عشق البدر

البارت 70

عيشة حسات بقلبها غايسكت وهي تاتشوف راندا مصدومة من كلامها وهادشي واضح على ملامحها .. وكملات هضرتها وهي تتدعي الشجاعة ولكن داخليا ضعيفة وبزاف ..
عيشة : اه اراندا كنت مزوجة
راندا : و وعلاش كذبتي عليا هاا؟ علااش ماقلتيهاش ليا من اللول
عيشة : شحال من مرة تانبغي نصارحك ولكن ماتانقدرش ارااندا وخاصة فاش شفتك تعلقتي بيا وانا كذلك ووليتو حاجة كبيرة وثمينة عندي ماكنتش بيت نخسركم والله
راندا : تكسبينا بالكذوب ا عيشة هاا بالكذووووب ونتي عارفاني اعدى حاجة عندي هي يكذب عليا بنااادم ولكن نتي اعيشة علاش خبيتي عليا علاااش هادشي لي مابغاش يتفهم ليااا
عيشة :ماااشي لخاطري اراندا مااشي لخاطري اختي انا كنت غير تانعاون واحد الشخص ونرد ليه الجميل ديالو والله وهادشي كان فبالي باللي غير الخير وصااافي
راندا : بلاتي بلاتي دقة دقة واخا كيفاش رد الجميل والخير مافهمتش!! وشكون هاد الشخص لي كنتي تعاونيه وعلاش؟ وعلاش انا بالضبط هاا
عيشة (بلعات ريقها) : سي ب بدر، كنت نعاونو هو وقاليا هادشي فيه غير الخير وبلي شي دين ديال راجلك اللول الله يرحمو وبغا يرجعو ليه عن طريقكم نتي وبنتك
راندا : ز زعما بيتي تقولي ليا نتي كنتي تعرفي بدر من اللول ياك؟
عيشة : اه اراندا سي بدر هو المدير ديال راجلي ناصر
راندا : ناصر هو راجلك؟؟
عيشة حركات راسها وراندا حلات فمها وهزات راسها للفوق وعاود نزلاتو وبدات دورو والضحكة شداتها ماقادراش تيق هادشي لي تاتسمع وعيشة تفهماتها وبقات فيها بزاف، راندا حسات عقلها ايوقف مابقاتش قادرا تفكر ولا تدور كلام عيشة فراسها مابقات فهمات تا حاجة وعيشة كملات على هضرتها وبغات تطلق ليها كلشي دقة وحدة باش تصدم فمرة ..
عيشة : أنا وناصر كنا تانبغيو بعضياتنا بزاااف ونوينا نتزوجو ولكن عائلاتنا رفضو وسي بدر هو لي تدخل وقدر يقنعهم وتكفل بكل المصاريف لا عرسنا ولا دارنا ولا كلشي وتا من الصالير ديال راجلي زاد ليه فيه باش نقدرو نعيشو بيخير ومايخصنا والو وهادا بحد ذاتو جميل وكان خاصنا نردوه ونهار قالينا بلي بغانا نعاونوه فشي حاجة مهمة وناصر شرح ليا وقاليا نجي نخدم فالفيلا ديال العلمي وأي حاجة وقعات تما نوصلها لسي بدر وخاصة نتي وبنتك نحط عليكم عينيا وداكشي لي درت وكنت نوصل ليه اخباركم أول بأول تاحاجة ماكنت نغفلها تا من الفيديوهات كنت نسجلكم ونرسل ليه، وانا كنت نسولو على سبب اهتمامو بيكم وقاليا راجلك كان ليه عليه شي دين ودابا كايرجعو وهادشي فيه غير الخير وانا فاش سمعت هادشي كملت واخا ماكنتش راضيا على الكذوب خاصة فاش زدت تعرفت عليك وتقربت منك، وفاش خويتي الفيلا قاليا خاص بأي طريقة نتبعك وداكشي لي كان خدمت عندك وعلاقتنا تطورات وولات كثر من الأخوة وهادشي كان يضرني فقلبي بزاف وضميري يأنبني حيت كنت نكذب عليك وكنت نقول نصارحك وكذا والخوف غلبني وفاش حسيت بسي بدر تعلق بيك وولا تايبغيك نصحتو يعاود ليك الحقيقة وتاهو خاف يخسرك وأنا حطيت ليه الكرة عند رجليه هو يتصرف، ويلا كنتي تعقلي نهار مرضت ومرات خوك قالت حاملة وأنا تانعرف شي حد وسمعاتني فعلا كان عندها الحق وصدقت حاملة وماتصوريش فرحتي فاش عرفت واخا كانت ناقصة حيت كاذبة عليك ولكن عذاب وانتظار سنين من زواجي الحمد لله تحقق حلمي وحملت، فراسك لي كان مصبرني ومنسيني هاد الموضوع هو شيماء كنت دايراها بنتي وعزيزة عليا وربي جازانا على صبرنا ونعم علينا بالحمل، تما عرفت ان كلشي غايسالي وناصر مابقاش خلاني نخدم عندك وتانا خفت نتكشف ومشيت فحالي بلا مانودعك ماكانش عندي الوجه ولا الشجاعة نوقف قبالتك، أيام دازت عليا كحلة وعمري شفت نهار زوين فينما نتفكركم تا للنهار لي اتاصلت بيك وقلت ليك غانحضر فنهارك وعندي مانقوليك تما نتي قلتيها لسي بدر وهو جا لعندنا للدار باش يقنعني نسكت وانا ماقبلتش وقلت ليه يهضر هو اللهم تسمعيها منو وماقدرش وانا خذيت قراري باش نعاود ليك ولكن ناصر دار كل مافجهدو باش يمنعني ونجح اراندا ماكانش عارفني شحال كنت نتألم كل مانتفكرك وولدت ودك ساعة خذيت قرار نهائي هو نقلب عليك وهانا لقيتك وهادي هي الحقيقة كلها
راندا سمعات كلشي والصدمة ألجمت لسانها، عقلها تبلوكا وقلبها بدا يضرب بالجهد تاوجعها والسخفة والرعدة كلشي جاها فديك اللحظة وهي تاتسمع هاد الحقيقة المرة ولي غاتقلب حياتها سفاها على علاها، ماتخيلاتش يجي نهار وتسمع فيه حقيقة كذوب بدر عليها، وماشي غير هو وتا عيشة معاه، الشخصين لي عمرها توقعات منهم هادشي ولا كانت تظن أنهم يديرونا بيها ويرجعوها دمدومة ويضحكو عليها كي بغاو وهي لي كانت غادا معاهم بنيتها .. شافت فعيشة نيشان لي كانت تبكي ولكن ماأثراتش فيها بالعكس كانت تشوفيها كذابة منافقة خائنة فقط كيفها كيف الشخص لي مسمي راسو راجلها، وقفات كلها تاترعد ..