ခုနစ်ဆောင်နန်းက မညှိုးပန်း (𝐎𝐧𝐠𝐨𝐢𝐧𝐠)

Part 36

• ခုနစ်ဆောင်နန်းက မညှိုးပန်း •
(Part - 36)

အချိန် နှစ်ပတ်ခန့်ကြာသော် .. ။

သည်ရက်ပိုင်းတွင် အိမ်နီးချင်းနိုင်ငံများ၏ အသိပေးစာတို့ အမြောက်အများ ရောက်ရှိနေသည်။ အသိပေးစာထဲတွင် ပါသည့်အကြောင်းအရာများမှာ ရူယန်းဘုရင်မအား ရာထူးချ၍ ပြည်နှင်ဒဏ်ပေးရန်ဆိုသည့် အရေးအသားများသာ ဖြစ်သည်။

           “ ရူယန်းရဲ့ အတွင်းသတင်းကို အပြင်ထိ ပေါက်ကြားအောင် ဘယ်သူကများ ရာရာစစ သတင်းလွှင့်သလဲ ”

ညီလာခံ ခန်းမဆောင်တစ်ခုလုံးတွင် မဏ္ဍိုင်ပထီ၏ ဒေါသသံမှလွဲ၍ မည်သူ့ အသံမှထွက်ပေါ်လာခြင်းမရှိပါ။

           “ ဘယ်သူကပဲ သတင်းလွှင့်ပါစေ၊ မကောင်းတဲ့ မိစ္ဆာ အတတ်တွေကတော့ ကြင်ရာတော်ဆီမှာရှိနေတယ်ဆိုတာ အမှန်ပဲလေ။ သားတော် ဘယ်လောက်ပဲ ဖုံးကွယ်ထားပါစေ၊ အမှန်တရားဟာ အချိန်တန်တော့ ပေါ်ထွက်လာရတာပဲ။ အခုအချိန်မှာ မယ်တော် စိုးရိမ်မိတာဆိုလို့ တစ်ခုပဲရှိတယ်။ အဲ့တာက အိမ်နီးချင်းနိုင်ငံတွေ၊ မဟာမိတ်နိုင်ငံတွေဆီက အသိပေးစာကနေ စစ်ကြေငြာတဲ့ စာချွန်လွှာတွေ ရောက်ရှိလာမှာကိုပဲ ”

          “ ဘာမဟုတ်တဲ့ အရေးကိစ္စကြောင့် မဟာမိတ်စာချုပ်ကို အပျက်အစီး ခံကြမယ်ဆိုတော့လည်း ရူယန်းပြည်က ဘာတတ်နိုင်မှာတဲ့လဲ။ သူတို့လိုချင်တဲ့ စစ်ပွဲမှာ ရူယန်းက ပါဝင်ဆင်နွှဲလိုက်ရုံပဲပေါ့ ”

မဏ္ဍိုင်ပထီ၏ အပြတ်သားဆုံးစကားကြောင့် အခုလေးတင်အထိ ငြိမ်သက်တ‌ံု့ဆိုင်းနေကြသော အမတ်အပေါင်းမှာ လှုပ်လှုပ်ရှားရှား ဖြစ်သွားကြတော့သည်။

           “ လျှောက်တင်ခွင့်ပြုပါ။ အရှင်မင်းကြီး .. နိုင်ငံတစ်နိုင်ငံတွင် ဦးဆောင်သူ ဘုရင်တစ်ပါးထဲကပဲ အရေးပါသည် မဟုတ်ပါ။ အတိုင်ပင်ခံတို့သည်လည်း အတိုင်ပင်ခံဖြစ်သည့်အလျောက်၊  စစ်သည်တို့သည်လည်း စစ်သည်အလျောက်၊ နောက်ဆုံး ပြည်သူသည်လည်း ပြည်သူအလျောက် အရေးပါကြသည်ချည်းပါ။ ထိုသို့သော အရေးပါမှုတို့ဖြင့် စုစည်းတည်ဆောက်ထားရသော နိုင်ငံတစ်ခုဟာ အရှင်မင်းကြီး၏ အမိန့်စကားတစ်ခွန်းကြောင့် စစ်သည်ရဲမက်များနှင့် ပြည်သူတို့ရဲ့ အသက်အိုးအိမ်ပေါင်းများစွာ ထိခိုက်ဆုံးရှုံးသွားကြရတော့မှာပါ။ အရှင်မင်းကြီးအနေနှင့် ဤအရေးကိစ္စအား အချိန်တစ်ခုပေး၍ ဆင်ခြင်သုံးသပ်ပေးတော်မူပါ ”