كانو مجمعات فالصالون وصفاء كل مرة ترمي سؤال لراندا، هاد الأخيرة لي تعصبات وتاتحاول تبرد احتراما للناس لي جالسة عندهم ودايرين فيها غير خير وهادشي بحد ذاتو فقسها فين كانت وفين ولات والسبب هو قلة عقلها، كانت مرتاحة هي وبنتها بجوج خدامة على راسها واكلين شاربين مكسيين تامالقات مادير وقالت الحب، الله يقطع الحب ومايجي منو على هاد التكرفيسة لي ولات فيها والكذوب لي عاشت فيهم، لي بقا فيها هوما ولادها، اللولة بنتها لي كانت تقول بابا للسيد لي قتل باها الحقيقي وكيفاش غاتشوف فيه من بعد والثاني لي حاملة بيه ولي غايبقا جامعها ببدر طول حياتها، من جهة تاتكرهو وجهة خرى تاتقول هو ماليه ذنب هي المسؤولة .. سعاد شافتها ساهية وبغات تجرها معاهم فالحديث بلا فائدة تقول كلمة جوج وتعاود تسكت وتسها وجاها الفضول تعرف قصتها وتاتسنى غير خوها يجي ويعاود ليها اش كاين والفضول كان باين تا على صفاء ومها .. شيماء جالسة فوق الزربية وشادا مونيكة شراتها ليها سعاد فاش كانت خارجا، وفكل شويا تشوف فراندا وتقوليها بابا وهاد الكلمة بوحدها تاتقتلها مية مرة فاش تاتسمعها منها وماكرهاتش تحذف ليها كل لحظة كانت مع بدر وليها نفس الشيء ..ملات وضرها راسها وتخنقات بغات غير تخرج تشم الهوا وماعرفات راسها فين وخافت تخرج وتلف ولا شي حاجة وماقدراتش تقولهتدا لسعاد تبسل عليها وفالأصل بغات تبقا بوحدها مايكون معاها حد مايدويها حد بغات العزلة ومالقاتهاش .. مافيقها من سهوتها غير صوت الباب ..
سعاد : مايكون غير سبع هادا
ناضت حلات عليهم كان خوها وسفيان بجوج دخلاتهم للصالون، شيماء شافت عمها ووقفات تاتجري عندو وهو تحدر شويا معرض ليها يديه ترمات فحضنو فرحانة ووقف هازها تايدغدغ فيها ..
سفيان : الفنكوشة دعمها لاباس عليك هممم شوفي شنو جبت ليك
جبد ليها علبة دالشوكولا شداتها من عندو وهبطها على رجليها ومشات عند مها ديريكت عطاتها ليها باش تحلها ليها وسفيان سلم عليهم وجلس حداها تايشوفيها كيفاش ولات بين ليلة ونهار وسبع ماهزش فيها عينو جلس جنب ختو حادر راسو وصفاء ناضت ومشات لعندو تخشات فيه وبدات توشوش ليه فوذنو ..
صفاء : هادي مرات عادل شنو جابها لهنا هاا؟ تانشوفها حاملة واش تزوجات ياك؟ وفين راجلها فهمني شنو واقع ااسبع
سبع : ششش سكتي شويا دابا تفهمي كلشي يلا صبرتي
صفاء : هاااهي صابرا
سكتات وبقات تاتحنزز فراندا وسفيان وتضيق عينيها ..
سعاد : ايوا نووض نحط الغدا فاش كلكم تجمعتو
صفاء : نعاونك اختي
مشاو بجوجات للكوزينة حطو الغدا ونممو فيها شويا عاد رجعو، حطو الطاجين ديال الدجاج والفريت والشلايظ والمونادة وبداو ياكلو بعدما عطاتهم صفاء غسلو يديهم .. ماهضرو ماتكلمو تاسالاو الماكلة وتجمعات الطبلة وتحط ديسير عاد حنحن سفيان ..
سفيان : احم راندا اجي معايا واحد شويا بيت ندوي معاك
حركات ليه راسها وناضت معاه تاتهبط فالبيجامة لي تهزات ليها ولي عطاتها ليها سعاد حيت ماجابت ماتلبس، دخلو للبيت فين باتت جلسو مقابلين لبعضياتهم والباب خلاوه محلول، سفيان شابك يديه فوق ركابيه وعينيه عليها ..
سفيان : دابا عاودي ليا شنو وقع، من اللول باش نفهم انا
غير سولها وكانها كانت باغا السبة باش تنفاجر بالبكا وهو حس الموضوع كبر من ماكان يتخيل وزير على سنانو ..
سفيان : ششش راندا دوي اختي معايا وعاودي ليا شنو كاين البكا ماعندو باش ينفعك، قوليا شكاين باش نعرف تانا، شنو دار ليك هاداك هااا؟
راندا (تاتبكي) : ك كان عندكم الحق نتا وبا الحاج هئهئهئ ص صدق ماصالحش ا سفيان .. كذب عليا اسفيان كذب عليا
سفيان : فاش كذب عليك؟
راندا : فشحال من حاجة ومنهم السكنة ديالو فالحومة هاديك ماكانتش صدفة نتا كان عندك الحق هو كان مدبر ليها
سفيان : اييه زيدي
راندا بدات تعاود ليه ابتداء من الرسائل المجهولة لي كانو يجيوها حتى لنهار لي جات عندها عيشة وعاودات ليها الحقيقة انتهاءا بالرسالة اللخرة ولي ثبتات تورط بدر فموت عادل وسفيان تايتصنت ليها عادي لأنه عارف الحقيقة ..
راندا (بحرقة) : واش عرفتي باش حسيت اسفيان فاش عرفت هئهئهئ سيف وتغرس فقلبي عوض المرة عشرة هئهئهى هو غدرني اسفيان غدرني وقبل من هادشي رملني ويتم بنتي علااااش دار فينا هااادشي علااااش؟ هئهئهئ صدقت مزوجة مجرم اسفيان مجرم تخيل عايشا مع مجرم وحاملة منو من الفوق هئهئ اشمن ذنب درت فحياتي تانتعاقب عليه هاكا اااااش هئهئ هو قتل راجلي قتل خووووك اسفيان خوووك
دارت وجهها بين يديها وبقات تبكي بمرارة وجعاتو، تنهد بعمق وناض قرب حداها وحط يدو على كتفها جرها عنقها تايطبطب عليها واخا ماشي من حقو يقرب ليها ولكن الموقف كامل ضرو وحس بيها وبشنو تاتعاني ديك اللحظة وأقسى حاجة يمر بيها الانسان، ماغايلومهاش لأن الذنب ماشي ذنبها هي حبات ووثقات فانسان مايستاهلش ..
سفيان : شش نتي ماعليك والو اراندا، هو لي مايسواش وهو لي خاصو يبكي دم بلاصة دموع، هو لي خاصو يتعذب ماشي نتي
بقات شحال تاتبكي تاتنفسات وبعدات منو بشويا هازا عينيها فيه لي ولا جغمة من الدم ..
راندا : سفيان و واش نتا كنتي عارف هااا؟ كنتي عارف هادشي كامل، حالك تايقول انك كنتي عارف من قبل
سفيان : وي ماشي بزاف باش عرفت، من شحال هادا باش بديت نبحث فهاد القضية حيت كلام البوليس ماقنعنيش وحسيت شي حاجة كاينا فالموضوع وبديت نقلب والدري لي تاتشوفي معايا هو لي تايعاونني تاوصلت لشنو بيت ولقيت ببنجلون هو ورا هادشي ومشيت ليه
راندا : ا اذن ن نتا لي ضربتيه ديك المرة هااا؟ كان جا للدار مضروب وفاش سولتو قاليا مدابزة فالطريق، كان تايكذب ياك؟ نتا لي دابزتي معاه داكشي علاش كان خايف وتايخطط نسافرو تانولد، كان باغي يهرب ويهربني معاه
سفيان : ماعندو فين يهرب من العقاب لا هو لا باه
راندا : كيفاش باه؟ شنو دخل باه
سفيان : هو مول هادشي كامل وبسبابو وقعو شلا حوايج والبنت لي برا تاهي داخلة فهادشي
راندا : مافهمت والو
سفيان : أنا غانفهمك
تاهو سرد عليها الوقائع من الأول ..
راندا (بصدمة) : مامثيقاش هادشي، واش انا فحقيقة ولا حلم هااا؟ واش كابوس وغانفيق منو
سفيان : للأسف هادا الواقع اراندا، بحال بنجلون وولدو كثاااار فهاد البلاد وماكاينش لي يوصلهم
راندا : علاه شكون هوما؟؟ بنادم كيفنا وخاصهم يتعاقبو على لي دارو
سفيان : ضروري هادشي علاش صفاء ومها جبناهم هنا حيت أمان وتانتي غاتبقاي معاهم تايسالي هادشي
راندا : ماقدرتش نميزها بهادشي لي وقع وجهها تنسا عليا ودابا فاش قلتيها ليا عاد تفكرت صورتها لي شفت، وأنا معاكم فلي درتوه اسفيان
سفيان : متأكدة اراندا؟ مابغيتش نضغط عليك ولا شي حاجة
راندا : أنا معاكم ماشي حيت راجلي غانجي عليه، انا مع الحق وهو ظالم وخاصو ينول عقابو
سفيان : وهادي راندا لي تانعرف .. ولكن تايبقا واحد سؤال ضارني فراسي وهو شكون الطرف الثالث لي داخل ولي وصلك ليك الخبار؟ ..
أنت تقرأ
عشق البدر
Romanceقصة درامية بامتياز .. تحكي عن فتاة يتيمة عاشت المعاناة حتى دخل حياتها من أرجع النور لها أحبها دللها وعطف عليها قبل أن يفقد حياته في حادثة غريبة غامضة وترجع أرملة تعيش في ظلمة وتفقد الأمل من كل شيء فهل الأمل سيعود لحياتها من جديد؟؟ تابعو القصة لتجدو...
