• ခုနစ်ဆောင်နန်းက မညှိုးပန်း •
(Part - 42)
တိတ်ဆိတ်ငြိမ်သက်နေသော ညဉ့်နက်သန်းခေါင်ယံအချိန်၌ ရူယန်းနှင့် ဂနိုင်းရဂုံမှလွဲ ကျန်တိုင်းပြည်အသီးသီးတို့တွင် သောကအပူမီးတို့ တောက်လောင်နေခဲ့ကြ၏။
အကြောင်းအရင်းမှာ သူတို့၏ ရင်နင့်သည်းချာ ရင်သွေးငယ်အားလုံး ညတွင်းချင်းမှာပင် အကြောင်းအရင်း မယ်မယ်ရရ မရှိ၊ မည်သူ့လက်ချက်မှန်း မသိရဘဲ ပျောက်ချင်းမလှ ပျောက်သွားခဲ့ကြခြင်းကြောင့် ဖြစ်သည်။
ညတွင်းချင်း ရာချီသော ကလေးများ ပျောက်ဆုံးသွားခြင်း အမှု၏ အဓိက တရားခံကို တိုင်းပြည်အသီးသီးရှိ နန်းတော်အုတ်တံတိုင်းကြီးများတွင် ရေးသားဖော်ပြထားသည်။
“ ပထီ .. ”
ယခုလေးတင် သူ့လက်ပေါ်၌ အိပ်မောကျသွားသော သမီးတော်လေးကို မဏ္ဍိုင် ပုခတ်လေးထဲ ပြောင်းရွေ့နေတုန်း အစ်မတော်ရဲ့ ခေါ်သံကို ကြားလိုက်ရသည်။
“ ကျုပ်ကို ဘာပြောချင်လို့လဲ ”
“ မယ်တော်က အခေါ်တော် လွှတ်လိုက်တာ ပထီ၊ သူ့မှာ ပထီ့ကို အရေးတကြီး ပြောစရာရှိနေတယ်တဲ့ ”
မဏ္ဍိုင် ခေါင်းတစ်ချက် ညိမ့်ပြလိုက်သည်။
“ အစ်မတော် ပြန်ကြွနှင့်လိုက်ပါ။ ကျုပ် မယ်တော့်ဆီ သေချာပေါက် သွားတွေ့လိုက်ပါမယ် ”
“ ပထီ .. ”
“ ကျုပ်ကို ဘာပြောချင်သေးလို့လဲ ”
“ တကယ်ပဲ တူမတော်က ကျိန်စာသင့်နေတဲ့ ကလေးလား ”
အစ်မတော် ဟေဆရီ့စကားကြောင့် မဏ္ဍိုင့်မျက်ခုံးတန်းများ တွန့်ချိုးကာ မျက်မှောင်ကြုတ်မိလိုက်သည်။
“ မယ်တော်က ပြောတယ်။ တူမတော်က အဖျက်စွမ်းအားတွေနဲ့ မွေးလာခဲ့တာတဲ့လေ .. ”
“ အစ်မတော်က ဘယ်လိုထင်လဲ။ မယ်တော် ပြောတာတွေက အမှန်တွေလို့ ထင်လား။ ဒီမှာ ကြည့်၊ ဒီလောက် အပြစ်ကင်းပြီး ဖြူစင်တဲ့ ကလေးငယ်လေးက မယ်တော် ပြောလိုက်သလို အဖျက်စွမ်းအားတွေ ရှိနေမှာတဲ့လား။ အစ်မတော်မှာသာ လူသားချင်း စာနာတတ်တဲ့ စိတ်ထားမျိုး ရှိနေသေးရင် အခုလိုမျိုး ကျုပ်ရဲ့ သမီးတော်ကို နောက်တစ်ကြိမ် ထပ်ပြီး စွပ်စွဲမနေတော့ဖို့ ကျုပ် မျှော်လင့်တယ် ”
YOU ARE READING
ခုနစ်ဆောင်နန်းက မညှိုးပန်း (𝐎𝐧𝐠𝐨𝐢𝐧𝐠)
FantasyAvailable 📌 Unicode & Zawgyi adult scenes ❗❗
