عشق البدر

البارت 20

جايا ضارها راسها وبغات ترتاح شويا وتاكل وترضع بنتها وترجع لخدمتها ولكن شكون خلاها؟ الحاج دخل فيها طول وعرض ومامخليش ليها فرصة فين تدوي، عمرو كان هاكا معاها شنو يكون وقع ليه وبدلو لهاد درجة وقصح قلبو من جهتها زعما يكون سفيان وي بياسيغ هو حيت الحاج مايمكنش يعرفها فين كاينا يلا ماقالهاش ليه ولكن شنو غايكون زاد عليه؟ أكيد غايكون عمرو عليها بالمزيان وسيفطو، تنهدات وعطات صاكها لعيشة وغمزاتها باش تخليهم بوحدهم ..
راندا : با الحاج اجي نجلسو للداخل وندويو عافاك
الحاج : معلوم غانهضرو ولاش جاي أنا؟ غير باش نفهم منك شحال من حاجة
مدات ليه يدها باش يدخل وتبعاتو هي، تحدرات عند بنتها لي مشبحة فالأرض تاترضع فنونوسها باستها وناضت جلسات فوق السداري ويديها جامعاهم قدامها وهو مرجع ظهرو اللور ويديه على المخاذ وراه تايشوفيها ..
الحاج : يالاه دوي تانسمك! قولي شنو عندي وخوي المزيودو باش نعرف راسي باش غلطت معاه وفشنو قصرت معاك نتي وبنت ولدي
راندا : حاشا ابا الحاج ماقصرتي معانا فوالو
الحاج : وفين كاين المشكل؟
راندا : بغيت نعتامد على راسي ا با الحاج، بغيت نكبر بنتي بنفسي ونوفر ليها كل ماتحتاج مابغيتش نتكا على شي حد وبالنسبة لقضية حقي مادايمش ليا وحق بنتي فاش تكبر غاتاخذو
الحاج : كبرتي ووليتي تعرفي دوي اممم سمعي أنا حفيدتي مايمكنش نخليها عايشا هنا، عندها دار جدها تما تعيش حياتها وقدام عينيا
راندا : وتا هادي دار جدها بحال بحال
الحاج : لا ماشي بحال بحال، وزايدون مسألة تعيشو وحدكم هنا مامسلكاش لذلك جمعي حوايجكم ورجعو معايا
راندا : با الحاج عافاك ماضغطش عليا، ماتبززش عليا شي حاجة ماغانرتاحش فيها، أنا قررت وغانبقا هنا هادي داري ودار بنتي وغانعيشو مزيان وهانتا شفتي على عينيك تا حاجة ماخاصانا بجوجنا
الحاج : اه شفت لي كان خاصني نشوف وتأكدت ان عيشتكم هنا ماليها معنى، تاظلي خارجا والبنت تاتبقا نهار كامل هنا ماعرفتيها واش كالت ولا شربات ولا بدلات وتا الرضاعة حارماها منها
راندا : با الحاج ماتقلدش بشي حاجة ماكايناش عافاك، بنتي مهليا فيها وتا عيشة دايرا كثر من جهدها ومانساش خيرها وأنا تانرجع فوقت الغدا نرضعها ومعاوناها بحليب الفارماسيان وهي فهاد العمر ولات تاكل شويا وصحتها هانتا شفتيها بيخير وعلى خير
الحاج : وعلاش واثقة فديك عيشة لهاد الدرجة؟ كذابة بحالها ماعندها ماتبقى دير مع حفيدتي
راندا : أنا لي طلبت منها تجي عندي وتبقا معانا فاش شفتكم كلكم شكرتوها داك نهار ثقت فيها وماندمتش، وقفات معايا وسانداتني وعاوناتني وغانكون بنت الحرام يلا نسيت هادشي، ونزيدك ا با الحاج حفيدتكم مانحرمكمش منها وتقدرو تجيو فأي وقت تطلو عليها ونجيبها تانا لعندكم
الحاج : وهادشي مامقنعناش، حفيدتنا بغيناها تعيش معانا فدار وحدة، علاش مقصحة راسك؟ ولا كاينا شي حاجة لي شاداك هنا وحنا مافراسناش؟
راندا (باستغراب) : كيفاش؟ مافهمتش شنو بغيتي تقصد بكلامك
الحاج : اوا مانعرف، اصرارك أنك تبقاي فهاد درب أي واحد يدخل ليه الشك وغايقول بسباب شي حد
راندا : شنو هادشي تاتقول؟
الحاج : راك سمعتيني وفهمتيني مزيان ونبغي ديري فبالك ان لي تاتفكري فيه عمرو يوقع ولا غايكون ليا تصرف آخر معاك وحفيدتي ناخذها ناخذها
راندا (وقفات) : تاتهددني دابا ولا شنو؟ واش عارف راسك اش تاتقول فتي حدودك معايا ومازال لحد الساعة محتارماك على وجه العشرة وولدك عادل الله يرحمو ولكن فاش طعني فشرفي هنا مانسمحليكش واخا تكون با لي والدني ماغانصبرش ليك، ودابا خرج عليا من داري وعمرك تعتبها وداك لي وصل ليك الهضرة عندي معاه حساب آخور غير هو ماقدرش يوصل للي بغا قال يحرضك عليا نتا ونسا ان تاواحد ماتايهمني وماتانخاف إلا من لي خلقني وسير تحاسب معاه هو نيت وعرفو اش مخبي وشمن منكر دار مع خوه عاد جي دوي معايا أنا .. ولا بغيت ندير شي حاجة غانديرها وماغاتهمني لا نتا ولا غيرك وماغامخافش منكم سمعتي ولي فجهدكم ديروه
الحاج (وقف مخرج فيها عينيه) : تاتجري عليا بلا حشمة بلا حيا
راندا : وعلاه نتا خليتي فيها شي حشمة؟ باش تقول لمرات ولدك تاديري وتفعلي نتا حشمتي؟ الله ياخذ فيك الحق على هاد الكلام عمري نسمح ليكم عمريي حسبي الله ونعم الوكيل فيكم بقات فالحج 😡
الحاج : غاتندمي على هادشي
راندا : اعلى مافخيلك ركبو يحسابك غاتخلعني ولا؟ احتارمتكم وماحتارمتونيش ودابا الباب
هضرتو سمماتها وخرجاتها على طوعها وماعقلاتش على راسها وهي تاطردو من دارها .. غير خرج وزفات بفاز جابتو فالحيط وبدات تنهج وتسب وتلعن فلي كان سباب فهادشي ولي مابغاش يخليها تعيش حياتها هي وبنتها وترتاح، كيفاش عطاتو خاطرو يتاهمها بحاجة خايبة بحال هادي وماخافش من لي خلقو .. عيشة مادخلاتش عندها وخلاتها تفش بوحدها وسيفطات المحادثة لبدر وجلسات فالكوزينة وخلاتها هي معنقة بنتها فالصالون معصبة ..