• ခုနစ်ဆောင်နန်းက မညှိုးပန်း •
(Part - 40)
“ အဆုံးသတ်မှာ ဘာတွေ ဖြစ်သွားကြမှာလဲ ဘွားတော် ”
အမယ်အိုမှာ ကလေးငယ် စံသရဲ့ အမေးကို ချက်ချင်း ပြန်မဖြေသေးဘဲ အဝေးတစ်နေရာဆီ ငေးကြည့်လို့နေသည်။
“ မင်းစကားထဲမှာ အဖြေပါပြီးသားလေ စံသ၊ အဆုံးသတ်ဆိုတဲ့ စကားအတိုင်း အရာအားလုံး အဆုံးသတ်သွားမှာ၊ သေချာတာ တစ်ခုကတော့ အရှင်မဏ္ဍိုင်နဲ့ အရှင်မ ခင်ခင်တို့နှစ်ယောက် အတူရှိနိုင်ကြတော့မှာ မဟုတ်ဘူး။ သံသရာတစ်ကွေ့မှာ ပြန်ဆုံကြမယ်ဆိုရင်တောင် ဘယ်တော့မှ ပေါင်းဖက်နိုင်ကြတော့မှာ မဟုတ်ဘူး ”
“ သခင်မငယ်လေးက အဲ့လောက်အထိ ကြောက်ဖို့ကောင်းတာလား။ တကယ်ပဲ သူ့မိဘနှစ်ပါးကို ထာဝရ ခွဲထားပစ်တော့မှာလား ”
“ သေချာတာပေါ့ ကလေးရယ်၊ သူတို့နှစ်ယောက် ဘယ်တော့မှ ပေါင်းဖက်နိုင်မှာ မဟုတ်တော့ဘူး။ ဝိညာဉ်ဘဝနဲ့တောင် အတူမရှိနိုင်တော့ဘူး ”
အခန်းထောင့်တစ်နေရာတွင် စံသတစ်ယောက် ငြိမ်သက်သွားတော့သည်။
“ ကြောက်သွားပြီလား စံသ၊ မင်း ကြောက်နေတယ်ဆိုရင်တောင်မှ သွေးကတိကို ဖောက်ဖျက်လို့ မရဘူးနော်။ သခင်မလေးကို မင်းအသက်နဲ့ ရင်းပြီး ကယ်တင်ရမယ် ”
“ အဲ့လို အဖျက်စွမ်းအားကြီးမားတဲ့ သခင်မလေးကို ကျွန်ုပ် ပိုင်ဆိုင်ချင်တယ် ဘွားတော်၊ ဘယ်လို ချည်နှောင်မှုတွေပဲ ရှိရှိ ကျွန်ုပ် သူ့ကို ပိုင်ဆိုင်ချင်တယ် ”
စံသ စကားကိုကြားတော့ အမယ်အိုက ခနဲ့သလို ရယ်၏။ သူ့အကြည့်၊ သူ့အပြုံးတွေထဲ စံသဟာ သခင်မလေးလို မိန်းကလေးနှင့် ထိုက်တန်လို့လား ဆိုသည့် အဓိပ္ပာယ်များ ပါဝင်နေသည်။
“ ဘယ်လိုအခြေအနေဖြစ်ဖြစ် ပိုင်ဆိုင်တာလား စံသ ”
“ ဟုတ်တယ် ”
“ တစ်ချိန်မှာ မင်း ကျိန်းသေပေါက် နောင်တရလိမ့်မယ်။ သခင်မလေးကို မင်း ပိုင်ဆိုင်ထားရပေမဲ့ .. သူ့စိတ်နဲ့ သူ့နှလုံးသားကို မင်း ဘယ်တော့မှ မပိုင်ဆိုင်ခဲ့သလိုမျိုးပေါ့။ အဲ့လို အခြေအနေမျိုးဆိုရင်ရော မင်း သူ့ကို လက်ခံနိုင်သေးလား ”
