CHPATER (73)
တောင်ပေါ်တောနက်ကို ဖြတ်၍ နားရွက်စိမ်း ယိုင်ထိုး လျှောက်လှမ်းလာသည်။ ညအမှောင်ကြောင့် ရှင်းရှင်းလင်းလင်း မမြင်နိုင်သဖြင့် အရှိန်မြှင့်မသွားနိုင်ပေ။ ဟယ်ယန်အဖို့ အနည်းငယ်စိတ်ပျက်ဖွယ် ဖြစ်ခဲ့သည်။ နားရွက်စိမ်းပေါ်ရောက်ပြီး "တောင်များနှင့် ရေလယ်ဖြတ်ကို မြေပြန့်ပေါ် လျှောက်လှမ်းနေသကဲ့သို့ ဖြတ်ကျော်သည့် အထင်ကရခံစားချက်"ကို မကြုံခဲ့ရပေ။ အနည်းငယ် အညစ်ခံရသကဲ့သို့ ခံစားမိနေသည်။
ကြယ်ရောင်နှင့်လရောင်တို့ သစ်ကိုင်းများနှင့်အရွက်များအကြားမှ စိမ့်ထွက်နေသည်။ ဟယ်ယန် မြင်းစီးထွက်ရသကဲ့သို့ ဖြစ်နေပြီး ဘေးပတ်ဝန်းကျင်ရှုခင်းကို ရှုစားရန် အချိန်ရရှိလာသည်။ သာမန်တစ်ချက် ဝေ့ကြည့်ရုံဖြင့် မလှမ်းမကမ်း၌ ရေပြင်ညီ လဲလျောင်းနေသည့် ဝံပုလွေတစ်ကောင်ကို သတိထားမိခဲ့သည်။ ၎င်းမှာ အထင်အရှား သေဆုံးနှင့်နေပြီး ဖြစ်၏။ ခေတ္တမျှဆွံ့အသွားပြီး ခြေလှမ်းအနည်းငယ်မျှ ဆက်လက်လျှောက်လှမ်းပြီးသောအခါ နောက်ထပ် ဝံပုလွေအလောင်းများကို ထပ်တွေ့ခဲ့ရသည်။
ဝံပုလွေအလောင်းသုံးခု ဆက်တိုက် မြင်တွေ့ခဲ့ပြီး ထိုအရာသည် တိုက်ဆိုင်မှုတစ်ခု မဖြစ်နိုင်ကြောင်း ဟယ်ယန် အာရုံခံမိသည်။ ခံတွင်းတစ်ခုအပြည့်ရှိ တံတွေးများကို ဂလုခနဲ မျိုချလိုက်ပြီး
"တပ်မှူးရှောင် ဒါခင်ဗျား လုပ်ခဲ့တာလား"
"အလာတုန်းက လမ်းမှာ ကြုံခဲ့ရတာနဲ့ ကျုပ် ရှင်းခဲ့လိုက်တာ မဟုတ်ရင် သူတို့ ကျုပ်အနောက် တောက်လျှောက် လိုက်လာပြီး ပိုပြဿနာ ဖြစ်လာခဲ့စေလိမ့်မယ်"
ရှောင်ကျွယ် ပြန်ဖြေလိုက်သည်။ ဟယ်ယန် စိတ်အတွင်း သက်ပြင်းချမိသည်။ ကြည့်စမ်း၊ ငယ်ရွယ်သော သေမင်းတမန် စစ်သေနာပတိ ပီသပါဘိ။ သဘောထားကွဲမှု စကားတစ်လုံးမှ အစုလိုက်အပြုံလိုက် သတ်ဖြတ်မှုကို စတင်နိုင်သူပင်။ တစ်လမ်းလုံး ဝံပုလွေတစ်ကောင်နှင့်မျှ မကြုံတွေ့ခဲ့ရသည်မှာ ရှောင်ကျွယ်မှ ၎င်းတို့အားလုံးကို မျိုးဖြုတ်ခဲ့သောကြောင့်သာ ဖြစ်၏။ ဝံပုလွေအလောင်းများကို ဟယ်ယန် နောက်တစ်ကြိမ် ထပ်ကြည့်လိုက်သည်။ တစ်ကောင်ချင်းစီ၏ လည်မျိုသည် သေးငယ်တိကျသောဒဏ်ရာဖြင့် သပ်ရပ်စွာ အဖြတ်ခံထားရ၏။
