عشق البدر

البارت 77

وقف سيارتو قدام الريسطو فين ناويين يتغداو، هبطو بجوج ودار لعندها شد فيدها ودخل هو وياها، كان مطعم زوين وهادئ ومافيهش ناس بزاف، خداو طبلة بعيدة شويا على الناس باش تاخذ راحتها وتطلق معاه وحيت ولا حافظها مزيان وبغاها تولف داك الجو شويا بشويا، جر ليها الكرسي جلسات حشمانة وشكراتو بخفوت وهو جلس مقابل ليها مبتاسم فوجهها ..
سفيان : وأخيرا لقينا وقت نخرجو فيه
هدى : بصح تانتا وليتي مؤخرا مشغول وتا التيليفون مابقيناش ندويو بزاف
سفيان : واييه غير عذريني احبيبا، راه غارق تا لوذنيا وماتانلقاش وقت نحك فيه راسي
هدى : الله يسهل عليك ويعاونك
سفيان : آمين ياربي وراه توحشتك
حدرات عينيها وحنيكاتها تزنگو وبدات تلعب بيديها، شافهم ومد يده شد فيهم ..
سفيان : ايمتا نتجمعو تحت سقف واحد، ماكرهتش نولي نعس ونفيق على وجهك احياتي، محتاج ليك بزاااف معااايا وفجنبي
هدى : ا احم مابقا والو غير الصبر
سفيان (تنهد) : وهااانا صااابر الالة تانشوفو
وقف عليهم السرباي وخداو شنو بغاو، رجعو تايدويو عادي ويسولها على خدمتها وهي كذلك تا تحط ليهم الغدا وسماو الله وبداو ياكلو ونفس الوقت تايدويو ومرة مرة سفيان يرميها ليه كلمة تخلي وجهها يجيب ألوان وهو عاجبو الحال ومستمتع بمنظرها ..
هدى : ماقلتش ليك، بدر جا عندنا هاد الايام تاقرب الفجر وواحد الحالة مانقوليكش مسكيين
سفيان : احم وعلاش؟
هدى : تايقلب على مراتو، يمكن وقع بيناتهم مشكل وخرجات من الدار خلانا مشوشين صراحة
سفيان : امممم
هدى : والله تابقا فيا بزاف ومابيتش ليه ديك الحالة، علاقتهم كانت زوينة بزاااااف الحب والاحترام وكذا شي عين وصابتهم
سفيان : ايييوا شوف اشمن زبلة دار
هدى : باااينا سوء تفاهم، هو تايبغيها بزااااف وعمرو دار شي حاجة قلقاتها ولكن هاد المرة ماعرفتش صراحة شنو كاين ضرني قلبي عليهم
سفيان : علاش غايضرك قلبك عليهم الله يهديك
هدى : بدر تانعتابرو خويا وتا راندا كذلك ولاو من العائلة وضروري يبقا فيا الحال من جهتهم
سفيان (باستهزاء) : خوك هه
هدى : وي خويا علاش تاضحك؟ عارفاك ماتاتحملوش ولكن كون عرفتيه مزيان اتغير نظرتك عليه
سفيان : علاه نتي بسلامة عارفاه مزياان؟ مايغركش المنظر ابنتي وهادا لي جالس قدامك أكثر واحد عارفو شنو كايسوى داك بنادم، ماشي دار معاكم واحد المرة زوين خاصو يبقا عزيز، لو تعرفيه شنو داير والكوارث لي تسبب فيها ماتشوفي فيه تا شوفة
هدى (باستغراب) : مالو شنو دار؟
سفيان : بصح باغا تعرفي؟
هدى : وي قوليا شنو كاين، وعلاش حاقد عليه
سفيان : هاداك الالة هو لي قتل خووويا عااادل
هدى (بصدمة) : شنووو
سفيان : كي سمعتي، داك لي كاتقولي عليه خوك قتااال
هدى : و واش نتا عارف شنو تاتقول ولا لا
سفيان : بيانسيغ عارف ومتأكد من الفوق، هو لي قتل خويا ومراتو عرفات الحقيقة وهربات منو
هدى (تاتحرك راسها) : لا لا مستحيل، مايمكنش
سفيان : علاش مستحيل؟ مالو ملاك نازل من السما ولا
هدى : أنا تانعرفو مايمكنش يآذي شي حد اسفيان، هاداك راه بدر سمعتي بدر لي عمري شفت عليه شي حاجة خايبة ولا تصرف شي تصرف سيئ بالعكس والمدة لي عرفتو فيها كافية تبين ليا شحال هو انسان طيب وبريء
سفيان (تعصب) : وعلاش متيقنة لهاد درجة هااا؟ شنو بينك وبينو لي يخليك ماثيقيش كلامي انا لي راجلك وتجي من جهتو هو هااا من الصباح ونتي تشكري فيه شنوو بيناااتكم ولااا ياكما حب قديم وأنا ماعارفش
حد هنا وهدى رمات وراها خجلها وسكوتها وحياءها ووقفات دافعة الكرسي اللور ومخرجة فيه عينيها ووجهها تحقن وولا تايباليها بحال شي شيطان قدامها فاش شك فيها وفأخلاقها وتاهمها بحاجة ماكايناش ..
هدى : كيفااااااش تجرأ تدوي معايااا هاكااا هااا؟ كيفااااااش تقووليا هاد الهضرة دوييي
شافها تاتغوت والناس لي فالمطهم بداو يتفرجو مارضاش وناض تاهو قرب ليها وشدها من ذراعها مزير عليها ..
سفيان : خفضي صوووووتك ولا مايعجبك حال
هدى (بالغوات) : ولاااا مابغيييتش هااا؟ ولا مااابغيييتش نخفضووو شنووو غااادييير
سفيان (من بين سنانو) : هدىىى
هدى : ماتنطقش سميتي بفمك ماتنطقهاااااش مايشرفنيش واحد بحااالك يقووول سميتي، طحتي من عيني بزااااااااف اسفياااان وندمتيني على النهاااار لي عرفته فيه وقبلت نرتابط بيك، وصلات بيك تشك فيا وتتاهمني بالسوووء؟ لهاد درجة ماواثقش فيااا وعلاااش اسيدي تزوجتيني علاااش؟ شوووف لي نطولوه نقصرووووه ماتبقا تعرفني ولا نعرفك وبراتي توصلني سمعتي توصلنيييي ولا نتا لي مايعجبك حاااال وداك السيد لي جالس تطيح عليه البااااااطل هو لي غااايوقفك عند حدددك
نترات ذراعها منو وهزات صاكها وخرجات من المطعم خلاتو مصعوق من كلامها لي رماتو فوجهو، ماوعا على راسو تاكانت شدات طاكسي ورجعات لدارهم وهو خلص الغدا لي ماكملوهش وخرج تاهو ركب فسيارتو معصب وجبد تيليفونو تايصوني ليها وهي تاتقطع عليه تا بلوكات نمرتو وخلات العلبة الصوتية تاتشدووفاللخر شد الطريق لدارهم ظنا منو أنها رجعات ليها ولكن عند هدى كان العكس غير طلعات للطاكسي وملات عليه العنوان فين ساكن بدر ..

لي اتاصلات بيه وماجاوبهاش المرة اللولة والثانية شدها وهضرات وصوتها تايرجف ودموعها نازلين ..
هدى : ألو بدر فين كاين؟
بدر : فالدار، علاش؟ مال صوتك هاكا
هدى : هانا جايا عندك وتعرف
قطعات قبل مايجاوبها ودارت يدها على فمها كاتمة صوتها، تاتبكي وتشهق وهضرة سفيان تاطلع وتنزل وتحرقها عمرها توقعات يجي نهار ويقوليها بحال هاكاك، فلحظة كرها فكلشي تا فراسها لي قبلات تهان هاكاك ومنو هو بالتحديد لي ظنات انه غايصونها ويحافظ على كرامتها وصدق هو الاول معايرها .. وقف الطاكسي قدام الإقامة، خلصاتو وهبطات وغير هزات عينيها لقات بدر قدامها خاشي يدو عاقد سبعطاش فربعطاش، مسحات دموعها وقربات ليه وكلها تاترعد وتنخصص زادت خلعاتو كثر ..
بدر : هدى ماالك؟ دوييي معايا ماالك شنو وقع ليك وعلاش تاتبكي هااا؟ دار ليك شي حد شي حااااجة؟
هدى : هئهئهئ مالقيت حد من غيرك نشكي عليه اخويا تا ماما ماقديتش ندخل عليها بهاد الحالة وتزيد تكمل عليا هئهئ
بدر : اجي اجي
شدها عنقها تايطبطب عليها وطلعها معاه للدار، دخلو بجوج سد الباب ودار جهة الكوزينة طل ولقا المرا لي جاب ناصر جالسا تغسل فالماعن وعيط ليها تجيب كاس ديال الما، داها للصالة جلسها وهي مازال تاتبكي، جلس جنبها ومد ليها علبة المناديل هزات منها تاتمسح فدموعها ويديها تايرجفو، جابت ليها المرا الما وهي حادرا راسها ماهزاتو فيهم غير حطاتو فوق الطبلة ورجعات لشغلها نيشان .. تسناها تا شربات وتهدنات شويا عاد قرر يدير معاها تحقيق يعرف شنو بيها وشنو وصلها لهاد الحالة لي أول مرة يشوفها عليها ..
بدر : يالاه دوي مالك؟ واش مع راجلك
هدى (حركات راسها) : ق قاليا شي هضرة اليوم ضراتني بزاااف اخويا
بدر : شنو قاليك؟ نتي عاودي وخليني مني ليه
هدى : أول حاجة غانسولك وتجاوبني بصراحة اخويا، ماديرهاش مني قلة صواب ولا أنني شكيت فيك، بالعكس انا ثايقا فيك بزاااف وعارفك ماديرهاااش
فهم شنو قصدات من كلامها وعرف ان سفيان قاليها كلشي وهادا سباب الخصام بيناتهم خاصة انه عارف معزتو عند هدى ومايمكنش تقبل عليه كلمة خايبا ..
بدر : نتي ثايقا فيا ياك؟
هدى : كثر ماتخيل راك خويا لي ماولداتوش ليا مي
بدر : وتانتي كذلك اهدى، مهم لي نقدر نقوليك دابا ان الكلام لي وصل سفيان نصو كذوب وهو براسو مازال ماعارف الحقيقة كما هي، ثيق فالبلاصة حيت هو فالأصل ماعندوش معايا فهمتي
هدى : اذن نتا بصح عندك علاقة بالحادث لي وقع لخوه؟ ماتفهمنيش غلط اخويا زعما بيت نقول غير تورطتي فيه وصافي ماشي نتا لي دايرها وهادشي لي خاصمك مع راندا ياك؟ سفيان قاليا ان راندا عرفات الحقيقة وهربات منك
تحلو عينيها بالدهشة فاش سمع هادشي بحال يلا صفعاتو ..
بدر : وهو باش عرف؟
هدى (بحرج) : احم سمحليا اخويا غير كنا تاندويو وقلت ليه على داك نهار فاش جيتي تاتقلب عليها عندنا وهو قاليا هادشي
بدر ضرب راسو بجهد تايلعن فخاطرو كيفاش ماطاحش ليه هو فبالو لي غايكون هربها، هدى مافهمات والو وهي تاتشوفيه ..
هدى : شنو كاين اخويا؟
بدر (وقف) : والو والو غير خاصني نخرج ضروري اختي سمحيليا شوفي جلسي شحال مابغيتي ياااك ورا المرا لهيه لاحتاجيتي شي حاجة أنا مشيت
خرج بزربة تايلبس فمونطوه وهي متبعاه باستغراب .. نزل بزربة من دروج وتيليفونو فوذنو تايهضر مع ناصر ..