عشق البدر

البارت 85

تقدم منو وبدر مانزلش عينيه بقا غير تايشوفيه كيفاش تايمثل ويكذب ويخدع ويغدر وفهاد السن، حاسدو على برودة دمو، أما جمال تصدم فاش شافو قدامو وخاصة ان رجالو ماقالوش ليه جاي بالعكس هضر معاهم وقالو ليه مابقاش خرج من الدار من آخر مرة كان عندو فيها، مابينش ليه وحاول يتقمص الدور ويتقنو، خاذو بالحضن وطبطب عليه وبدر مهبط يديه ماتفاعلش معاه وجمال بعد عليه عاقد حجبانو باستغراب مزيف ..
جمال : مالك اولدي شنو عندك؟ وشنو هاد الحالة وليتي فيها هاا؟
بدر : وكيفاش بيتيني نكون وانا غارق تا لوذنيا!
جمال : دويت معاك وعطيتك حل ووافقتي علاش لحد الان مازال مابديتي الخدمة؟
بدر : الخدمة هي لي خصاتني الواليد فهاد اللحظة، مرتي وولادي غابرين منين غاتجيني الگانة نخدم ونركز، ياك قلتي ليا غاتلقاهم ايوا فينهم
جمال (حنحن) : احم احم مازال تانقلب عليهم وفاش نوصل ليهم غانجيبهم تا لعندك .. اجي اجي معايا للمكتب نذاكرو شويا على الخدمة ونشوفو شنو نديرو
شدو من كتافو معنقو وتمشى بيه للمكتب دخلو وسد وراهم الباب وشد فيه تاجلسو فوق الكرسي ودار هو للكرسي الخاص بيه، جلس وشابك يديه فوق البيرو ..
جمال : توگض معايا اولدي الله يرضي عليك، خدمتك لي غاتنفعك وتهزك ودير ليك شان فهاد المجتمع سمعتي اما العيالات فيهم غير الصداع والمشاكل والخسارة ماموراهم ربح وزايدون ماتنساش راك بدر بنجلون ألف وحدة تاتسنا غير إشارة منك وتجي تاتجري تركع عند رجليك وفين تبان ديك مراتك وكون كانت بصح مهتمة بيك ماكانتش تهرب وتخليك وشووووف فين مشات ومعامن وشنو تادير ونتا هنا تاتحسر موراها وتاتقتل فراسك
بدر سمع كلامو وزير على قبضة يديه وناض بسرعة بحال الملسوع وعينيه ولاو ظلام بالغضب شاف فياه شوفة كون كانت قرطاس كون قتلاتو ..
بدر : شنو تاتقووول نتاااا هااا واااش عااارف راااسك علاااامن تاااادوي .. مرتتييييي هااديك سسمعتييي مرتيييي يعنييي عرضييي وتانعرفهاا مزيااااااااااااااان هي أشرف من الشرف
جمال عرف راسو قفرها معاه وهو زعما بغا يسايس ويجيه غير بالفن بغا يكحلها صدق عاميها، ناض وقف ودار لعندو تقابل معاه ..
جمال (بهدوء) : عذرني اولدي زلة لسان وصافي حالتك ألماتني وخلاتني مانوزنش كلامي، راك ولدي ومانبغيش ليك شي حاجة خايبة ووديك المرا آذااتك وهادشي لي عصبني وخلاني نقول ديك الهضرة بلا شعور سمحليا وتهدن واخا تهدن وجلس وماغانبقاش نجبدها ليك صافي
بدر ماكرهش يقجو تايخرجو عينيه وتنعدم نفسو ويهني البشرية من شرو ولكن فاش تفكر علاش جاي والهدف ديالو استغفر الله فسرو ودعاه يصبرو تايوصل لمبتغاه، مسح على راسو ولحيتو ورجع جلس ثاني وهاد المرة جمال جلس قدامو ..
بدر : آخر مرة الواليد نسمع منك هاد الهضرة آااخر مرة يلا بيتيني نبقا معاك مزيان
جمال : صافي صافي اخر مرة غير تهدن
بدر : مزيان .. مهم جيت عندك دابا باش نقوليك غانبدا الخدمة معاك
جمال : وهادا خبر تايفرح بعدا برااافو عليك ونعم القرار
بدر : احم ولكن عندي واحد الطلب آخور
جمال : آمر وأنا نفذ
بدر : بيت نكمل على مابديتي وندخل معاك فالخدمة لي رفضت شحال هادا، كي تاتشوف الوضعية ديالي تأزمات وخاصني ضروري نربح فأسرع وقت، بيت ولدي فاش يتزاد يلقاني حسن من الأول ويقدر يعيش بيخير
جمال : نتا متأكد اولدي؟ باقي تانعقل فاش عرضت عليك تخدم معايا درتي ليا حالة ووصلات بيك تهددني أنك تفضحني وباش كملتيها استقليتي بحياتك وهجرتي والديك شنو تبدل دابا؟
بدر : ماكانش عندي العقل ديال دابا الواليد، كان يحسابليا بالحلال غانعيش ومانحتاج حد وهانتا شفتي على عينيك كلشي ضاع وضروري خاص نرجعو وهاد الخدمة هي الحل الوحيد لي عندي يلا قبلتي طبعا
جمال : معلوم قابل مادا بيا نلقا ولدي فذراعي ويهز بخدمتي الفوق وبجوجنا الرابحين
بدر : اذن اتافقنا، دابا شرح ليا كلشي باش تانا نفهم
جمال : هي اللولة، كلشي ساهل خاص غير العقل يكون خدام ومركز فقط ..
بدا يعاود ليه ويفسر وبدر مضيق عينيه وتايتصنت وفداخلو حاس بالقرف من جهة الانسان لي قدامو ومدى حقارتو .. وراه كل مايتعلق بالخدمة الحرام والتخلويض كلشي حطو ليه فوق الطبلة وبدر تايسولو باش يزيد يجبد ليه لسانو تا كمل ..
جمال : فهمتي دابا؟
بدر : وي فهمت كلشي الواليد وغانحمر ليك وجهك ماتخافش، احم ياك مازال غاتعاوني نلقا مرتي؟ نتا برجالك ومعارفك أكيد دغيا تلقاهم
جمال : غانعاونك ولكن شنو غادير معاها؟
بدر : حاجة باينا غانتفرقو ولكن قبل غاناخذ ولدي ونعرف منها شكون وصل ليها الهضرة واخا انا متأكد من ديك البنت هي لي دارتها، خلفات باتفاقنا ولكن غانقلب عليها ونلقاها ونربيها على فعلتها غير بلاتي، ندمت لي تساهلت معاها وخليتها تمشي فحالها ديك نهار كان عليا نربيها ونعطيها قرصة عمرها تنساها وفينما دور تفكرني بيها، ياريتك كنتي معايا فديك اللحظة كنتي تعاونني خاصة أنك ماتاترحمش بحال دوك الأشكال عكسي أنا لي تايبقاو فيا ..