و لي خلوة في رغد عيناك

بارت ٢٩

مبدلة حوايجها كدور فالكوزينة كطيب باش تعشى باقي فيها الجوع .. كتفكر فعقلها الموسيقى للي تقالت كدندن و تشطح بكثافها ..فديك الاوقات كان تفتح الباب و تسد .. شاعل باغي اعرف فينها .. الدار السفلي كامل مشعول حتا من الخصة شاعلة الضو .. كيقلب بعينيه على خيالها .. والو .. بقات ليه الكوزينة مشا ليها بخطوات محسوبين حتا وقف فالباب فخطرة ..
مكانش كيشوف فالبلان حركاتها و غير ذلك .. بل القرودة كيلعبو ليه فراسو على كي مبردة .. لا و الواعرة ناشطة ..
"تبارك الله على الشيخة"

خلعها تا طلقات من المعيلقة للي فيديها ارتطمت بالأرضية المزلجة مخلفة وراها صدى كيزعج الوذنين .. تحنات دغيا هازاها كتشوف فيه ..
- رغد : جيتي

- أمين : لا باقي .. خيالي هذا ..

- رغد : تعطلتي ..

- أمين و هو مقرب للباب : كيبان لي سيمانة خلاتك تولفي و تمشاي فالليل بوحدك هانية ..

- رغد كتجاوب بلا متفكر : وي عييت تعطلتي ..

- أمين ضاغط على الحروف : واش نتي مريضة و لا مالك .. إلى هكاك يلاه نرجعو فحالنا .. اش مزال كنديرو هنا كل واحد مغرب على طاسيلتو !

- رغد جمعات شنافتها فهمات قصدو : اصلا مكاين لاش تعصب ! لاش معصب دابا ؟

- أمين مخرج يد كيعبر بيها بغا اتفرگع : مقلتش ليك شي حاجة وا ساينيني تا نجي ! مالك فيك الطيرا ..

- رغد رافعة صوتها رقيق مقاومة ليه : وا فهم را مجيتش بوحدي اصلا ..

لقطو وذنيه الكلام .. هز النفس جامع يديه عندو .. جاه راسو زرب واخا هكاك عوال انقي ليها وذيناتها فبالو العيالات للي ساكنين من جوايه لوخرى جاو معاها حتى سمع الكمالة ..
- رغد : داك الدري للي كان معاك وصلني مسكين ..

"مسكين .. دري" رجليه متحكمش فيهم واصل لعندها واخد دراعها من تحت المرفق مطرطق عينيه فيها ..
- أمين : شكون الدري ؟

- رغد قصحها شويا كتحاول تفك منو : للي كيجي لمريم ..

- أمين صباعو كي لقاط قبطوها مرة وحدة عينيه شرانيين ما وراهم خير : انا واحد ؟

- رغد : باش غنعرفو مثلا (كمشات حجبانها ألما) بهاء يدي ..

- أمين: واش باغا تحمقي حس طاسيلتي و لا مالك معايا .. فاش مكتعرفيهش لاش غادا معاه ..

- رغد : عييت و نتا تعطلتي .. (دمعو عينيها رخاتها) بهاء عافاك يدي

حس بشو داير راخي يديه للي كرزات عليها بدون وعي .. ميل وجهو لدراعها ..
- أمين : انشوف ..

.. اما هي غا تحيدو يدين لقاط من عليها طفات على للي كتقاد حطات المعلقة خارجة من حداه .. فلعصها كتمسح عينيها من الحريق للي عاطياها البلاصة كدعي فيه فخاطرها .. طلعات للبيت ردخات الباب للي تسمع حتا لعندو ساد عينيه .. معاه .. حل عينيه كيضورهم تا مشا لشنو طيبات .. غا لقاها مقيلة ديال بطاطا و البيض هو انشط معاود شاعل عليها .. خدا كلشي و الخبز مكاينش كلا غا بالفرشيطة ..
سالا حط داكشي تما هو اطفي الضواو طالع فحالو .. داز من حدا البيت للي گالسة فيه .. وقف قدامو .. لاش ! معرفش .. بغا اصالحها .. مكيمكنش كي لقا راسو كارز عليها .. صاحبو و ميديرليهش هكاك حاساك بنت رهيفة ..