عشق البدر

البارت 67

غير سمعات جملتو حسات بالسخفة وسفيان خرج فيها عينيه ..
سفيان : نتي هي؟
غمضات عينيها مزيرة عليهم ولسانها تربط ماقدراتش تجاوبو وسبع دار شافيها وبقات فيه، بالرغم من داكشي لي عاودات إلا انه مازال تايبغيها ويحماق عليها، مد يدو حطها على يديها بجوج وورك عليهم بمعنى أنا معاك ماعندك مناش تخافي مابقيتيش بوحدك كي قبل وهي فهمات رسالتو الغير مباشرة وهزات راسها وعينيها مدمعين شافت فيه هو اللول بنظرة امتنان على وقوفو جنبها وعدم خذلانها ونقلات شوفتها لسفيان لي حس راسو سخن كأنه جالس فوق العافية تايتسناها تنطق وتقول اش كاين وتبرد نارو، طلعات النفس وهبطاتها وبدات تدوي وهو تايتصنت ليها باهتمام كبير وملامحو تايتبدلو مع حديثها، مرة للشفقة ومرة للاشمئزاز من وصفها لديك الفيلا وشنو تايوقع فيها وكيفاش تايتعاملو البنات، ومرة للحزن والألم فاش تفكر خوه ومرة بالافتخار فاش دافع عليها وضحى بروحو على ودها والمرة الأخيرة للغضب فاش عرف شكون ورا هاد الجريمة، غير سالات كلامها وسكتات تاتشهق ودموعها شلال وهو هز يدو للسما وخبطها مع الطبلة تا قفزات من بلاصتها والناس لي تما دارو لجيهتهم تايطلو ورا السارية لي كانت مغطياهم .. ولا حمر وعروقو تنفخو وبدا يسب ويلعن ناسي شكون حداه ..
سفيان : علااااااااااش ماشكيتش فيه علاااااش، علاااش ماقلبتش وراه فاش عرفتو تايدور على مرات خويا علاااااش، كان عليا فاش شفتو سكن فالحومة لي كاينا فيها دارها نشك ديك ساعة ونوض نقلب وراه علاااش كنت دمدوومة ومكلخ ومافهمتش المراااااد ديااااالو .. المجرم القتال لي قتل خويا ويتم بنتو ورمل مرتو قداااام عيينيا وماعرفتوووووش والبلان المقوووود هو تزوج بيييها تزوج بمرات الراجل لي قتل .. كانقسم بالله العلي العظيم تا ندمووووو، غاندمووو على هادشي لي داااار غانتاااااقم لخوووويا غانذوقووو من نفس الكاااااس
وقف تاينهج وعينيه خارجين وتايدور ويسب كي الحمق وتالف ماعارف شنو تايدير ولا تايقول، الغضب عما عينيه وولا تايشوف غير الانتقام وبدر كي الوحش قدامو خاص ينتاقم منو ويرجع حق خوه .. سبع بقا غير تايشوف وساكت وصفاء تاتبكي بخفوت وتشهق خلعها المنظر ديالو والتهديدات لي سمعات وهي كانت بغات غير تعتاذر ولكن طاحت فما لا يحمد عقباه، دابا فاش عاودات وذكرات اسم بدر بنجلون أكيد اتوصل الهضرة لجمال بنجلون وتما اينفذ تهديدو ليها ويقتل ليها مها وخوها ولا يلبسهم شي قضية تغبر ليهم الشقف ولا ينتاقم منها هي نيت، عند هاد النقطة وولات كلها تاترعد وناضت دفعات الكرسي اللور تاطاح ومشات عند سفيان نيشان تحدرات ليه على رجليه عنقاتها تاتبكي وطلب فيه وسبع تصدم مافهم والو وناض ليها تايجر فيها وهي تاتنتر وتدفع فيه ومزيرة على رجل سفيان لي الغضب ماخلاع يشوف والو وماداهاش فيها فقط صورة دبدر ل تاتبان ليه ديك اللحظة وصفاء قربات تموت من الخوف والناس تلمو عليهم والسرباي جا تايجري يشوف اش واقع ..
صفاء : عاااافااااك اسيدي ماتقول وااالو هئهئهئ عافاااك انا ب بيت غير نعتاذر مابيتش هادشي يتفضح اهئهئ يلا سمع بلي حليت فمي ايعذبني ويعذب ليا عااائيييلتي عااافاااااك هئهئ
كثر التوشويش والسرباي تايهضر معاهم باش يخرجو ومايديروش ليه الشوهة فالكافي ويشوشو على الناس، سفيان دفعها بلا مايشعر وخرج طاير من تما وهي بقات تاتحمو على يديها ورجليها تابعاه وسبع تحدر على ركابيه زيرها ونوضها بشويا عنقها تايهدن فيها وهي تاضرب وتنتف فيه وتقمش وتطلب منو يبعد عليها ويطلقها تبع سفيان ..
صفاء : طلاااق مني طلاااق هئهئهئ ماتخليييهش يمشييي ماتخليييهش يفضحنيييي ايعذبووووووووني هىهئ مييييي خوووويااااا ايتقتلهوووووم
سبع : ششش تهدني ماغايوقع والو من هادشي ششش سكتي تاحاجة ماغاتوقع أنا معاك دابا ششش
صفاء : وااااخليييني هئهئ غايبدا بيييك نتاااا اللول نتا ماتاتعرفوووووووش هئهئ راه مافقلبو لا رحمة لا شفقة هىهى حذرنيييي وماسمااااااعتش لييييه هئ ومي قالت ليا ماندير والو وماسمااعتش ليهاااا عئهئ ايقتلهووووما ايقتلوهووم
مابغاتش تسكت من البكا والغوات جاتها هيستيرية والسرباي عيا معاهم يخرجو فحالهم، سبع ناض ونوضها بزز معاه مخرجها من تما وداكشي لي بقا كملاتو فالشارع خلات الغادي والجاي يتفرج ويتساءلو بفضول يحسابهم سبع داير ليها شي حاجة وبغاو يتدخلو وهو قاليهم سمعات خبر موت احد اقرباءها، سمح فموتورو وداها لجردة كانت تما بعيدة على كلشي جلسها وسط الربيع بقات بفردة بلغة والفردة الاخرى بقات فالشارع، قرد قدامها ساد ليها فمها بيد واليد الاخرى مزيرها من گفاها ورجليها زيرهم برجليه بقات تركل ووسطهم يديها ..
سبع : سكتييي خليني ندوي سكتيي درتي لينا الشوووهة علاااش خايفة هااا؟ علاااش؟ انا معاك ماتخافي من والو شكون يكون هاد بدر بنجلون فملك الله تايزرع فيك هاد الخوف كااامل
تايخرج صوتها مكتوم وتاتحرك ليه راسها بمعنى لا ..
سبع : ماغايدير ليك والو سي سفيان عارف شنو يدير، داك المجرم خاصو يتربى سمعتي ونتي غاتشهدي فيه، دابا سكتي واخا
حركات ليه راسها وحيد يديه ..
صفاء : وااا ماشي بدر بنجلووووون مناش خايفة ماااشي هواااا عئهئعى بااااااه اسبع بااااااه جمال بنجلووووون هو سبااااب هادشي هوااااااا ..