وصل لدارو، جبد سوارت حل الباب دخل وسدو وراه، سمع صوت ضحكاتها هي وبنتها ومشا بشويا تابع مصدر الصوت تا للحمام الخارجي طل عليهم ولقاها تاتدوش لشيماء وجالسة فقنت البانيو شاداها تادير ليها شامبوان لشعرها لابسة بيجامة خفيفة ولاصقة عليها مبينة كريشتها البارزة وشعرها جامعاه بشكل مهمل وجمالها هادئ وابتسامتها تاتحمق، بقا واقف شحال تايتفرج فيهم تا كملات ليها ووقفاتها بشويا داتها تحت رشاشة طلقاتها عليها وشيماء عجباتها فرحانا بيها، بعدما شللات ليها لبساتها بينوارها ودارت ليها فوطة صغيورة برسوم متحركة فراسها ولبساتها بانطوفة وخرجاتها وكي هزات عينيها جهة الباب شهقات بفزع فاش شافتو مربع يديه حاضيهم، حطات يدها على قلبها لي تايضرب بجهد تاضرها ..
راندا : خلعتيني حرام عليك، مالك مادرتي الحس؟ باغي تولدني بلا وقت
وحيت البلاصة لي كان فيها مظلمة شويا من الفوق وجهو ماكانش واضح مزيان تاقرب لعندهم وبان فالضو وكي شافت حالة وجهو والدم لي فالقاميجة خرجات عينيها وطلقات من بنتها وطارت لعندو تاتقلب فيه ..
راندا : هأ ماااالك شنوو وقع لييك هااا؟ شكوون داار فيك هاد الحااالة
بدر : شش ماوقع والو
راندا : كيفاااش ماوقع وااالو! واش شفتي وجهك كي داااير هااا؟ قووليا شنوو دار فيك هااادشي جااوبني ابدر ماتحمقنيش اش وقع ليك؟ واااش تخاصمتي مع شي حد
بدر : احم غير فاش كنت راجع قطع عليا طريق واحد ونزلت ودابزت معاه، ماتخافيش ماشي شي حاجة
راندا : من إيمتا تادااابز هااا؟ من إيبيمتااا؟ شحااال من مرة وصييتك ترد البااال لراااسك وماتدييها فحد واخا يلصق فيك ماتعبرووووش ولا دير فيه يدييك، شووف شنو وقع لييك شووووف ماخممتيش كون كان هاز معاه شي حاجة وضربك بيها هاا (تاتقلب فوجهو) يااربييي تايضروك ياااك؟ شوف دم شحااال خاصنا نمشيو للسبيطار داابا
بدر : ماكاين لاش قلت ليك حاجة بسيطة وماتايضرني واالو غانداويها غير فالدار والسلام، دي البنت لبسيها حوايجها لاتمرض يالاه
تسل منها بصعوبة ومشا لبيتو وهي دات بنتها لبيتها لبسات ليها حوايجها وخلاتها تاتلعب ورجعات طايرا لعندو، منظرو خلعها بزاف وضرها فقلبها، دخلات للبيت وسمعات الحس فالدوش عرفاتو كاين فيه، جبدات ليه حوايجو من الماريو حطاتهن ليه فوق السرير وجلسات تاتسناه تاخرج لاوي فوطة على نصو وتاينشف فشعرو، وقف قدام المرايا تايشوف فوجهو وتايسب سفيان فخاطرو، بدا تايداويه وهي وراه معنقاه حاطا راسها على ظهرو، دار لصقات لبلاصة الجرحات ودار لعندها عنقها وباسها فجبينها ونزل يدو لكرشها ..
بدر : كي دوزتي نهارك؟ صافا
راندا : كي ديما
بدر : عارفك مليتي داكشي علاش قررت نسافرو هاد الشهورا لي باقيين ليك للولادة
راندا : واه! وخدمتك؟
بدر : ماتهزيش همها ناصر يتكلف المهم عندي هوما نتوما، بيت نقضي معاكم وقت طويل وفبلاصة زوينة غاتعجبك
راندا : يخليك لينا احبيبي، لبس عليك بينما وجدت ليك ماتاكل، كنا تانتسناوك
بدر : واخا
راندا : ولكن واعدني عمرك تخاصم مع شي حد واخا؟
بدر : وعد
باستو ومشات للكوزينة وهو تنهد ولبس حوايجو وتبعها ..
-------------------------------------
أنت تقرأ
عشق البدر
Romanceقصة درامية بامتياز .. تحكي عن فتاة يتيمة عاشت المعاناة حتى دخل حياتها من أرجع النور لها أحبها دللها وعطف عليها قبل أن يفقد حياته في حادثة غريبة غامضة وترجع أرملة تعيش في ظلمة وتفقد الأمل من كل شيء فهل الأمل سيعود لحياتها من جديد؟؟ تابعو القصة لتجدو...
