عشق البدر

البارت 59

وقف اللوطو قدام الحومة ونزل منها بكامل اناقتو، حل الباب اللور جبد منو ساشيات كبار عامرين وسد بالساروت ودخل مع الدرب وحجبانو معقودين ولي داز من حداه تايرد عليه السلام او تايحييه غير بحركة من راسو، وصل للباب وصونا شويا وفتحات ليه وداد ابتاسم ليها ودخل هو وياها للدار ..
بدر : فينهم؟
وداد : كاينين فالبيت مع هدى، انا نمشي نقوليهم جيتي
دخل للصالون جلس وحط داكشي لي هاز فوق الطبلة وتسناهم تا خرجات نعيمة وراندا سلمو عليه وراندا جلسات حداه ونعيمة شافت الميكات ..
نعيمة : علاش اولدي معذب راسك حشومة حنا بيناك غير نتا
بدر : ماكاين لا عذاب لا والو ا لانعيمة، حاجة بسيطة وصافي وحنا مابيناتناش
نعيمة : لواه اولدي
راندا : خالتي ياك معتابرانا ولادك؟ ايوا هادشي عادي
نعيمة : الله يحفظكم يارب
هزات داكشي داتو للكوزينة وخلاتهم بجوج وراندا قربات حداه تكات راسها على كتفو ويدها شابكاتها مع يدو وهو باسها فجبينها ..
راندا : علاش تعطلتي؟
بدر : غير ولد ناصر كان مريض وعطيتو هاد النهار يديه للسبيطار وداكشي لي كان غايقضيه قضيتو انا بلاصتو
راندا (بقلق) : مالو مسكين؟
بدر : قاليك جاتو السخانة ومانعرف شنو
راندا : اااااه غايكون مسيكين تاينبت السنان، هادشي فايت واقع لشيماء مايخاف عليه والو
حرك ليها راسو وسكت عاقد حجبانو وتايخمم فالهضرة لي قاليه ناصر ..

#فلاش_باك
أمس فالشركة، كانو جالسين بجوج فالمكتب وبدر غادي جاي وناصر واقف تايشوفيه ..
ناصر : كنت حابسها بالحمالة وولدات ودابا العيشة حرراتها علينا بغات تشوف لا راندا بأي طريقة مابقيتش قادر نحبسها كثر وولات تطلب الطلاق وتهددني تفرتك الشمل
بدر : مانعرف مالها فهادشي، ياك قضات شغلها ومشات فحالها صافي تقلب
ناصر : هادشي لي قلت ليها نيت وهي بدات عليا بدوك المبادئ والهضرة الخاوية
بدر : صافي خليها دير لي بات، تشوف فين تلقاها مهم غدا ماتجيش للخدمة سير دي ولدك للطبيب
خرج من عندو ناصر بعدما شكرو وهو جلس فالكرسي ديالو تايفكر فحل، كان غايقوليها شنو كاين وطلعات حاملة وخاف عليها ودابا عاود تزير من جديد تا قال تهنا من ضرسة خرجات الثانية دالعقل

#عودة_للحاضر
فاق من سهوتو على صوت راندا ..
بدر : وي!
راندا : من قبيلة تاندوي معاك فين كنتي ساهي؟ بدر حالك ماعجبنيش من البارح شنو عندك؟
بدر : غير مشاكل الخدمة وصافي ماديريش فبالك، ماعلينا شنو كنتي تاتقولي؟
راندا : احم قلت ليك السيد للي جاي يدوي فهدى تانعرفوه ومزيان
بدر : وااه! وشكون هو؟
راندا : صراحة ماعرفتش واش غايعجبك الحال ولا لا
بدر : علاش؟ هي شي واحد مامفاهمش معاه
راندا : للأسف .. سفيان
بدر (خرج عينيه) : ولد العلمي؟
حركات ليه راسها بالإيجاب عاضة على شفتها السفلى بتوتر وهو بقا شحال تايشوف فيها وفنفس الوقت عقلو خدام .. شافتو ساكت وعينيه مركزين عليها وهي تدوي بصوت مرتجف ..
راندا : ب بدر مالك؟
بدر : تانفكر فهادشي لي تايوقع، بزاف على الصدف ثاني ونتي من إيمتا عارفا؟
راندا : غير شويا هادا باش عرفت كنا تاندويو وتجبدات سيرتو هوما يحسابهم حنا عارفين وسفيان قالها لينا، مافراسهمش شنو واقع بيناتنا فهمتي وتانا ماقلت ليهم والو باش مانأثرش على قرارهم .. شوف بدر عافاك احبيبي تصرف عادي واخا؟ هدى باينا فيها باغاه وفاش سولتها كي دارت عرفاتو وكذا وشنو عاودات ليا تأكدت انه تاهو باغيها تقدر تقول حب من اول نظرة هادشي لي وقع معاهم وطالما ناوي معاها المعقول فمعلينا غير نقولو ليهم الله يكمل بالخير وصافي اوك حياتي؟ خلافاتنا حنا نخليوهم بعاد على حياة هاد الناس
بدر : يحسابك دري صغير أنا قدامك؟ غير حيت عندي معاهم مشكل انستافزهم دابا وفهاد النهار، انا غاندير واجبي والسلام
راندا : يخليك ليا عمري
عنقاتو مزيرا عليه وهو حط يدو على كرشها تايدوز عليها ..
بدر : فين شيماء؟
راندا : راها مخشية مع نور ووداد فالبيت تايلعبو، خليهم ملهيين تايمشيو الناس
يالاه غايجاوبها وهي تبعد منو بزربة وتاترمش بعينيها وحمرة الخجل صبغات حنيكاتها، دار ولقا نعيمة خرجات من الكوزينة وجايا لعندهم جلسات معاهم تايديو ويجيبو فالهضرة وتاتسولهم على سفيان وراندا لي تاتجاوبها بحكم عشرتها معاه شكراتو ليها ومرة مرة تهز عينها فبدر خايفا يغضب عليها ولكن لقاتو ساهي وشدها الفضول تعرف مالو وخلات تاتفوت هاد الليلة وتجلس ليه للأرض ماتفرق معاه تايگر ..
--------------------------------------

واقف وسط الفيلا تايمشي ويجي ويشوف فساعة يدو ويسوط كان لابس شوميز بيضة مع سروال كحل وصباط كحل وفيست نفس اللون فيدو وشعرو مقادو وريحتو منتاشرة فالقنت .. تا سمع خطوات نازلين من الدروج وهز عينو فالحاج والحاجة هابطين مشادين، الحاج بشوميز مخططة وسروال دالتوب وكبوط من الفوق والحاجة بجلابة فالصومو فوقها سلهام على البرد ..
الحاج : ياكما تعطلنا عليك؟
الحاجة : سمح لينا اوليدي
سفيان : ماشي مشكل غير بشويا عليكم(قالها بزز منو 🤣) فين سهيلة؟
الحاجة : ماتقدرش تمشي معانا عندها شي امتحان وجالسا تراجع ليه
سفيان : واخا كنت باغيكم كاملين تكونو معايا ولكن هانيا قرايتها الأهم
خرج سابقهم وهوما وراه تا للسيارة فتح للحاجة لباب اللور طلعات وفتح للحاج الباب القدام ركب ودار هو لبلاصتو وديمارا شاد الطريق لبيت حبيبتو ..

طول الطريق والحاجة والحاج مجمعين وهو غايب تايفكر فحبيبتو لي مابقا والو وتولي ليه يلا مشات الأمور بيخير وعلى خير وواخا يكون العكس ماغايتنازلش عليها واخا لي يوقع .. وصلو ونزلو هاز فيدو بوكي دالورد وشي كارطونات والحاج والحاجة تايشوفو فالحومة بتعجب ..
الحاج : ماشي هنا فين كاينا دار راندا؟
سفيان : احم اه هنا .. البنت لي بيت جارتهم وهي نفسها لي كانت ترد البال لبنت خويا
الحاج : اممم العجب زعما
سفيان : شنو لي عجب فهادشي الواليد؟ المكتاب وفين كاين وصافي
الحاجة : بصح .. المهم البنت تكون مزيانة وتاحاجة خرى ماتهم وطالما نتا اولدي باغيها وعاجباك فمعلينا حنا غير نقومو بالواجب ونبقاو معاك تادير دارك ويلا طول لينا الله فالعمر نشوفو تا ولداتك ان شاء الله
سفيان : الله يبارك فعمركم ويخليكم ليا، بلا بيكم را تاحاجة ماتكون
الحاج : الله يسهل عليك اولدي ويقدم لي فيه الخير
وقفو قدام الدار ودق سفيان وقلبو كذلك تايدق داخل صدرو وكل دقة تاتنادي باسم حبيبتو .. فتحات نعيمة الباب وابتسامة عريضة على وجهها، رحبات بيهم ودخلاتهم للدار ..
نعيمة : مرحبا وألف مرحبا
الحاجة : ترحب بيك الجنة
نعيمة : انا ونتي وجميع المسلمين
حياها سفيان وضحكات فوجههو وهي تاتحنزز فعويناتو الزروق لي تايبريو، قادتهم للصالون فين جالس بدر لي شافهم ووقف احتراما للضيف، أما لاخرين غير جات عينيهم عليه وكحلو بالعما وبداو يشوفو فبعضياتهم بصدمة وبدر ملامحو هاديين وماعليهم تا تعبير، تقدم جهتهم ومد يدو لسفيان هو اللول سلم عليه ولاخور ماعجبوش الحال يلقاه وداز لعند الحاج لي مبهوض عطاه يدو وزير ليه عليها بمعنى رد البال، والحاجة اكتفى انه يحرك ليها راسو ويرجع باللور لبلاصتو طالب منهم يجلسو ..
بدر : مرحبا
نعيمة : راكم عارفين بعضكم وبدر فمقام ولدي وهو لي غاينوب على الزوج ديالي بحكم البعد والظروف ماغايقدرش يحضر ويتكلم معاكم
الحاج : ماشي مشكل تا سي بدر فيه الكفاية
بدر ابتاسم بجنب دليل على استهزاؤو من جملة الحاج، سفيان جلس مقابل ليه وحاس براسو تزير وماحملش الموقف لي محطوط فيه اما الحاجة غير تاتحنزز فبدر وطلع وتهبط فيه وتخسر سيفتها والوحيدة ليهم لي جالسا بنية صافية وبال مرتاح وعقل هادئ هي نعيمة لي بقات غير تاترحب فيهم وصافي وهوما تايضحكو ليها بزز ..