و لي خلوة في رغد عيناك

بارت ٢١

- رغد : شكرا .. اش واقع شرحلي عافاك ..

- أمين كحاز من حداها مشا سند كتفو على اقرب حاجة ليه : ضوسيك وسط 5 د البنات خرجوهم لبرناوس .. ماشي بعيد باغي ارد دقتو .. باقي معيطلي .. كنساين نمشي عندو نتبثو .. متخافي ما والو ..

غا سمعات اش قال تزاد عليها الزايد بغات تصطى .. عفويا حطات يديها على راسها شاداه ..
- رغد  : و عائلتي .. و ماما و بابا و خوتي .. (شهقة خفيفة) شنو غيديرو ..

- أمين : خديجة مكلفة عيطاتلي راهم غاديين لداركم .. ياسر فالرباط تا هويا هو للي محسوب على البيرو ديالنا غيخضي لا كان شي بلان مولف هو هادشي و لا طول هادشي معندنا تا حل من غير توسيع منطقة السر المهني و ندخلوهم معانا ..

- رغد : يعني !

- أمين : نحطوهم فالصورة .. اعرفو اش كاين .. لا البوليس لا الجوندارم .. المامبا يدو طويلة واصلة للفيران لكبار .. اللعبة د العسكر خاصها تبقى عسكر ..

جاتها البكية على وجهها للي غيتفرش و على الكذوب للي طلقات .. كلشي غيتفرش دقة وحدة ! عمرها مفكرات فهادشي .. عام و الصرف بل اكثر مدخلات فشي بلان .. كانو كيعيطوليها تشوف ورقة تبقا عاقلة على شي حاجة مرسومة او مكتوبة و تمشي توصلها لآخر فشي مارشي ولا فشي بلاصة عامرة بنادم .  اغلبية دي كود معارفاش معناهم .. حتى دخلوها للوزين و من لوزين للمشوار للي حضرنا لكل نقطة منو و كل تفصيل ..

گلسات على الارض متكية ظهرها على الطموبيل طالقة رجل و جامعة أخرى دايخة .. حتى هو جمع عينيه كيخمم و افكر .. اول مرة احس براسو مبلوكي .. و واحد الجانب شخصي بدا كيبان جايب معاه فكرة .. فكرة قاصحة عليه هو شخصيا .. مبغاش اتفكر مبغاش اخضع ليه .. هز داتو من الحيط المغبر للي حاط عليه ثقلو ..
- أمين : انا خاصني نمشي نتقضى لينا .. معندنا منديرو اليوم غنبقاو هنا .. نجيب ما ناكلو من تما احن الله .. الليل و نتحركو من نهنا ..

- رغد : و الطواليط !

سمعها تبلوكا ... بقاليه شويا و اغوت
- امين فتح فمو كيشير ليه : بولي لي ففمي .. واش مسطية و لا مالك .. (كيشير بيديه) سيري لشي قنت و بولي .. ملقينا تا فين نتغطاو حساك نبولوا .. (هز يديه كيمسح وجهو) انا غنمشي لشي سوق نجيب للي غيخص .. كتاخدي شي دوا و لا مريضة بشي حاجة نرد ليها البال معايا !

- رغد : لا و لكن تحسبا جيبلي ponstyl ..

- أمين : ديالاش ..

ولات حمرا اش غتگولوا ! قريب اجويها لي غيگل و حيت كيجيوها قاصحين كتضطر تاخد كالموه .. كتشوف فيه بنص عين كتخمم اش غتقولوا فالاخير لاحت ليه نوعو ..
- رغد : اونتي-دولوغ ..

- أمين : الحريق ديالاش !

دورات راسها منيمة عينيها بمعنى عيقتي و الحد وصلتيه .. حتى طلعات معاه .. مبدل البلاصة من حداها غادي لطوموبيل هاز الفلوس .. غا شافتو هكاك مشات لبصطمها جابدة واحد 200 عندها عوالة تقضي بيها .. دارت عندو مداهاليه ..
- رغد : هاك .. الكونبخيمي ب30 درهم و للي شاط تعاون بيه ..