وهي تاتقرا عينيها خرجو وقلبها بدا يضرب بجهد وتمالكها شعور غريب مافهماتوش ولكن الواضح أنها حسات بفرحة داخلية للعرض ديالو، تعطلات وعاود سيفط ..
عادل : راندا غاتقولي هادا كايدوخ عليا وكيفاش فهاد المدة عجبتو وقرر هادشي ولكن بصح أنا بغيتك وتعلقت بيك لدرجة كبيرة وناوي معاك المعقول
راندا : ولكن ا عادل أنا عاودت ليك اش كاين
عادل : وتانا ماقلت عيب، نتزوجو وأنا كانواعدك مانحرمكش من داكشي لي باغا، غاتخدمي معايا فالشركة وغاتبقاي فيها تاتبغي نتي تحبسي وتقدري تشرطيها فالعقد ماعنديش مشكل المهم ثيقي فيا وتوافقي وتخليني نزوركم، أنا قلتها دابا باش ماضيعيش من يديا ونصدق نادم حيت تعطلت، شنو قلتي؟
راندا : ماعرفتش والله
عادل : غانعطيك وقت تفكري فيه على خاطرك ولكن ماتعطليش عليا ونتمنى ردك يفرحني، وعرفي أنني ماكانتفلاش عليك والله وهادشي غايبان ليك غير من علاقتنا فهاد الشهورا لي ماتجاوزاتش هاد الموقع وعمري طلبت منك نتلاقاك ولا شي حاجة حيت عرفتك مزيان وبغيتك ونويتك حلالي
راندا : واخا غانفكر، مهم تصبح على خير
عادل : نتسنى جوابك .. تباتي فراحة الله
وهاكا سالات المحادثة وقفلات البيسي رجعاتو لبلاصتو وجلسات تاتخمم فكلامو وشنو غاتقرر، ماتنكرش أنها ولفاتو بزاف وجاها ولد الناس ومحتارمها بزاف وهادشي خلاها ترتاح ليه كثر وكثر، دوراتها فراسها مزيان وواجهات العرض ديالو مع كلام خوها ومراتو وفاش تايفكرو ليها، حارت وماعرفات شنو داير وفضلات تصلي صلاة الاستخارة وطلب ربي يخيرها، وداكشي لي دارت صلات ركعتين وقالت الدعاء ورجعات نعسات .. وفالصباح بكري كي عادتها فاقت وأدات فرضها ونزلات للكوزينة وجدات ليهم الفطور وتسناتهم تا فاقو على خاطرهم وحيت كان يوم الأحد وخوها ماتايخدمش صبح ناعس هو ومرتو تا لاشمن وقت عاد فاقو وفطرات معاهم بلا ماتنطق بحرف واحد وتاهوما ماكلموهاش وخلاوها هاكاك ومجمعين غير مع بعضياتهم وفكل مرة مينة تاتحشي ليها الهضرة وتمعني عليها وراندا تاتنهد وتستغفر الله فالداخل ديالها .. نهارها دوزاتو غير فالشقا ها التخمال ها حكان الماعن وها الصابون لي لقات عرام والكثير فيه نقي ولكن مينة بغات ليها تمارة ودارتها ليها، صبنات الحوايج والمانط وساست الصالون وسيقات الدار من سطاحها تا لباب الدار وكملاتها بالغدا تاهو، عيات ولكن ماغاتبينش ليها وماغاتبردهاش خلاتها تاكل راسها وسمها يقتلها .. فالعشية مشات للحمام فركات حالتها ورخات عظيماتها وفاش رجعات كانت التلفازة مشعولة ومجهدة شويا الشيء لي ماخلاهمش يسمعو حسها فاش دخلات وكملو هضرتهم وراندا ماكانش فنيتها تصنت عليهم ولكن اسمها لي سمعاتو جاب ليها الفضول ووقفات لاصقة مع الحيط طالقة وذيناتها ..
مينة : أنا ماغانبقاش هنا، غانمشي لدارنا تما يقابلوني
جاد الله : وختي تبقا بوحدها؟
مينة : ماعندي ماندير ليها ا جاد، شوف ليها شي حل وزايدون يلا طلعو ليا الاوراق أنا وهادشي لي فكرشي غانمشيو
جاد الله : بصح، فف مشكيلة صافي
مينة : نتا لي باغي المشاكل، أما فاش جا داك ولد الخياط هضر فيها عطيها ليه
جاد الله : كانت صغيرة ا مينة
مينة : صغيرة على فم جمل، گراناتها را والدين 10
جاد الله : خليني نفكر فشي حل
مينة : الحل كاين خاصك غير توافق عليه وتخلينا نتهناو، تالاين غانبقاو هازينها؟ خاصنا تاحنا نشوفو مستقبلنا والفرصة جات تالبين يدينا ونضيعوها
جاد الله : شنو الحل؟
مينة : سير عاود هضر مع ولد الخياط من حدو باقي عزري ديال راسو وقوليه راها موافقة وزوجها ليه وبعدها بيع الدار ودير ليها حفلة صغيرة للاشهار والباقي ديه قاد بيه الامور لهيه فاوروبا
جاد الله : لا لا ماجاتش نمشي عندو أنا
مينة : ياك هو طلب فاللول نتا غير غاتبلغو الرد وصافي لاش معكسها لاااش، كون كنتي تسمع ليا كوراك بييخير ومهني ومهنيني تانا معاك، شوف هضرة وحدة تقالت خرجو الاوراق ونتا غادي وانا غانهز راسي وولدي ونمشي لدار با نبقى تما تاتقاد لينا الامور وهي شوف كي دير ليها والفلوس لي خاصينك شوف كي تجيبهم
جاد الله : خليني نفكر
مينة : باز اسيدي والله تا باز، برد منك ماشفتو فحياتي
راندا كاتسمع فيهم ودموعها نازلين يااااه تالهاد الدرجة ماحاملينها ماقابلينها ومثقلة عليهم، جالسين يخططو باش يتهناو منها، لا ومن الفوق باغيين يهديوها لواحد خور، يطيحو بقيمتها، مسحات دموعها ورجعات لعند الباب حلاتو وسداتو بجهد باش ينتابهو ليها، دخلات هازا صطولها لقات عليهم السلام من بعيد وكملات للدوش حطات ماعن الحمام ورجعات لعندهم سولاتهم واش بغاو يتعشاو وجاوبوها بالنفخة .. تعشاو وطلعات لبيتها سدات عليها وبقات كاتمشي وتجي وحاسة بقلبها مزير عليها ..
راندا : هادا هو الحل لي بقا عندي، ياربي تعاوني ياربي
شعلات البيسي ورسلات لعادل رسالة ..
راندا : عادل أنا موافقة، تقدر تجي لدارنا فأي وقت بغيتي
أنت تقرأ
عشق البدر
Romanceقصة درامية بامتياز .. تحكي عن فتاة يتيمة عاشت المعاناة حتى دخل حياتها من أرجع النور لها أحبها دللها وعطف عليها قبل أن يفقد حياته في حادثة غريبة غامضة وترجع أرملة تعيش في ظلمة وتفقد الأمل من كل شيء فهل الأمل سيعود لحياتها من جديد؟؟ تابعو القصة لتجدو...
