وأخيرا حبيبتو هزات راسها وشافت فيه بعدم فهم، غمزها وعض على شفتو وهي مصدومة وماعرفات شنو تايوقع وعلاش العدول كاينين وشنو كاين .. فوزية ولات تبخ النار وماقدراتش تزيد تصبر وقفات بزربة معصبة ودخان خارج من نيفها ووجهها حمر بالغضب قرب يطرطق، شافوها كاملين وبدر لي هز فيها حاجبو بتحدي ..
فوزية : شنو هادشي ابدر؟ ياك قلتي غير خطبة
بدر : خير البر عاجله الواليدة، وزايدون ماعنديش مع تخربيق دالخطبة وغيرها وجلس تسنى والحالة داكشي باش قررت نفوتوها وندوزو للمهم نيشان
فوزية : وحنا شكون؟ وفين مشينا لي ماتشاورتي معانا فتاحاجة
بدر : سبق قلت حياتي وأنا حر فيها نقرر لي بيت ماشي صغيور نتشاور معاكم ودابا جلسي الواليدة الله يرضي عليك وخلي الناس دير شغلها
فوزية : أنا ماموافقاش على هادشي وماغانزيد دقيقة هنا، جمال نوض فحالنا
راندا بحال يلا تخوى عليها سطل دالما بارد فيقها من الحلم لي كانت عايشا فيه وفهمات أن مو مابغاتهاش وكانت متوقعة هادشي ولكن كانت تكذب على راسها وتوهمو أن الناس طوب وحجر وكي كاينين حماوات مايقبلوش لولادهم بأرملات راه كاينين لي متاقيات الله وايتفهمو الوضع أكيد وماغاتهمهم تاحاجة ولكن مشات غالطة وبزاف كلشي بحال بحال والعقلية صعيب تبدل .. غرغرو عينيها وشفايفها بداو يترعدو ونفسها ضاقت، بغات تنوض توقف وتخرج من تما ولكن رجليها ماساعدوهاش، فشلات وركابيها خواو بقات جالسة وصوتها بغا يبدا يتسمع وهي تكتمو بكفها .. جاد الله تاهو وقف وعيا صابر من أول الزيارة وكلشي على وجه ختو ولكن شافهم تعداو الحدود ورفضوها قدام عينيها وقدام البراني وهادشي ماستحملوش ..
جاد الله : وتاحنا الالة بنتنا ماشايطاش علينا، وملي نتوما ماموافقينش اذن ماكاين نصيب
بدر (خرج عينيه) : شنو تاترون نتا؟ واش تانلعبو حنا هنا (شاف فباه) مالك نتا ساكت؟ دوي مع مرتك دير عقلها ولا غايكون ليا معاكم تصرف آخر لي ماغايعجبكمش
فوزية (بصدمة) : شنو هادشي تانسمع منك اولدي هااا؟ كيفاش دوي مع مرتك؟ نسيتي بلي تادوي على مك لي ولداتك
بدر : نتي لي باين ليا نسيتي، هاد السيدة لي جالسة قدامك هي لي باغي ومنها نخلاق، وافقتي ولا العكس ماغاتبدلي والو غانديها هي غانديها وبزز من كلشي
راندا (تاتبكي) : و وأنا مابغيتش هئهئ مابغيتش
حاولات توقف بزز ونعيمة شدات فيها سانداها وراندا معلقة فيها ودموعها شلال عمرها ظنات تحط فهاد الموقف وقدام خوها وجارتهم، حسات بالاهانة والذل وهوما جالسين يتخاصمو .. بدر كعا بالمزيان وهو تايشوفيها تاتبكي وكملاتها برفضها، حس براسو ايطرطق فوجههم كاملين وغايدير شي جريمة وتاحد ماواقف معاه، دار شاف فوالديه بنظرة نارية ..
بدر : نتوما لي قلبتو على هادشي (شاف فالعدول) بقاو هنا بلاتي ماتحركوش من بلاصتكم تانرجع ونتا (لجاد) ماتنساش هضرتنا وشد ختك جلسها بلاصتها
دار ليهم إشارة بيدو يتبعوع وداكشي لي كان ناضو بجوج وفوزية قبل ماتخرج رمات راندا بشوفات كره وتمتمات بنعلة وخرجات هازا خنافرها للسما وراجلها حداها راسم ابتسامة خبيثة .. وفالباب كان ولدهم تايتسناهم بحال الاعصار ..
بدر : هاد كمارة لي قدامكم اتنساوها سمعتو؟ اضربو على دينمي وعمركم تعرفوني مازال اتنساو واش ولدتو شي ولد ويلا فكرتو مجرد تفكير تجيو جهتي ولا تقربو مني ولا من مرتي انوريكم لي عمركم حلمتو تشوفوه وماغانراعي لتاشي ق***
خنزر فيهم وضرب فيهم ورجع دخل للدار وزدح الباب بجهد فوجههم، نيشان للصالون لقا نعيمة جلساتها فوق السداري وراندا خاشيا وجهها فكرش السيدة ومعنقاها من وسطها تاتبكي وتشهق وجاد الله حاط يدو على كتفها تايحاول يسكتها، العدول ماتحركوش من بلاصتهم وغير تايتفرجو وماقدرو يتدخلو بوالو من داكشي لي قاريين وجيبهم عامر وخافوه يخوى ومايستافدو والو لذلك ضربو الطم تايشوفو هاد الليلة كي غاتخرج.. بعد نعيمة بشويا عليها واعتاذر منها وتاهي تفهمات واحتارماتو، جلس جنبها وجرها من كتافها عنقها عندو واخا عيات تنتر وتبعد ولكن ماخلاهاش وزيرها تاحطات راسها على كتفو وحدر راسو لعند وجهها تايهمش بصوت خافت تايسمعوه غير هوما بجوج ..
بدر (بنبرة حنينة) : حياتي، عمري ششش سكتي وسمعي ليا واخا شش خليني ندوي وسمعي وديك ساع لي بيتيه نديرو معاك
سكتات بزز باش تسمع ليه ويفكها من حضنو لي زاد ألمها كثر وخافت تضعف ..
بدر : شنو قلت ليك قبل؟ نهار سولتيني واش والديك ايوافقو قلت ليك مايهمنيش رأيهم ولي تايهمني هو نتي، نتي فقط وتاشي مخلوق ماعندو الحق يتدخل فينا وتا فاش مشيتي لديك دار وعائلة بنتك مابغاوش قلت ليك كلشي ضربيه عليا وسولتك واش ثايقا فيا وقلتي ليا كثر ما تانتصور؟ ياك قلتي هادشي
حركات راسها بالايجاب ووجها مازال مخشي فعنقو ..
بدر : وشنو تبدل دابا هاا؟
راندا : و والديك هئهئ مايمكنش نبزز راسي عليهم ولا نكون سبب فمشاكلكم ..
أنت تقرأ
عشق البدر
Romanceقصة درامية بامتياز .. تحكي عن فتاة يتيمة عاشت المعاناة حتى دخل حياتها من أرجع النور لها أحبها دللها وعطف عليها قبل أن يفقد حياته في حادثة غريبة غامضة وترجع أرملة تعيش في ظلمة وتفقد الأمل من كل شيء فهل الأمل سيعود لحياتها من جديد؟؟ تابعو القصة لتجدو...
