• ခုနစ်ဆောင်နန်းက မညှိုးပန်း •
(Part - 33)
“ အရှင်မ ကံကုန်သွားတာ မဟုတ်ပါဘူး။ အရှင်မက လိပ်ပြာလွင့်နေတာပါ ”
နန်းတွင်းသမားတော်ကြီး အလာကို စောင့်နေသော မဏ္ဍိုင်မှာ အမယ်အို၏ စကားကြောင့် နားရှုပ်သလို ဖြစ်သွားသည်။
“ တစ်စုံတစ်ယောက်က ရည်ရွယ်ချက်ရှိရှိ လုပ်ကြံလိုက်တာပါ။ အရှင်မရဲ့ ဝိညာဉ်လွင့်သွားအောင် အစီအရင်နဲ့ လုပ်ကြံပစ်လိုက်တာပါ ”
“ ခင့်ကို အသင် ကယ်ပေးနိုင်လား။ ကျုပ် ကြင်ရာတော်ဟာ အပြစ်ကင်းစင်တဲ့ အမျိုးသမီးတစ်ယောက်ပါ။ သူ ဒီလို လုပ်ကြံခံရဖို့မသင့်ဘူး။ သူ ဒီလို ကံကုန်ဖို့ မသင့်ပါဘူး ”
“ ဒီလိုနေရာမျိုးမှာ ကျွန်ုပ် ကူညီပေးလို့ မရနိုင်ပါဘူး။ အဲ့တာကြောင့် ကျွန်ုပ်နောက်ကို လိုက်ခဲ့ပါ အရှင် ”
အမယ်အိုမှာ ရှေ့က ဦးဆောင်ထွက်သွားသည်။ မဏ္ဍိုင် အစောင့်တပ်သားများကို နေခဲ့ရန် အမိန့်ပေးလိုက်ပြီး ကလေးငယ် စံသကို ခေါ်၍ လိပ်ပြာလွင့်နေသူကို တင်းတင်းပွေ့ချီကာ အမယ်အိုနောက် သုံးယောက်သား လိုက်သွားခဲ့ကြ၏။
မယ်တော်ကျောင်းနှင့် မနီးမဝေးတွင်ရှိသော တောအုပ်ငယ်တစ်ခုကို ကျော်ဖြတ်ပြီးနောက် အမယ်အိုဟု အိမ်ဟုထင်ရသော အဆောက်အဦးပျက်တစ်ခုတွင် လမ်းဆုံးသွားလေသည်။
“ အထဲကို ကြွလာခဲ့ပါ အရှင် ”
အမယ်အိုမှာ ရိုကျိုးပျူငှာစွာ လှမ်းခေါ်သည်။ ကလေးငယ် စံသ အရင်ဝင်သွားသည်။ ပြီးမှ မဏ္ဍိုင်နှင့် ဝိညာဉ်လွင့်နေသော ခင်ခင်တို့ ဝင်လာသည်။
“ အချိန်ဆွဲနေလို့ မဖြစ်ပါဘူး အရှင်၊ ကြင်ရာတော်ကို ဒီအပေါ်မှာ ချလိုက်ပါ ”
အမယ်အိုသည် ခင်ခင့်အား ပွေ့မြဲ ပွေ့ထားသော မဏ္ဍိုင့်ကို ခပ်ကျဉ်းကျဉ်း သစ်သားကုတင်ဆီ ညွှန်ပြရင်း ပြော၏။
တွေဝေတုံ့ဆိုင်းနေသော မဏ္ဍိုင့်ကို အမယ်အိုက ကြည့်နေရင်း သက်ပြင်းချသည်။
“ သူ့ကို ရအောင် ကယ်ပေးပါ ”
သစ်သားကုတင်လေးပေါ် ဖြေးညှင်းစွာ ရောက်ရှိလာသည့် ခင်ခင့် ကိုယ်လုံးလေးကို အမယ်အိုမှာ သူ့တောင်ဝှေးဖြင့် တစ်ချက် တို့ထိလိုက်သည်။
YOU ARE READING
ခုနစ်ဆောင်နန်းက မညှိုးပန်း (𝐎𝐧𝐠𝐨𝐢𝐧𝐠)
FantasyAvailable 📌 Unicode & Zawgyi adult scenes ❗❗
