عشق البدر

البارت 88

طلع جمال للسيارة السوداء وطلع حداه بدر وعطا إشارة للسائق يتحرك، خرجو من الفيلا تابعينهم رجال بنجلون من اللور وبدر هادئ عكس العواصف لي تاتعصف فالداخل ديالو، جمال نافخ صدرو ورافع نيفو بافتخار أنه نجح ووصل لهدفو وطيح لولدو زنافرو وخلاه يتخلى على أخلاقو ومبادئو لي تايظل مصدع ليه راسو بيهم ودابا هاهو غادي معاه يد فيد باش يدخل للخدمة لي كان رافضها ويعايرو بيها وبوساختها، طول الطريق وبدر غير ساكت وعينيه قدامو ساهي تايفكر فراندا وكلامها ليه وفولادو وفحياتو كي غاتولي بعدما تبصح عليه صفة خريج سجون، عيا يقنع راسو يتراجع على ود ولادو ولكن ماقدرش وضميرو ماخلاهش وبزز عليه يتعاقب وياخذها عبرة لمن بعد، جمال شافو ساكت وجبد معاه الهضرة باش يتلفو الطريق ..
جمال : مالك ساكت؟ ياكما خايف
بدر (باستهزاء) : هه علاش غانخاف؟
جمال : ايوا مانعرف، خليك راجل بحال باك ماتهزو تاحاجة كي الجبل واقف على الصح، تعلم مني ماينفعك
بدر : ماخايفش الواليد غير هادشي جديد عليا خاصني وقت نولفو ونعجبك
جمال : دغيا تولف بالخصوص يلا شفتي الفلوس لي غاتربح منهم غاتولف بزز منك، الناس لي غانتلاقاو معاهم عندهم قيمتهم فالبلاد ويدهم واصلا وماتايبغيوش الجبناء معاهم، يعني كون سبع بحالهم وحمر ليا وجهي كي ولادهم سمعتي
بدر : غير تهنا من هاد الناحية
جمال : ايوا هاكا نبغيك، غاتشكرني من بعد
سكتو ثاني وقطعو طريق طويلة دامت ساعتاين تقريبا تاخرجو من المدينة ووصلو لطريق شبه مهجورة، ودخلو السيارات بين الشجر تايتهزو ويتحطو بفعل الحجر والحفاري لي كاينين البلاصة دايرا بحال شي عروبية غير الخلوات، بدر دور راسو جهة الشرجم وشاف دار كبيرة مبنية وباينا جديدة جات الوسط وداير بيها الشجر وسور كبير والباب الرئيسي ديال الخشب تاتشبه للفيرمة، توقفات اللوطو ونزل السائق تايزرب حل الباب لجمال وبدر هبط بوحدو تايدور فعينيه ويستكشف المكان، بانو ليه تقريا ربعة دياال الرجال واقفين فالباب ببذل سوداء ونظارات نفس اللون فعينيهم ماتاتعرفهم فين تايشوفو وصناطات فوذنيهم وسلاح ديالهم تايبان تحت الحوايج، ماتحركوش من بلاصتهم شويا خرجو رجال خرين من الدار وقربو ليهم فاش عرفو جمال عطاوه التحية وشافو فبدر باستغراب وجمال حرك ليهم راسهم زعما معاه ولكن القوانين هي القوانين قربو ليه باش يقلبوه وحبسهم جمال ..
جمال : حبسو تم، ولدي هادا
غير قاليهم شكون ورجعو باللور تايعتاذرو وتقدمو جوج منهم القدام والبقية اللور وجمال وولدو الوسط داخلين ورجالهم بقاو برا فالسيارات من غير جوج لي دخلو فقط بعدما سلمو سلاحهم، بدر غير تجاوزو الباب الرئيسي وتزير، دخلو للدار لي كانت عصرية وماتحكمش عليها من برا، الداخل ديالها مفرش ومديكوري باحسن الديكورات وكلشي فيها هو هاداك، بقا غير تايشوف وتابع باه فين غادي، تاشافهم هبطو مع شي دروج للتحت لاكاب وهوما تايقربو والظلام تاينتاشر تامابقاو شافو والو وشعلو الرجال المصابيح الجيبية، سمعو أصوات رجال جايين من واحد الاتجاه لي سلكوه تادخلو لواحد الغرفة ولقاو رجال من مختلف الأعمار جالسين على طاولة طويلة وكبيرة تايهضرو ويضحكو، شافو جمال وولدو ووقفو يسلمو عليه وجمال عرفهم على بدر ورحبو بيه وعجبهم المظهر ديالو والهبة لي عطاه الله والشخصية القوية لي واضحة عليه .. جلسو كاملين وبدر جا مقابل لباه فالطاولة حاط يدو فوقها وعاقد حجبانو والبقية تايحنزو فيه خاصة لي من السن ديالو ولاد الاخرين .. تسناو شويا وبداو يهضرو ويتناقشو وحافظين سواريهم وبدر تايسمع ومافاهم والو من هضرتهم من غير أنهم جابو شي سلعة جديدة وبون كاليتي وغاتربحهم الاضعاف دالاضعاف، حس بالاشمئزاز واحتاقر نفسو حيت ولد واحد بحال جمال، والأكثر أنه جلس مع وحدين بداك المستوى همهم الوحيد الفلوس والثراء الفاحش وماهامهمش الضرر لي تايلحقوه بالبلاد وشباب البلاد الضايع مسكين، تايخرجو ليهم على حياتهم ومستقبلهم ويتكرفسو عليهم بلا رحمة ولا شفقة ولكن كما تانعرفو إن الله يمهل ولا يهمل، وكيف تايضررو ولاد الناس غايتضررو تا ولادهم وماشي بعيد يكونو فعلا تايتعطاو داكشي .. هو غير ساكت وهوما تايحاولو يجبدو منو الهضرة ويدخلون فنقاشاتهم وجمال تايجاوب عليه ويبرر انه أول تجربة ليه ومازال ماعارف اسرار الخدمة وشويا بشويا يتعلم وهو اكتفى فقط يبين ليهم نيتو الحسنة وأنه بااغي يخدم معاهم .. شافهم وقفو ووقف تاهو مافاهم والو شويا تحل الباب ودخلو شي رجال هازين شوانط فيديهم حطوهم فوق الطبلة وحلوهم وتحلو عينيه بالصدمة كانو عامرين بالغبرة، بلع ريقو وبقا جامد بلاصتو والبقية تايضحكو وجمال مبتاسم عاجبو الحال وكل شويا يهز عينيه فولدو وتزيد ابتسامتو تكبر، كل واحد هز ميكة تايقلبها فيديه وقطعو وحدة ذاقو منها من غيرو هو لي شدها فيدو ودار راسو ملهي معاها تايقلبها وهوما هاكاك تسمع الضجيج برا وعرف البوليس وصلو وداهمو المكان وصوت القرطاس تايتسمع خلاهم يتفزعو والرعب يدب لقلوبهم ورجليهم فشلو عليهم وبقاو غير تايشوفو فبعضياتهم وجمال خاف وهز عينو فولدو بشك ..