صبح الصباح وكل واحد وجعو مخبي فقلبو .. كانت متكية بلاصتها وعينيها ساهيين فالسقف، الليل كامل مانعساتش وغير تاتبكي وتوجع وتألم فصمت، أول ليلة بعد زواجهم بعيدة عليه، أول ليلة تاتوسد المخذة عوض صدرو، وأول ليلة البرد تايدخل ليها بعدما كان هو مصدر دفئها، كاينا فدار ماكاتعرفش ماليها وتاهوما .. بنتها ناعسة حداها ومخشية فيها وماعارفاش شنو واقع فالدنيا وولدها فكرشها مارصاش من الضريب كأنه حاس بشنو كاين وباش تاتحس مو ديك اللحظة .. تفتح الباب عليهم ودخلات أخت السبع بابتسامة وصبحات عليهم .. راندا سمعاتها وناضت بشويا عليها حاطا يدها على كرشها المقنبلة، جمعات شعرها ورا وذنيها وابتاسمات بحرج وشيماء تاتجبد حداها وتاتستاعد تفيق ..
أخت سبع : صباح النوور كي صبحتو؟ نعستو مزيان؟ ياكما دراتكم الأرض
راندا : لا لا اختي بالعكس نعسنا مرتاحين شكرا وسمحيلينا
أخت سبع : ويييلي ماتقوليش هاكا اختي بالعكس فرحت بيكم والله اتعمرو عليا، نسيت ماقلت ليك أنا سميتي سعاد
راندا : متشرفين اختي سعاد وأنا راندا وبنتي شيماء
سعاد : تبارك الله، الله يخليها ليك ويفك وحايلك على خير، شحال عندك دابا؟
راندا : 8 شهور
سعاد : مازال ليك شهر باذن الله، عرفتي شنو عندك؟
راندا : لا
سعاد : أنا تايبان ليا شي وليد والله أعلم
راندا : لي جاب الله المهم حسن الصورة والفكاكة بيخير
سعاد : بصح
راندا وقفات ونوضات تا بنتها وتحدرات على المانطات لي كانو مفرشين فالأرض باش تطويهم وهي تحيدهم ليها سعاد من يديها وحلفات ماتقيسهم ..
سعاد : حشومة، كرشك لفمك ونزيدوك لهادشي غير ارتاحي مع راسك أصلا تانطوي غير ديال الغطا والاخرين تايبقاو مفرشين بلا مانعاودو نفرشوهم فالليل
وقفات بعيد تاتسناها تطوي شادا بنتها فيدها مزيرة عليها وحاسا بالغربة تما، كاينا فدار ناس ماتاتعرفهمش، توحشات دارها والحرية باش كانت تصرف فيها ودابا ديك الحرية صبحات مقيدة ..
سعاد : هانا ساليت، اجي معايا نوريك الحمام فين كاين
تبعاتها راندا وهي ساكتة، خرجاتها من ديك البيت، كانت الدار متوسطة ماصغيرة ماكبيرة ومصلوحة ولكن مغموقة ضاقت نفسها فيها، داتها للحمام ووراتها كل حاجة فين كاينا وعطاتها فوطة نقية وخلاتها داخلة هي وبنتها ومشات .. راندا قضات حاجتها وطرفات ليها ولبنتها ارتاحت فاش حيدات ليها الكوشة وعلماتها تمشي للمرحاض ومابقات تلقا معاها مشكل .. خرجات من تما وسمعات صوت سعاد وبقات متبعاه تاوقفات قدام واحد الصالون مفرش وشافت جوج عيالات خرين وحدة كبيرة ولاخرى باقا صغيرة .. شافوها وسكتو وسعاد ضحكات ليها وقربات لعندها تاتقدمها ليهم ..
سعاد : هادي راندا البنت لي قلت ليكم جابها السبع وصاحبو البارح، راندا دخلي ماتحشميش الدار دارك اختي تصرفي على طبيعتك، هادي صفاء خطيبة خويا وهادي ماماها لا فاطمة
دخلات سلمات عليهم وجلسات وشيماء لاصقة فيها وتاطل عليهم ماعرفاتهمش شكون وصفاء تاتعيط ليها تجي عندها ومابغاتش .. تحط الفطور وفطرو مجموعين تايهضرو ويضحكو من غيرها هي لي غير ساكتة وساهية قدامها ..
سعاد : راندا شفتك ماكليتي والو اختي؟ ياكما نوجد ليك شي حاجة خرى؟ قولي ليا باش مولفة تفطري ونوجدو ليك راه عادي والله ديريني بحال ختك ماتحشميش
راندا : لا لا هادشي الخير والبركة اختي سعاد غير الشهية لي ماكاينا والله
لا فاطمة : لواه ابنتي خاصك تقوتي لاماكنش عليك كولي غير على قبل داك تيلاد لي فكرشك
بززو عليها تانقبات شويا ورجعات باللور وشيماء شادا رضاعة دالحليب لي صاوبات ليها سعاد .. تصرفو معاها زوين ودارو معاها جميع الحلول باش تأقلم ولو شويا مع الوضع ولكن هي بحال يلا جالسة على الشوك، ناضو هوما يشقاو وبقات غير هي ولافاطمة فالصالون ساكتين واخا تاتحاول لا فاطمة تجبد منها الهضرة ولكن تاتجاوبها على قد السؤال وتسكت تا وقفات عليهم سعاد بجلابتها ..
سعاد : هانا خارجا نجيب شي مقدية، راندا بلا مانقوليك اختي خوذي راحتك، غانتقدا شي حوايج خاصين ونرجع بسلامة عليكم هاد ساعة، صفاء ماتحلو الباب لحد ها ساروت ديتو معايا
صفاء : واخا ختي غير كوني هانية
مشات وبقاو جالسات هوما تاناضت فاطمة تصلي وخلاتهم بجوج وصفاء جاها الفضول تعرفها شكون واخا وجهها ماخافيش عليها وعيات تفكرو ووالو ..
صفاء : قولي ليا فين تعرفتي على سبع؟
راندا : ماتانعرفوش اختي، شفتو غير مع سفيان
صفاء : ااااه وسي سفيان شنو تايجيك؟
راندا : عم بنتي
صفاء سمعاتها وهي تخرج عينيها ودغيا تفكرات فين شافتها وعرفاتها شكون، بقات تنقل نظراتها بينها وبين بنتها وتاتبلع ريقها ..
صفاء : ن نتي هي مرات عادل العلمي الله يرحمو؟
راندا (شافت فيها) : وي نتي تاتعرفي عادل؟
صفاء : ه ها! ا اه ز زعما بيت نقول لا ماتانعرفوش غ غير سمعت بيه و وصافي
راندا : اوك
صفاء : و ولكن شفتك حاملة؟ و واش تزوجتي
راندا (بنفاذ صبر) : وي
راندا بدات تسوط وماارتاحتش لصفاء وجاتها ثقيلة وفضولية بزاف وفيها كثرة الهضرة والأسئلة وهي هادشي ماعجبهاش وماكرهاتش الصقيل راسها من أصلو مفروع
---------------------------------
أنت تقرأ
عشق البدر
Romanceقصة درامية بامتياز .. تحكي عن فتاة يتيمة عاشت المعاناة حتى دخل حياتها من أرجع النور لها أحبها دللها وعطف عليها قبل أن يفقد حياته في حادثة غريبة غامضة وترجع أرملة تعيش في ظلمة وتفقد الأمل من كل شيء فهل الأمل سيعود لحياتها من جديد؟؟ تابعو القصة لتجدو...
