ناضت تاتعگز وتجبد فيدها ورجليها وتأوه وبنتها حداها هازا رجيلاتها فسما وشاداهم بيديها تاتلعب بيهم وتلاغي .. دارت لجنبها وباستها وضرباتها ليها بعضة فحنيكاتها المطيبزين، عنقاتها وتمخشات فيها تاتشم ريحتها وتنهد وقلبها طاير فالسما ..
راندا : صباح الخير لاحلى بنوووتة، اليوم عندنا بزاف مايدار وغاتعاوني ماماك ياك؟ هههه ياختي ياختي على الفنون ياختي نحماق عليك أنا موااااح
طيباتها بالبوسان وناضت هازاها دخلو للدوش طرفو حالتها وغسلات وجهها وخرجات جمعات شعرها ونزلو للكوزينة صاوبات الفطور وفطرات هي وبنتها .. وفاش سالات هزات تيليفونها وصونات لهدى ..
راندا : ألو هدى لاباس؟ عافاك اختي بيت نطلبك شوفي ليا مع خالتي نعيمة يلا تاتعرف شي طباخة بيتها ضروري تصاوب ليا شي لعيبات هاد النهار
هدى : غانسولها ليك اختي راندا ونرد عليك
راندا : هانا تانتسناك ماتعطليش عليا الله يستر عليك
هدى : واخا
قطعات معاها وحطاتها فالمشاية وشمرات على ذراعها ودارت بالدار، خملاتها ورتباتها مزيان رجعاتها تشعل وفكل شويا طل على بنتها تشوفها واش مزيان وتحيد من قدامها الديكورات لاتجرهم عليها حيت ولات مشطونة بسلامتها .. وتعاود ترجع لشغلها .. الصباح كولو مشا ليها غير فالروينة وفالهضرة مع هدى ولا نعيمة لي شافت ليها طباخة وقالت ليها الطلبية ديالها وحيت نعيمة تاتعرفها دغيا وافقات تصاوب ليها على ضمانتها وعلماتهم تاهوما باش يحضرو معاها وشحال فرحو ليها ولانعيمة شبعاتها زغاريد فالتيليفون حيت خدامة مسكينة وماترجع تا العشية ولكن وصات بنتها تشوف راندا يلا خصاتها شي حاجة وتعاونها فيها .. وفاش سالات روينتها لبسات جلابتها وهزات بنتها وخرجات للمخبزة تقدات الحلوى والخبز ولي خاصها ودازت للحانوت شرات المونادا وفطريق الرجعة تلاقات بهدى غاديا عندها، هزات معاها عاوناتها ودخلو بجوج للدار، حطو التقدية فالكوزينة والبنات جلسوهم فالصالون مع وداد تايلعبو ومشاو لشغلهم ..
هدى : راندا دخلي نتي للدوش دوري بحالتك وأنا نمشي للكوزينة نقاد لي عرفت والباقي تاتجي ماما هي ديرو راه قالت ليا اتجي بكري هاد النهار
راندا : واخا حبيبتي لهلا يخطيكم عليا وخلاص
هدى : راكي ختي يا الهبيلة وفرحتي كبيرة بيك هاد النهار الله يكمل عليك بالخير ياااربي ويسعدك، تستاهلي والله
راندا : ربي يخليك ازين والعقبة عندك ان شاء الله
هدى : آمين يالاه سيري والبنات راه تايلعبو
راندا : اوك
طلعات راندا للدوش وهدى جلسات فالكوزينة ..
----------------------------------------
وعند بطلنا لي جالس فقهوة مع جاد الله، بعدما خرجو من الدار بزز منو فاش سمعو قال "راجل ختك"يحسابو بصح تزوجات بيه بلا خبارو هو، ساعا بدر شرح ليه اش كاين ..
جاد الله : واقولها اصاحبي من اللول، طيحتي فينا النص
بدر : باش تعلمو كيفاش تدويو مع لي دق بابكم .. خلينا فالمهم أنا باغي ختك وتاهي موافقة
جاد الله : اممم وهي ماتاتشاور مع حد، منها لراسها هاكا زعما
بدر : ماشي صغيورة لي غاتشاور معاك ولا مع غيرك، هي غاتعرف شنو بغات ومصلاحتها فين والسلام
جاد الله : ايوا يلا كان هاكا اش بيتوني أنا؟ ديرو لي عجبكم
بدر : معلوم انديرو لي عجبنا ولكن قلنا نديرو معاك صواب ساعا باليا غير ضيعت وقتي ع الخوا
جاد الله : قويصح مع راسك
بدر : دابا الأخ من اللخر واش غاتحضر ولا لا؟ سربيني حيت عندي بزاف مانقضي ماغانبقاش معاك نهار كامل
جاد الله تصدم من الطريقة باش تايدوي معاه بدر وكيفاش منين جلسو وهو نازل عليه بالقميع، حس بديك الجبهة لي كانت عندو تهرسات قدامو وتا الكلام مابقاش تايخرج من فمو هو هاداك، شخصية بدر قضات عليه وسالات ليه ستة لاروب لي فيه ..
جاد الله (حنحن) : يدير الله خير
بدر (وقف) : اوك
حط الخلاص فوق الطبلة وخرج فحالو داير تيليفون فوذنيه تايدوي مع والديه تايعلمهم بالساعة وفين يجيو وتاهوما تصدمو بهاد الزربة لي فولدهم وكيفاش خلاهم تا للساعة بساعتها عاد اتاصل بيهم ولكن ماعندهم خيار حيت بيهم ولا بلا بيهم غايدير غير لي فراسو اللهم يتبعوه ويشوفوه فين غايوصل .. قطع معاهم وشدها نيشان لدارو باش يوجد راسو ويعاود يخرج يتقدا لي غايخصو واخا ماعندوش تجربة وماعارف اش يدي ولكن لي عندو فمو مايتلف ولي سول غايجاوبو ..
أما جاد الله رجع لدارو ولقا مينة واقفا ليه فالباب كي دخل لبقاتو ونزلات عليه بالاسئلة وهو تايجاوب وماخفاش عليه الغل لي بان فعينيها وكلامها والحقد والكره ..
مينة : وا شوف رويندا تاهي ماساهلة، مانعرف فين دبرات عليه وكيفاش دارت ليه تا طاح عمى فيها وبيني وبينك باينا فيه من الناس الهاي
جاد الله : تانا لاحظتها داكشي علاش منفخ
مينة : انا بعدا نموت ونعرف هادشي كيفاش داير عندهم
جاد الله : يدبرو لراسهم، مهم غانمشيو هاد النهار نديرو الواجب والله يعاونها معاه
مينة : وناوي تمشي نيت؟ باااز ليك والله ماعندك گلب، دار لي جرات عليك منها باغي ترجع ليها
جاد الله : حشومة السيد قلب علينا وجا تا لعندنا ومانمشيوش
مينة : ومالها ماتجي هي نيت وتطلبك وترغبك ولا مامسوقاش ودايرا فيها عزة نفسي مابتسمحلي وگوداتو هو بلاصتها، أنا كون ساعفتيني ماتمشيش وخليها تحشم قدام أهلو وتشوف فين دير وجهها باش يضحكو عليها نيييت
أنت تقرأ
عشق البدر
Romanceقصة درامية بامتياز .. تحكي عن فتاة يتيمة عاشت المعاناة حتى دخل حياتها من أرجع النور لها أحبها دللها وعطف عليها قبل أن يفقد حياته في حادثة غريبة غامضة وترجع أرملة تعيش في ظلمة وتفقد الأمل من كل شيء فهل الأمل سيعود لحياتها من جديد؟؟ تابعو القصة لتجدو...
