شافت تا عيات والوقت تايدوز، حطاتها فوق الزربية ودخلات للحمام طرفات حالتها وخرجات بدلات حوايجها وتأنتكات كي العادة وشعرها جمعاتو الفوق شفنجة ولباسها مستور عبارة على دجين عريض شويا لونو مغلوق مع شوميز فالابيض وكاب اسود من الفوق دوني، لبسات طالون فرجليها وهزات صاكها وبنتها وصاك صغير ديالها فيه لوازمها ونزلات مع الدروج بالمهل وهي تاتخمم شنو غادير ..
راندا : ففف الله يابنتي وشنو غاندير فهاد الوحلة؟ تا يلا اتاصلت دابا بجميلة غاتعطل عليا ففف
خرجات من الدار وحجبانها معقودين معصبة وتالفة، بدات دور فجنابها لعل وعسى تبان ليها عيشة جايا ولا شي حاجة، تاطلب الله فسرها يدير ليها مخرج وهي غادا تاتفكر فحل سمعات سميتها ودارت وراها لقاتها جارتها نعيمة أم هدى جايا جهتها تاتزرب ووجهها بشوش ..
نعيمة : راندا بنتي مالك؟ من قبيلة تانعيط ليك
راندا : غير سمحيليا اخالتي والله ماسمعتك
نعيمة : تانا هادشي لي قلت، شفتك خارجا وماشي على برجك وخرجت قدامك وماشتينيش، مالك ابنتي شنو عندك؟ ياكما البنيتة بيها شي حاجة؟ علاش مخرجاها فهاد الوقت
راندا :واغير سكتي اخالتي، البنت لي تانخلي معاها شيماء مشات لدارهم هاد السبت وموالفة تجي الاحد بالليل حيت انا الاثنين تانصبح خدامة اييوا ماجاتش وتيليفونها طافي ماعرفت شنو واقع معاها شوشاتني عليها وكي شفتي اليوم بدات القرايا ثاني وماخاصنيش نغيب
نعيمة : دابا مالقيتي لي يشد ليك البنت؟ وفين غادا بيها
راندا : والله ماعرفت تلفت وخرجتها معايا تانفكر فحل (تنهدات) تايبان ليا نرجع فحالي ونتاصل بالادارة نعلمهم
نعيمة : لواه لواه ابنتي وحنا لاش كاينين؟ والجورة لاش صالحة .. يلا بيتي وغاتكوني مرتاحة خلي البنية مع بنتي هدى راها غير فالدار مقابلة ختها الصغيرة تشدهم بجوج تاوكان ترجعي
راندا : مابغيتش نبرزطكم اخالتي والله
نعيمة : عمرك تعاودي بحال هاد الهضرة راك فمقام هدى، اجي معايا اجي
راندا : واخا خالتي الله يستر عليك ويخلي ليك بنياتك ويعاونك
نعيمة : امين ياربي امين ويحفظك ابنتي
تمشات معاها راجعين لدار نعيمة، حلات الباب الكبير ودازت لباب الفصيل تاهو حلاتو وبدات تعيط لبنتها ..
نعيمة : دخلي ابنتي زيدي مرحبا بيك، وهانتي تشوفي جيران وعمرنا دخلنا عند بعضياتنا
راندا : الوقت اخالتي وصافي كلها وفين مجلوق
نعيمة : بصح الله يحسن العوان .. (تاتعيط) هدىىى هدىىى
كانت ناعسة حدا ختها معنقاها فاش سمعات صوت ماماها وناضت بشويا باش ماتفيقش الصغيورة، خرجات من البيت تاتفوه وتحك فعينيها وشعرها الطويل تايلعب وراها ..
هدى (بصوت ناعس) : نعام اماما (شافت راندا وحلات عينيها بدهشة) رااندا!!
راندا : صباح الخير احبيبا، سمحيلينا فيقناك من نعاسك
نعيمة : سمعي ابنتي، راندا خدامة ومالقات شكون يشد ليها بنيتها، وقلت ليها تخليها معاك تاترجع
هدى (بسرعة) : اييه اييه على الراس والعين
راندا (بامتنان) : شكرا بزاااف اختي
هدى : واااايلي اراندا مابيناتناااش، اراي ليا الفنكوشة اري
شداتها من عندها فرحانة بيها وراندا ماسخاتش بيها وقلبها تزير عليها حيت أول مرة تخليها مع شي حد .. مدات ليها الصاك وبدات تشرح ليها شنو دير ليها وشنو توكلها وكيفاش تصاوب ليها حليبها وكذا وهدى تاتصنت ليها وابتسامة فاتنة على وجهها ..
هدى : غير سيري وتهناي من جهتها راها بحال نور
شكراتها راندا مرة خرى وخرجات مع نعيمة لي عاود وصات بنتها ..
هدى حضنات شيماء تاتراري بيها ودخلاتها للصالون جلسات هي وياها تايلعبو ويضحكو وشيماء ماتاتعزلش ولي شافتو تبغيه وضحك ليه ومهدنة بزاف ماشي من نور الدراري الصغار لي فيهم الصداع والتبرزيط
هدى : هههه شحال غزيولة ياختي وشحال تهبلي غاناااكلك أنا غاناااكلك هه
تاتهر فيها وشيماء ميتة بالضحك تا فيقو نور لي خرجات عندهم وتاتشوف فشيماء بعجب هه جراتها هدى عندها باستها وجلساتها جنبهم تاتعرفهم زعما ..
هدى : وهاااهي نووور هه هاهي صاحبتك جديدة جاب ليك الله معامن تلعبي بلعبك وتفرقي مني أنا تخليني نقدي شغلي على خاطري ههه يالاه جلسي حداها نمشي نصاوب ليكم هام هام واخا؟
حركات ليها نور راسها بالايجاب وناضت هدى للكوزينة بدات تصاوب ليهم الفطور وخلاتهم تايلعبو ..
وكلاتهم بجوجات وكالت تاهي معاهم .. حلات باب الدار المفصول على الكبير وخرجات كرسي دنور جلساتها فوقو وكانت عندهم مشاية ديالها جلسات فيها شيماء وحطات ليهم اللعب وخلاتهم تايلعبو ودخلات هي فحالها تشقا وتوجد الغدا والقرآن مطلوق فالدار حيت مولفاه كل صباح طلقو ..
-كان هابط مع الدروج تايقاد فالساعة ديالو فيديه وكول القميجة .. تابانو ليها البنيتات بجوجات تايلعبو ووقف عليهم بابتسامة على وجهو، هبط باس نور هي اللولة وداز لعند شيماء لي كيف شافها عرفها واستغرب وبدا يدور فجنابو يقلب على مها، حشم يطل وسط الدار وبقا مقرد حداهم تاخرجات هدى طل عليهم وهي تفاجأ بيه ورجعات بزربة ورا الباب مخبية حيت كان شعرها عريان وتاهو دغيا حدر عينيه وعطاها بالظهر ..
أنت تقرأ
عشق البدر
Storie d'amoreقصة درامية بامتياز .. تحكي عن فتاة يتيمة عاشت المعاناة حتى دخل حياتها من أرجع النور لها أحبها دللها وعطف عليها قبل أن يفقد حياته في حادثة غريبة غامضة وترجع أرملة تعيش في ظلمة وتفقد الأمل من كل شيء فهل الأمل سيعود لحياتها من جديد؟؟ تابعو القصة لتجدو...
