام السنة و بالضبط فشهر فبراير ..

صوت الشتا و الرعد للي مختارقين طبلة اذنها .. كتاسحو حواسها رادينها للحاضر و للواقع خصوصا .. حلات شويا عينيها النايمين للي تحتهم حمرة خفيفة .. هوما للي فكبر عينين عمتها و فخضرتهم من جداتها واخا هكاك عندها لون خاص بيها قفزيحتها معند حد .. عينيها فتنة على الأرض اتغزلوا بيهم الشعراء للي كايعرفو ليهم ..
و كيعرفو اقراوهم ..
جميلة فحال اي بنوتة .. فحال اي انثى على الأرض ..

حنيكات ملونين بلون النعمان زايدين لحروفها دلال .. و فمها كأنه حبة فراولة مقطوفة من الجنان ..
فتحاتهم شويا كتنفس منهم حتا حركات يديها لراسها بثقل كترد شعرها الزعر للي هبط على وجهها مغطي ملامحها و سبحان الخالق كيديو لماماها ...
لـــروح ..

تحركات مبدلة وضعية نومها حتا استقرو وذنيها على صوتها .. هي للي حسات عليها فاقت معاها ..
- حنين : صباح الخير ا مامي ديالي (حطات يديها على راسها) مزال فيك شويا د السخانة .. كتحسي بالحرارة لداخل ؟

- رغد و بصوت مبحبح : شويا .. صباح النور عذبتك سمحيلي ..

- حنين طانزة : رغد طلعات ليك السخانة للمخ امكن .. (گلسات على جنبها ضايرة كاملة لعندها) عطيني عنقك لا مكان والو امشي عيسى ياخد ليك اونتيبيوتيك ..

هزات عنقها بلا كثرت الكلام حلقها ضارها كتقلب ليها الحلاقم لقاتهم خفاف ..
-حنين : حمد لله .. ماشي بزاف ..

جمعات حنين يديها حتا ضارت عندها رغد داخلة فيها .. هي للي مرضات الليلة للي قبل من مرضات رغد كعادتها .. و تزاد عليها الحال بعدما ضربها البرد لتقلب الجو للي قاصها .. من صغرها كنعرفو جسدها شحال حساس و رهيف .. حتا هادي جات على شكل مرضة خايبة ملقات غا حنين بايتة معاها و باها عسعس ديالنا للي يطل و ارجع لبلاصتو ..

دخلات راسها فصدرها معناقاه موسداه .. هزات حنين يديها حتا هي مكحزاها لعندها مخلياها على راحتها .. بقات فيها الليل كامل منعسات مشافتو حتا بغات الشميسة تستاقر فالسما عاد داتها عينيها .. بالعيا ..
فهي بنت قلبها الأولى ..
البكر ...

الصدر الحنين و لا حنينة .. اسم على مسمى .. هي للي كنا عشنا معاها منين كان عندها ١٧ سنة و هاهية اليوم عندها ٤٢ سنة .. اختلافات بسيطة الزمان خلاوه فيها و طبيعتها كإمرأة .. فهي زوجة و خصوصا ام لربعة ديال الاطفال ..
رغد ٢٠ سنة
صخر ١٥ سنة
زَيد ١٣ سنة
و آخر العنقود .. الفشوش على الأرض للي جا جراء خطأ مطبعي .. رِيم صاحبة الخمس سنوات ..