ခုနစ်ဆောင်နန်းက မညှိုးပန်း (𝐎𝐧𝐠𝐨𝐢𝐧𝐠)

Part 39

• ခုနစ်ဆောင်နန်းက မညှိုးပန်း •
(Part - 39)

နန်းရင်ပြင်၌ ရုတ်ရုတ်သဲသဲ ဖြစ်နေကြသည်။ အရပ်သူ၊ အရပ်သားတို့မှာလည်း နန်းဆောင်တံတိုင်းရှေ့တွင် စုရုံးကာ ရောက်နေကြ၏။

ခုနစ်ဆောင်နန်း၏ အနောက်ဘက်တံတိုင်းအလွန်တွင် တောအုပ်ငယ်တစ်ခု ရှိ၏။ ထိုတောအုပ်ငယ်မှ ပုန်းလျှိုးကွယ်လျှိုး ထွက်လာသော စန္ဒကူးမှာ ရုတ်ရုတ်သဲသဲ ဖြစ်နေသည်ကို မြင်လျှင် ကျေနပ်ပြုံးတစ်ပွင့်ကို ဆင်မြန်းကာ ခုနစ်ဆောင်နန်းဘက် ခပ်သုတ်သုတ် လျှောက်လာသည်။

           “ အသင်က ဘယ်သူလဲ ”

အပျိုတော်တစ်ယောက်မှာ စန္ဒကူးအား မြင်လျှင် ထိုသို့ စူးစမ်းသလို မေးလာသည်။

           “ ကျွန်ုပ်က ဟီကူ ခေါ်ထားတဲ့ အမျိုးသမီးပါ ”

           “ ဪ .. သခင်မလေးကိစ္စအတွက် ခေါ်ထားတဲ့သူဖြစ်မယ် ”

           “ မှန်ပါတယ်။ အခု သခင်မလေး အခြေအနေ ဘယ်လိုရှိနေလဲ။ သိပါရစေ ”

           “ အရမ်းစိုးရိမ်ရတဲ့ အခြေအနေပေါ့။ အရပ်ဆေးဆရာ မပြောနဲ့၊ တော်ဝင်သမားတော်ကြီးကတောင် လက်လျော့နေရတဲ့ အခြေအနေပါ ”

ဝတ်ရုံအောက်က စန္ဒကူး၏ မျက်နှာမှာ အပြုံးများဖြင့် ပြည့်နှက်နေ၏။
သည်တစ်ကြိမ်တော့ သူ့အကြံ အောင်မြင်ခဲ့လေပြီ။ ဂနိုင်းရဂုံအတွက် အန္တရာယ်ရှိသော ခင်ယွန်းဝတီကို သူ အပြတ်ရှင်းထုတ်နိုင်ခဲ့လေပြီ။

           “ လာခဲ့ပါ၊ သင့်ကို ဟီကူ့ဆီ ခေါ်သွားပေးမယ် ”

အပျိုတော်နှစ်ယောက်မှာ ရှေ့ကနေ ဦး‌ဆောင်ထွက်သွားသည်။

စန္ဒကူး ခုနစ်ဆောင်နန်းရင်ပြင်ရှေ့ အကြည့်ပို့မိတော့ .. အဆိပ်ခတ်သူကို ရှာဖွေစစ်မေးနေသော ဂနိုင်းအား မြင်လိုက်ရသည်။ စန္ဒကူး လှစ်ကနဲ တစ်ချက်ပြုံးရင်း နန်းဆောင် အောက်ဆုံးအထပ်ဆီသို့ ဝင်လာလိုက်တယ်ဆိုလျှင်ပဲ ငြိမ်သက်စွာ လဲလျောင်းနေသော သမီးတော် စန္ဒဝတီကို မြင်လိုက်ရသည်။

           “ ဒါ ဘယ်လိုလုပ် ဖြစ်နိုင်မှာလဲ။ အဲ့ဒီ့နေရာမှာ လဲလျောင်းနေရမဲ့သူက ကုမ္မာဝတီရဲ့သမီး ဖြစ်နေရမှာလေ ”