မျန်ရဲ့ဝိညာဉ် ကူး​ပြောင်းလာတယ် ||မြန်မာဘာသာပြန်||

[77]

[Unicode]

077: မင်းနဲ့ပိုနီးချင်မိ

လဲ့ယ်ထျဲက တျန်းရွာသို့ သွားရာလမ်းကို သိသွား​စေရန် ရှီလကိုပါ တစ်ပါတည်းခေါ်သွားခဲ့သည်။နောင်တွင် တျန်းရွာသို့ သွားလိုလျှင် လဲ့ယ်ထျဲကိုယ်တိုင် သွားစရာမလိုတော့​ပေ။

ချင်မျန်က​တော့ အိမ်တွင် တစ်ယောက်တည်း ကျန်ရစ်နေခဲ့သည်။နောက်ဆုံးမှာတော့ ပိုင်တျန့်လေး
နှင့်အတူတူ နယ်​မြေထဲကို သွားဖို့ အချိန်အများကြီးရခဲ့လေပြီ။သူ ဝိညာဥ်ကူးပြောင်းခံရပြီးကတည်းက နယ်​မြေထဲကို သူရောက်ခဲ့တဲ့ အကြိမ်အရေအတွက်မှာ အလွန်နည်းပါးလွန်းလှသည်။မဝင်ချင်တာ မဟုတ် အခွင့်အရေးမရခဲ့ခြင်းသာ။ပထမတုန်းက​တော့ လဲ့ယ်ထျဲက စောင့်ကြည့်နေတာကြောင့် လွယ်လွယ်ကူကူ မဝင်ရဲခဲ့​။နောက်ပိုင်းမှာတော့ သူ လက်တွေ့ဘဝတွင် အလုပ်များလာလွန်းသောကြောင့်ပင်။နေ့စဉ်နှင့်အမျှ သူ ငွေရှာနည်းနှင့် သူတို့၏ဘဝတွေကို မြှင့်တင်ရန် တွေးတောနေရသောကြောင့် နယ်​မြေကို မစီမံ မခန့်ခွဲနိုင်ပေ။သူ ရံဖန်ရံခါသာ ဝင်ရောက်နိုင်ခဲ့ပြီး သူ ဝင်​ရောက်သည့်အ​ခေါက်တိုင်းကလည်း ဝိညာဉ်စမ်းရေကို ခပ်များများယူရန် သို့မဟုတ် သစ်သီးနှင့်ဟင်းသီးဟင်းရွက်အချို့ကို ရွေးယူရန် အချိန်တိုအတွင်းသာ သူနေဖြစ်ခဲ့သည်။ယခုဆိုလျှင် သူ လဲ့ယ်ထျဲကို နယ်​မြေအကြောင်း ပြောပြရန် ဆုံးဖြတ်လိုက်သည်မို့ သင့်တော်မယ့် အခွင့်အရေးကို စောင့်နေရုံသာ ရှိ၏။

နယ်​မြေထဲသို့ သူဝင်လိုက်သည်နှင့်တပြိုင်နက် ချင်မျန်သည် နယ်​မြေက ယခင်ကနှင့် အနည်းငယ် ကွာခြားသွားသည်ကို လုံးဝသတိပြုမိလိုက်သည်။သေသေချာချာ ကြည့်လိုက်တော့ နယ်​မြေဧရိယာ ကျယ်လာတာကို တွေ့လိုက်ရ၏။ယခင်က လေးထောင့်ကွက်အိမ်*တံခါးဝတွင် ရပ်၍ အဝေးကို လှမ်းကြည့်လိုက်လျှင် ခပ်လှမ်းလှမ်းအကွာအဝေးရှိ ရှုခင်းများသည် အမြဲတမ်း မီးခိုးမြူများဖြင့် အုံ့ဆိုင်းနေသည်။ယခု ပြန်ကြည့်လိုက်တော့ စိမ်းစိုနေတဲ့ တောင်တန်းတွေကို ရှင်းရှင်းလင်းလင်း မြင်နေရပြီ။သူ ရုတ်တရက် ခန့်မှန်းမိ၏။