أسبوع قضاتو كولو فالفراش وماتاتنوض غير لابغات دخل للدوش فقط، فششها كثر من القياس ودار بالو عليها وعلى بنتها واهتم بكل حاجة تخصهم ومامخليش ليها مجال تعارض وخدمتو سمح فيها على ودهم وناصر داير كل مافجهدو فالغياب ديالو وفاش تكون حاجة مستعجلة تاتطلب توقيعو كان يجيب ليه الاوراق تا للدار يوقعهم ويمشي فحالو .. كانو يجيوها اتصالات من عند الحاج باش يشوف حفيدتو لي غبرات عليه وتوحشها ولكن قالت ليه انها عيانة وماتقدرش تجيبها ليه وتفهم الوضع وماحكرش وتمنى ليها الشفاء العاجل ومرة مرة يتاصلو يطمنو عليها وماقالتش ليهم خبر حملها مراعاة لمشاعرهم وتفادي اي مشكل من بعد وهي ماعارفاش انهم مايقدرو يديرو والو واخا يعرفوها حاملة حيت بدر حدهم ليهم ..
واليوم فاقت كي عادتها وجاب ليها فطورها وبقات فالسرير حداها بنتها تاتشقلب وهو تايدي ويجيب معاها فالهضرة باش ماتحسش بالملل ..
راندا : ايمتا غانوض خلاص من هاد الفراش عيييت ابدر وضلوعي دروني بالنعاس ومليت من الجلسة واش مابقيتش فيك غاتقوليا الراحة انقوليك هادا راه العذاب لوحدة بحالي مولفة الحركة فففف ايمتا يجيني العفو هااا؟
بدر : انا خايف عليك احبيبة وعلى صحة البيبي نتي سمعتي الطبيب اشنو قال
راندا : قال مانتعبش راسي ماشي نجمد بلاصتي بلا حركة، انا ابدر دوزت هاد المرحلة فشيماء وعندي تجربة وعارفا شنو كاين والله ماعندك مناش تخاف، غير الثقل مانهزوش ومانديرش مجهود كبير واخا النصارى تلقاهم تاينقزو فالتاسع وماواقع ليهم والو غير حنا تانبغيو نعقدو الامور وصافي (شدات فيدو) غانكونو بيخير والله غير تهنا وشوف دابا مخلي خدمتك وشغالك ومقابلني انا والامر مايستحقش هادشي كاااااامل والله غير ارتاح احبيبي من جهتنا وخدم على ولادنا هههه
بدر : ونخدم على ولاد ولادنا ههه
راندا : ان شاء الله ياربي، بون اليوم انا غانوجد الغدا وغاندير ليك واحد الشهيوة اتعجبك اووك؟ باراكا عليك من الكوزينة ههههه
بدر (تسرح حدا شيماء) : نيت عييت منها غير رجعي نتي تفهمي فيها
راندا : ايوا دير هاكا من اللول ماشي (تاتعيبو) راندا جلسي راندا ماتحطي يدك فوالو راندا البيبي راندا انا نطيب راندا انا راندا انا
بدر : سطووب بالعة كاسيطة ولا صافي فهمنا غير لي يدير فيك الخير باقي
راندا : ههه قول تولفني العگز
ناضت من حداه تاضحك وهو متبعها بعينيه تاتمشى بشويا وتلوى بديك البيجامة لي لابسة كانت لاصقة عليها وهاد زواج وافقها كثر فاضت من الفوق ومن التحت، غبرات من قدامو ودار متكي على جنبو لعند شيماء تايعنكشها كي موالف معاها وهي تاترمى عليه تبغي تغضو وتنتفو من شعرو وهو تايضحك عاجبو الحال .. شويا وهو يسمع تيليفون راندا تايصوني وتقلب على ظهرو مطول يديه للكومودينو هزو وشاف المتصل بانت ليه سمية هدى فالشاشة وتگعد تايعيط لراندا لي سمعاتو ورجعات للبيت تاتسمع فالرنين ..
راندا : شكون؟
بدر : هدى
شداتو من عندو وجاوباتها ..
راندا : هدهد لاباس عليك؟ وكيف دارا خالتي والبنات بيخير؟
هدى : كلشي بيخير الحمد لله اختي راندا ونتي لاباس عليك؟ وخويا بدر والفنيكيشة
راندا : لاباس يسول فيك الخير ازين
هدى : ختي راندا كنت بيت نقوليك هاد السبت يلا كنتو مساليين بيتكم تحضرو معايا
راندا : فاش احبيبا؟ نساليو على قبلك علاه شحال عندنا من هدى
هدى : الله يكبر بيكم اختي، احم صراحة هاد السبت جاي واحد السيد يدوي فيا وبيتكم تحضرو معايا حيت راك عارفا كاينا غير انا وماما وخواتاتي تا بابا مايقدرش يحضر تا يلا كمل الله وداز كلشي بيخير ويجي فالعرس
راندا (بفرحة) : بالفرحاااااااات عليا احبيبا نحضر، الله يكمل عليك بالخير اختي ويسهل عليك يااااااربي ويفرحك حيت تستاااهلي
هدى : ربي يخليك اراندا شكرا بزاااف
راندا : ماكاين لاش تشكريني راكي ختي ووقفتو معايا وغاوقف معاكم ضرووووووري غير عولي ع الله وعلينا ازين
هدى : الله يحفظك ويخلي ليك بنيتك
راندا : آمين ازين
كملات معاها الهضرة وقطعات وهي فرحانة ..
بدر : شنو كاين؟ شفتك فرحانة
راندا : هدى جايين فيها الخطاب
بدر : مزيان بنت ظريفة ومؤدبة تستاهل كل خير
راندا : بصح وبغاتنا نكونو حاضرين ونتا تنوب على الأب ديالها
بدر : شرف ليا
راندا : ربي مايحرمنيش منك
قربات عندو عنقاتو وباستو ورجعات لكوزينتها وجدات الغدا تغداو بثلاثة وخرجهم بدر يتنزهو ويدوزو النهار برا تحت طلب راندا وخاصة انه غايبدا خدمتو ثاني من الغد ومع الغياب ديالو اكيد غايلقا الخدمة تراكمات عليه ومايساليش يخرجهم .. واستاغلات راندا هاد الظرف وطلباتو يخليها تبقا تظل عند نعيمة وبناتها ومنها تعاونهم فداكشي لي غايخصهم لنهار السبت وهو وافق حيت تايكن معزة كبيرة لدوك الناس وتاهو باغي يساعدهم ويهز بهدى ويطبق معنى الاخوة لي كان قاليها من قبل وهادشي زاد علاه كثر وكثر فعينين راندا الفخورة بيه ولي كل مرة تكتاشف فيه حاجة جديدو تزيد تعلقها فيه وتحببها ليه كثر وتحمد الله عليه لانه اعظم نعمة فحياتها ..
----------------------------
أنت تقرأ
عشق البدر
Romanceقصة درامية بامتياز .. تحكي عن فتاة يتيمة عاشت المعاناة حتى دخل حياتها من أرجع النور لها أحبها دللها وعطف عليها قبل أن يفقد حياته في حادثة غريبة غامضة وترجع أرملة تعيش في ظلمة وتفقد الأمل من كل شيء فهل الأمل سيعود لحياتها من جديد؟؟ تابعو القصة لتجدو...
