ငါလှည့်စားခဲ့တဲ့ဇာတ်လိုက်ပြန်မွေးဖွားလာပြီဟ || ဘာသာပြန် [ Book-1 ]

[၉] စေ့စပ်ထားသောသတို့သားလောင်း။

!unicode!

စစ်သဘော်ပေါ်မှာလင်ခုံးလုကဆေးစစ်အခန်းထဲမှာလှဲလျောင်းကာသူ့ခန္ဓာကိုယ်ကိုစစ်ဆေးခံနေရသည်၊ အထူးသဖြင့်သူ့ခေါင်းကိုပင်။

လုစစ်ကဘေးမှာအမူအရာကင်းမဲ့စွာရပ်နေပြီး စစ်ဆရာဝန်၏စစ်ဆေးမှုကိုကြည့်နေရင်း တိုက်ပွဲ၏ရလဒ်အကြောင်းသူ့ငယ်သားတင်ပြနေတာကိုနားထောင်နေလေသည်။

"....ဒီတိုက်ပွဲမှာကြယ်သူခိုး၁၃ယောက်ဖမ်းမိတယ်၊ ကျွန်တော်တို့ဆီမှာအသေအပျောက်မရှိဘူး၊ ဒါပေမဲ့....အနီရောင်မက်ခါလွတ်သွားပြန်ပြီ။"

လုစစ်မှာကြားမကြားမသိပေမဲ့ လက်မြှောက်ကာတစ်ဖက်လူကိုအရင်ထွက်သွားဖို့အချက်ပြလိုက်ပြီးမှ ဆရာဝန်ကိုမေးလိုက်သည်။
"သူဘယ်လိုနေလဲ။"

စစ်ဆရာဝန်ကားဝါရင့်ဆရာဝန်ဖြစ်ပြီး စစ်ဆေးနေချိန်တစ်လျှောက်လုံးမျက်မှောင်ကြုတ်ထားပုံမှာ အခက်တွေ့နေသည့်အလား။

ဒါကိုမြင်သော် လင်ခုံးလုမျက်ရည်ဝဲကာမေးလိုက်သည်။
"ကျွန်တော်ရောဂါနောက်ဆုံးအဆင့်တော့မဟုတ်ဘူးမလား။"

စစ်ဆရာဝန်အိုကြီးကသူ့ကိုတစ်ချက်ကြည့်ကာ ပေါ့ပါးစွာပြောလိုက်သည်။
"အဆင်ပြေပါတယ်၊ အကြောက်လွန်သွားတာပါ၊ ပိုအနားယူလိုက်နော်။"

"ဒါဆို ခင်ဗျားမျက်မှောင်ကြုတ်ထားတာက...."

"အော်၊ အကျင့်ပါနေလို့ပါကွယ်။"
စစ်ဆရာဝန်အိုကြီးကဆိုသည်။

လင်ခုံးလု: "......"

"မင်းစိတ်ပူနေလို့ရှိရင် မင်းဟိုကိုရောက်မှအဲ့ဒီ့ကဆရာဝန်ကိုထပ်စစ်ဆေးကြည့်ခိုင်းလိုက်ပေါ့။ အဲ့ဒီ့စခန်းကပစ္စည်းတွေကပိုတိကျမှုရှိတယ်လေ။"
စစ်ဆရာဝန်အိုကြီးကဆိုသည်။

"ဒါဖြင့် သူအတိတ်မေ့တာက...."
လုစစ်ထပ်ပြောလိုက်သည်။

"နည်းနည်းထိခိုက်သွားလို့ မှတ်ဉာဏ်အာရုံကြောကိုဖိမိသွားတာ၊ ဒါပေမဲ့အဆင်ပြေပါတယ်၊ သိပ်မကြာခင်မှတ်မိလာလိမ့်မယ်။"
စစ်ဆရာဝန်အိုကြီးကလျှော့တွက်နေဆဲဖြစ်သည်။

လင်ခုံးလုမှာဒါကိုကြားလိုက်ရချိန်လုံးဝစိတ်သက်သာရာရသွားမိသည်။ ကြည့်ရတာ 0687ကိုဦးနှောက်အခြေအနေလိမ်ခိုင်းလိုက်ရာမှာအောင်မြင်သွားပုံရသည်၊ စစ်ဆေးရေးကိရိယာကဘာမူမမှန်ကိုမျှမတွေ့သွားပေ။