كان مكرشخ فوق سريرو، ناعس على كرشو وخاشي وجهو وسط المخذة وإيزار طالع على نصو ومن الفوق لابس مايو ديالو فالابيض، زعزع نومتو الحلوة صوت تيليفون ديالو، حل عينيه بزز خاسر وناوي يتناحس مع هادا لي قطع الحلم ديالو .. ماشافش اسم المتصل غير برك على زر الاستقبال وحطو على وذنيه ..
بدر : ألوووو
راندا : ا احم ألو بدر
سمع صوتها وتوگد، حل عينيه بزربة وناض جالس وحيد تيليفون من وذنيه قابلو مع وجهو تأكد من نمرتها وعاود رجعو وقلبو تايزدح خاصة فاش شاف الساعة قدامو ولقاها نص الليل ..
بدر (بقلق) : راندا! مالك؟ بك شي حاجة هاا؟ شيماء مزيانة؟
راندا : بيخير بيخير ابدر، سمحليا صونيت ليك فهاد الوقت وفيقتك من نعاسك
بدر : لا ماشي مشكل عادي غير خفت تكون واقعة ليكم شي حاجة
سمعاتو وطلقات تنهيدة عمييقة اختارقات سمعو وشككاتو فالامر، أما هي تاتفكر فهاد الانسان لي ظهر فجأة فحياتها واهتم بيها بحال عادل وكثر ودابا تايدوي معاها ونبرتو كلها خوف وقلق، احساس فشكل تملكها بالخصوص فاش سول على بنتها ونطق سميتها، اذن هو مهتم بيهم بجوج كي قاليها وبصح باغيها، بدر شافها صقلات والمكالمة دايزا وفقط صوت أنفاسها لي مسموع ..
بدر : راندا مالك؟
راندا : ماعرفتش، محتاجة ندوي مع شي حد ومالقيت من غيرك، عيشة ماكايناش وماتنعرف حد غيركم نتوما بجوج نقدر نثيق فيه
ماينكرش أنها فرحاتو فاش ذكرات الثقة وخصصاتو هو وعيشة بيها، واخا كاين طرف ثاني ولكن ماشي مهم، المهم عندو أنه موجود فحياتها وعندو بلاصة فيها وهادشي عطاه أمل يزيد يتقرب منها ..
بدر : مرحبا، أنا تانسمعك دوي گولي گاع لي عندك
وكأنه عطاها الضو الاخضر، بدات تهضر وتعاود ليه من الأول، من طفولتها وكيفاش عاشتها ووالديها لي ماتو وخوها لي كبرها وكيفاش تبدل معاها منين تزوج والجحيم لي عيشاتها فيه مراتو، هو كان عارف شي حوايج وزادت تعمقات هي كثر فحوايج خرين ضروه فخاطرو وذبحوه فصدرو .. عرف حجم المعاناة لي عاشتها وكذلك فهم علاش هي بغات عادل وتعلقات بيه وماقدراتش تنساه واخا مات اذن هو رد الجميل، انسان جاها بحال نقطة بيضة وسط ظلام دامس، تألم فاش سمع بكاها وكلماتها تاتقطع وسط شهقاتها ..
راندا : هئهئهئ شنو درت ليه أنا تايتعامل معايا هاكا ويعايرني، واش أنا اختاريت نكون أرملة؟ ياك هادشي مكتاب عليا والله بغاه؟ علاش ياخذها معيورة .. فين عمري تكبرت عليه؟ ياك ديما تانسول فيه ولاخصاتو شي حاجة نسيفطها ليه ونهار جا فرحت بيه ونسيت كل مادوزو عليا وتعاملت معاهم عاااادي؟ شنو درت ياك غير قلت كلمة د الحق دافعت على البنت مسكينة ظلماتها وقلت نتبرا منو هو يعرف يدوي مع مرتو حيت كون تزايدت معاها فالهضرة كنا نوصلو لشي حوايج كبار وهي ماتسواش هئهئهئ عرفتي ابدر بشنو حسيت وهو تايسب ويغوت عليا قدامها وهي جالسة تضحك عليا وتشفى فيا هئهئهئ عرفتي الكلام لي قاليا جرحني بزاااف ابدر بزاااف هئهئهئ كيفاش نقدر نسمح ليه بعد هادشي كيفاش؟ واش بغاني نحقد عليه هئهئهئ هو خويا الوحيد لي بقا ليا وبغا يبعدني عليه هئهئ هو اختار مرتو وفضلها عليا أنا هئهئ
هي تاتبكي وهو تايزير على يديه ويكرز على سنانو ماكرهش يكون حداها، ياخذنها فحضنو ويدفنها فصدرو ويزير عليها ويقوليها هادي بلاصتك، يمسح دمعتها ويواعدها اتكون اللخرة لي تنزل من عينيها، يداوي جرحها ويبريه .. كره خوها ومراتو والظروف لي حكمات عليها تعيش داك العذاب، كره كلشي وحبها هي فقط بووحدها ..
راندا (تاتمسح فدموعها) : صدعتك ياك؟ سمحليا بزاف
بدر : ششش نتي لي سمحي ليا
راندا (باستغراب) : علاش؟
بدر : على كل لحظة بكيتي فيها وأنا ماكنتش معاك، كل موقف خايب وقع ليك وماشديتش بيدك، كل طيحة طحتيها وماعاونتكش تنوضي منها، سمحيليا على الحزن لي حزنتيه وأنا ماكنتش باش نمحيه
راندا : بدر 😢
بدر (قاطعها) : ماتگولي والو اراندا، لي بيتك تعرفيه هو أنا كانبغيك وغانبقا نبغيك وأنا ديما فجنبك وقتما احتاجيتيني اتلقايني وتا حاجة ماتستاهل دمعتك، خوك الخاسر وغايجي الوقت لي يعرف فيه قيمتك ويندم وماينفعوووش وتا مرتو، "إن الله يمهل ولا يهمل"
راندا (بارتياح) : ماغلطتش فاش دويت معاك، شكرا بزاف ابدر
بدر : مابيناتناش، ماديريش فبالك ورخفي على راسك وديها فصحتك ونساي بنادم
راندا : داكشي لي غاندير، انخلي كل واحد يخلصو الله
بدر : وهادي هي الهضرة
راندا : احم بلا مانشدك، تصبح على خير
كان غايسولها على جوابها وفضل يأجلها لمن بعد حيت ماشي الوقت المناسب لهاد الموضوع ..
بدر : بون نوي وتهلاي فراسك وفالصغيورة
قطعات معاه وتنهدات براحة والالم لي كانت حاسا بيه قبيلة تبخر كأنه لم يكن، ابتاسمات برضى وتخشات حدا بنتها معنقاها وعينيها تايلمعو وهاد المرة ماشي بالدموع وانما بالفرحة ..
وبطلنا كذلك حط تيليفونو وحط راسو على مخذتو ومابقاش النعاس جاه منين سمعها تاتعاود بديك الحرقة، غمض عينيه مزير عليهم وفنفسو تايواعدها يوقف معاها ..
وهاكا دازت ليلتهم كل واحد تايخمم فلاخور ..
______________________________
أنت تقرأ
عشق البدر
Romanceقصة درامية بامتياز .. تحكي عن فتاة يتيمة عاشت المعاناة حتى دخل حياتها من أرجع النور لها أحبها دللها وعطف عليها قبل أن يفقد حياته في حادثة غريبة غامضة وترجع أرملة تعيش في ظلمة وتفقد الأمل من كل شيء فهل الأمل سيعود لحياتها من جديد؟؟ تابعو القصة لتجدو...
