عشق البدر

البارت 45

سمعات الصونيت د الباب ومشات تاتجر فرجليها بزز باش وصلاتو فتحات ليه ودارت عطاتو بظهرها لي تايتنفض وصوت شهقاتها سمعهم، سد الباب وراه وتبعها للصالون حيد صباطو ودخل جلس جنبها فوق السداري وحط يدو على كتفها تايضغط عليه بلطف باش يهدنها، بحركتو زادت تفرگعات وطلعات صوتها كثر وحلات فمها ودموعها شلال، تاتهز وتحط بلاصتها وهو عاقد حجبانو معصب وحالتها زادت على مابيه، منين اتاصلات بيه تاتبكي وبستة وستين كشيفة باش فهم منها الموضوع وناض خرج من خدمتو ورجع لعندها طاير، نزل عينيه ليدها وبانت ليه الورقة مكمشاها وسط كفها، جرها لعندو حاط راسها على صدرو وفمو فشعرها ..
بدر : شش علاش دايرا هاد الحالة دابا هاا؟
راندا (هزات فيه عينيها حمرين بالبكا) : كيفاش علاش دايرا هاد الحالة! واش أنا تانقوليك رفعو عليا دعوى اسقاط الحضانة هئهئهئ بغاو ياخذو ليا بنتي ا بدر هئهئ بنتيييي بغاو يحرموني منها من روووووحي
بدر : غير هضرة وصافي مافجهدهم مايديرو
راندا (سرحات الورقة قدامو) : هااااك شوووف قرااا شنو مكتوووب هنااا قرااااه هئهئهئ بنتييي غايديوها لياااا هئهئهئ هوما حذروني وأنا ركبت دماغي وشديت معاهم الضد هئهئ أنا مامكتابش ليا نعيش مرتاحة وفرحانة هئهئ بغاو ديما يشوفوني تعيسة وبوحدي باش يتهنى بالهم هئهئ (طلعات نفسها ودوات بصوت مرتجف) ب بدر خا خاصنا نتطلقو هئهئ مايمكنش نكمل فهاد زواج ونبني سعادتي على حساب بنتي ابدر
سمعها بشنو نطقات وفلحظة تقلب لونو وعينيه ظلامو، واليد لي كان حاطها على كتفها زاد زيرها كثر وغرس صباعو فلحمها تا تأوهات بألم وماتسوقش ليها، كلمة الطلاق خرجاتو على طوعو وكفراتو ماحسش براسو وهو موقفها بجهد ومقابلها معاه ونفسو كاضرب فوجهها وهي مغمضة عينيها تاتألم من قبضة يدو ..
بدر : عااودي شنو قلتي هااا عاودي ماسمعتش مزيان
راندا : اااه ب بدر طلق مني ضريتيني ااه طلق
بدر (زاد زير كثر) : عاودي الهضرة لي قلتي دابا دوييي
راندا (حلات عينيها بزز شافت فيه تادوي مزيرة على شفايفها) قلت ليك نتفرقو هوما اياخذو ليا بنتي وانا مانقدرش نعيش بلا بيها فهمني عافاك هئهئ
بدر (بالغوات) : وأنا شكووووون يفهمني هاااا شكوووون يفهمني أنااا؟ واااش تاتسطااي عليا ولا شنووو؟ كل مرة نتفرقو نتفرقو نتفرقو لهاااد درجة تاتجيك سااااهلة تنطقييييييها، ملي ماباغاااااش تكملي وتصبري لااااش وافقتي من اللول
راندا (تاتبكي) : وأنااا باااش كنت غانعرف هادشي ايوقععع، باااش غانعرف بلي الغم والحزن ايبقا ملازمني حياااااااتي كاااااااااملهااا هئهئهئ باش عرفتيها نتا ساهلة عليا نطلبها؟ ماحاااااسش بالناااار لي شاااعلة فقلبي وأنا تانقولها ليك هئهئ ماحااااسش بياااا وبشنو تانمر بيه فهاد الفترة من نهار وليت نبغيك وأنا خايفا نخسرك هئهئ خايفا تخليني تانتااااا خايفا تخلىى عليياااااا ونفس الوقت خايفااا نفقد بنتيييي بنتييي ابدر كبدتي حياااتي روووحي طرف منيييي أنا دابا بيييين نااااريييين شكون يحس بيا شكووووووون أنا لي مقهوووورة ومعذبة فهادشي كااااامل أناااا
كادوي وتبكي وتنتر فيديه وهو مازال شادها وكل كلمة نطقاتها دخلات نيشان لقلبو وضراتو، عارفها تايهة ومضغوطة وكل طلب ماهياش واعية بيه ولا ضاربا حسابو لي جا فبالها تاتقولو وأي حاجة عند بالها حل بغات ديرها واخا تكون على حساب علاقتهم بجوج، سعادتهم وحياتهم لي حلمو يعيشوها مع بعضهم وهاد الحلم ايتحقق واخا لي يوقع، صبر وكابر وكذب غير باش يوصل ليها ودابا هي مراتو ومستحيل يخليها واخا لي كان، كايبغيها كايموت عليها كايعشقها صاار مهوووس بيها ومايقدرش يبعد نهااائيا، راندا ديالو وليه وعمرو يتفرق عليها تاتفرقهم الموت، تنهد بعمق تايحاول يبرد راسو باش يقدر يتفاهم معاها، يلا بقا هو معصب وهي منهارة بهاد الشكل ماغايوصلو لتا نتيجة لذلك اختار هو يصبر ..
بدر (شد وجهها بين كفوفو وقربها لوجهو وعينيه فعينيها) : واعدتك اراندا وأنا عند وعدي ثيقي بيا، بنتك اتبقا معاك وتاحد مايحيدها ليك، ماتبقايش تسرعي وهاد الحالة لي دايرا ماتستاهلش سمعتيي، الحضانة من حقك طالما البنت صغيرة ونتي ماأخللتي تا بشرط، تزوجتي من حقك وتاحد ماشغلو فيك والقاضي ماغايجيش ويگلع ليك البنت ويعطيها لجدها، البنت اتربى بيناتنا حنا بجوووج ثيقي بيا والهضرة دالفراق آخر مرة نسمعها منك ونجيك من التالي الفراق لي عمرو يكون، حاجة وحدة لي تقدر تفرق بيني وبينك واهي الموووووت
طبع قبلة على جبينها وخشاها فحضنو معنقها وتايمسح على راسها بيدو وتاهي دورات يدها على ظهرو مزيرا عليه وصوت شهقاتها بدا ينخافض ..
بدر (بهمس) : من أول مرة شفت عينيك عشقتك وحلفت ليا تكوني
بقا معنقها شحال تا تهدنات عاد بعدها عليه شويا وهي مازال حاطا يديها على خصرو ماساخياش من حضنو، الامان لي كاتقلب عليه لقاتو فيه والحب لي محتاجة ليه عطاه ليها وهي ثايقا فيه وعارفاه يقدر يدير أي حاجة باش مايشوفش دموعها ..
بدر : اتبداي تجمعي فحوايجك، انسيفط ليك هدى تعاونك وغانهضر مع لا نعيمة ونقاد معاها حفلة بيناتنا ونعلم خوك تاهو، غدا تكوني فدارك وفاش يسالي هاد الموضوع بصفة نهائية غانعوضك