ခုနစ်ဆောင်နန်းက မညှိုးပန်း (𝐎𝐧𝐠𝐨𝐢𝐧𝐠)

Part 31

• ခုနစ်ဆောင်နန်းက မညှိုးပန်း •
(Part - 31)

ညီလာခံ ရင်ပြင် တစ်ခုလုံးသည် အပ်ကျသံပင် ကြားရလောက်အောင် တိတ်ဆိတ်နေခဲ့၏။ ယခုလေးတင်ပဲ ဘုရင်မအား လှောင်ပြောင် ရယ်မောလိုက်သူသည် မဏ္ဍိုင်ပထီ၏ အမိန့်ကို ဖီဆန်စွာဖြင့် ညီလာခံ ရင်ပြင်သို့ ထွက်လာခြင်း မရှိခဲ့ပါ။

           “ ကျွန်ုပ် ဘာမှမဖြစ်ဘူး အရှင်၊ ဒီကိစ္စကြောင့် စိတ်ရှုပ်ထွေးမခံပါနဲ့ ”

ခင်ယွန်းဝတီ၏ စကားကို မဏ္ဍိုင်က လက်ခံခြင်း မရှိပေ။

           “ တစ်ကြိမ် သည်းခံလိုက်ရင် နှစ်ကြိမ်မြောက် စော်ကားခံရဖို့အတွက် လမ်းစဖွင့်ပေးသလို ဖြစ်နေလိမ့်မယ် ခင်၊ အခု သူ လှောင်ပြောင်လိုက်တာ သာမန်အရပ်သူမိန်းကလေး မဟုတ်ဘူး။ ဘုရင်မတစ်ပါးကို သူ လှောင်ရယ်လိုက်တာ ”

မဏ္ဍိုင်သည် ဘုရင်တစ်ပါးတည်းသာ ထိုင်ခွင့်ရှိသော ဧကရာဇ်ပုလ္လင်ထက်တွင် ချစ်ရသူကို ထိုင်စေလိုက်ပြီး ကြွရောက်လာသော ဧည့်ပရိတ်သတ်အား သူ့ဘုရင်မဟာ ထိုသို့ အခွင့်အာဏာရှိသော အမျိုးသမီးဖြစ်ကြောင်းကို သက်သေပြလိုက်သည်။

           “ ညီလာခံရင်ပြင်မှာ သင့်ရဲ့လုပ်ရပ်အတွက် ထွက်လာပြီး ဝန်ချတောင်းပန်ပါ။ မဟုတ်ရင်တော့ .. ကျုပ်ရဲ့ အမျက်ဒေါသကို သင် ခံစားရစေမယ် ”

ဒုတိယအကြိမ်မြောက် အမိန့်ပေးပြီးသည့်တိုင်အောင် တစ်စုံတစ်ယောက်မှ ထွက်လာခြင်း မရှိတာကြောင့် မဏ္ဍိုင်ပထီ၏ ဒေါသဟာ အထွဋ်အထိပ်သို့ ရောက်ရှိသွားခဲ့လေသည်။

           “ ဒီညီလာခံမှာ ရှိသမျှ ဧည့်သည်တွေအကုန်လုံး တစ်ယောက်မကျန် ရူယန်းအကျဉ်းထောင်ဆီ ခေါ်သွားကြစမ်း၊ စောစောက လှောင်ရယ်လိုက်သူ ရှာမတွေ့မချင်း အားလုံးကို စစ်ဆေးမေးမြန်းပြီး လိုအပ်ရင် နှိပ်စက်မေးမြန်းခြင်းကိုပါ ပြုလုပ်နိုင်တယ် ”

မဏ္ဍိုင်ပထီ၏ တတိယအမိန့်စကား အဆုံးမှာတော့ .. အစောင့်ရဲမတ်အားလုံး ညီလာခံရင်ပြင်သို့ ချက်ချင်းရောက်ရှိလာကြပြီး ကြွရောက်လာသော ဧည့်သည်တော်များနှင့် တော်ဝင်မိသားစုဝင်တွေကိုပါ ဖမ်းဆီးချုပ်နှောင်ဖို့ ပြင်ကြသည်။