عشق البدر

البارت 35

شافت فيه ودغيا حدرات عينيها للأرض ولصاقة بيضة رقيقة مازال فحنكها، البصمة لي عمرها تنساها واخا تموت، بصمة هي قلبات عليها بطمعها وذنوب انسان بريئ خرجو فيها .. شاف حركتها وحس بيها وجر الميكة بلطف من بين يديها وسبقها وهي وراه مابغاش يحرجها ولا يشوف فوجهها وهي كاتكره لي يتمعن فيه كأنه تايقوليها شوفي وجهك المشوه، شوفي زينك لي كنتي زايغا بيه اش وقع ليه .. وصلو لباب دارهم ومدها ليها وهو مازال حادر عينيه للأرض ..
سبع : سلمي على الواليدة
صفاء : شكرا اخويا ومبلغ
قالتها ودخلات فحالها بزربة سادا الباب فوجهو، أما هو بحال يلا ذبحاتو بكلمة "خويا" منين وقع ليها المشكل عمرها قالت اسمو مجرد بلا ديك صفة .. بغا يعرف اش وقع ليها ولكن كلشي فشيشكل، دارهم سكتو الناس بأنها حادثة فخدمتها والاغلبية ماثاقوش بيهم وخرجو عليها اشاعة بلي تفلات على شي حد وهو لي خسر ليها وجهها .. تنهد وشدها فحالو لدارو ..
وصفاء غير دخلات ورمات الميكة من يدها وجلسات فالأرض خاشيا وجهها بين كفوفها وتاتبكي، سمعات صوتها الام ديالها وخرجات عندها مخلوعة، جلسات حداها وشداتها من كتافها تاتحرك فيها وتسولها بخوف ..
الأم : صفاء مالك؟ بنتي لاتخلعينيش وقولي ليا شنو بيك؟ واش هضر معاك شي حد هااا؟ قولي واش سمعتي شي حاجة
صفاء : خئهئهئهئ أنا مشوهة اماما مشوهة هئهئهئ كلشي ضاع كلشي هئهئ كون غير مت ا ماما كون غير مت ولا هاد العذاب صافي عييت مابقيتش قادرا نتحمل نظرة الناس وتا نظرتي أنا مابقيتش متحملاها هئهئهئ مابقيتش حاملة راسي صافي تكرهت وبيت نموووووووت اماما نموووووت هئهئهئ علاااش خلاني عااايشة علااااش؟ علااش ماقتلنييييش ديك الساعة علااااش اختار يعذبني بهاد التشوه علااااش اماما
تاتبكي بهيسترية ورمات يدها لوجهها حيدات ليه اللصقة وبانت الشرطة بوضوح وبان الفرق كذلك، واخذا ليها بلاصة كبيرة فحنكها، من جنب عينها تا لجنب فمها .. عنقاتها مها وبدات تبكي معاها ودعي فلي كان سباب ولي دار فيها هاد الحالة .. كانت بنت غاية فالجمال وكلشي حاسدها عليه وماكاينش لي توصلها لا فداخل الحومة ولا فخارجها وغلط دارتو بقلة عقلها خلاها تخسر كلشي وتحس براسها عالة ومامنها فايدة .. بزز باش سكتاتها ونوضاتها لبيتها دخلاتها نعساتها فبلاصتها وغطاتها وبقات حداها تاتلمس حنكها السليم وصفاء ساهية فالفراغ وتاتفكر الليلة المشؤومة لي تسببات ليها فهادشي كامل، عمرها توقعات الانتقام يكون بهاد البشاعة ولكن لي زرع شي حاجة تايحصدها وهادشي بالذات لي صرا معاها، ندمات وياريت الندم ينفع .. مسحات دموعها وتگعدات ومها تاتشوف فيها باستغراب ..
صفاء : خاص نقلب عليهم اماما
الأم : شكون هادو ابنتي؟ لاتقوليش ليا دوك لي دارو فيك هاد الحالة شنو بيتيهم ابنتي هاا علاش اتقلبي عليهم بيتيهم يقتلوووك ولا يديرو فيك ماكثر من هادشي، ديري عقلك ابنتي الله يهديك وتكمشي راحنا ماقدهمش ويقدرو يغبرونا كاملين تا خوتك مايحنوش فيهم
صفاء : ماشي هوما اماما .. غانقلب على عائلة داك الولد 😢 بيت نطلب السماحة اماما، بيت نرتاح هئهئ خاص نشوفهم ضروري
الأم : طلبيها من الله ابنتي ونساي دوك الناس، نساي كل ماداز ابنتي وخلينا نتهناو من هادشي لاتنوضيش علينا النحل
صفاء : ولكن أنا عمري نتهنا فحياتي، انبقى حاسا بالذنب حياتي كاملها وهازا هاد جبل الثقيل فوق كتافي، بيت نزولو اماما 😢 غير نعتاذر وصافي ماغانجبد ليهم الهضرة على والو وتاهادوك ماغانجبدهمش
الأم : نسيتي شنو قالو ليك هااا؟ قالو ليك نساي هادشي وبعدي يلا بيتي تبقاي عايشا
صفاء : وبنت ليك دابا عايشا اماما؟ خذيت قراري وغانفذو
الأم (بعد صمت) : وكيفاش اتلقايهم؟
ناضت للماريو ديالها فتحاتو وخشات يدها تحت حوايجها وجبدات طرف د جورنال ورجعات حدا مها ..
صفاء : هادا فيه معلومات على عائلتو وبيه غانعرفهم فين ساكنين
الأم : وغير أجي وشوفيهم، ويحسابك ايبغيو يسامحوك؟ هادشي يلا ماداوك للبوليس ويحلو القضية ثاني
صفاء : ندير لي عليا والسلام، مانظنش يديروها
الأم : نتي راه خرج ليك العقل مافيهاش، خليني نوض لشغلي ونتي رجعي عقلك وفكري بيه مزيان وفكري فينا تاحنا ماتشوفيش غير راسك
خرجات الأم معصبة من بنتها وخلاتها جالسة بلاصتها وشادا جورنال فيدها تاتعاود تقراه للمرة الألف من نهار تنشر وجا فيدها .. سطرات على نسب ديالو واسم باه وخوه والمعلومات لي تقدر تحتاج فالبحث ديالها ..