عشق البدر

البارت 83

فاقت من نعاسها وحاسا براسها غايتفرق عليها بالصداع، دورات عينيها فالبيت مالقات حد وتشطنات على بنتها، وناضت بشويا عليها صاوبات حوايجها وخرجات من البيت تاتقلب عليهم مالقاتهمش الفوق ونزلات للتحت، درجة بدرجة تاوقفات الوسط يديها على جنابها، طلات فواحد دخلة وسمعات الحس تما ومشات جهتهم تادخلات فالكوزينة وبانو ليها معلقين فواحد الشريجم تايطلو منو ويندبو، وشيماء معلقة ليهم فرجليهم بغات تشوف تاهي وتعجبات من منظرهم وفاش تايتفرجو وهي تقرب ليهم بشويا وغوتات تاقفزو ورجعو باللور كانو غايتكربعو حاطين يديهم على صدرهم ..
أم صفاء : الله يا بنيتي الله كنتي غاتسكتي ليا قلبي، داكشي لي مادارش راجلك ديريه نتي
سعاد : نااااري اصاحبتي ديري الحس راك طيرتيها منا
راندا : ااوااه كااع هااكا كنتو مركزين مع داكشي لي تاتشوفو وماحسيتوش بيا فاش دخلت، اجيو فاش تاتفرجو هممم؟
صفاء : سبع وسفيان جاو ودابا كاينين مع راجلك برا وباينا نايضا بيناتهم وهنا ماتايسمعش
عقدات حجبانها باستنكار، ودفعاتهم من قدامهم تعلقات تا شافتهم وخرجات من الكوزينة وهوما تابعينها تايعيطو ليها ونخلاتهم، ماوقفات تا لقدام الرجال برا مخسرة سيفتها، سفيان شافها وحنحن وبدر عرفها وراه وماتقلبش ..
سفيان : راندا بيخير؟
راندا : غانكون بيخير يلا مشيت من هناااا، سفيان انا ثقت فيك غير نتا بوحدك داكشي باش لجأت ليك ماتخونش ثقتي عافاك
سفيان : واش خنتك انا دابا؟ راجلك لي دار معانا فعايل العصابات وتبعني تاعرفكم فين كاينين وقرقب عليكم جابكم هنا بلا ماتعرفو تاحاجة
بدر (ضاغط على سنانو) : راه قلت ليك علاش درت هاكا، كون طلبت منك توريني فين كاينين كنتي غاتقبل هااا؟
سفيان : بطبيعة الحال لا
بدر : داكشي باش تصرفت هاكا وكون ماجيت فالوقت المناسب كان جمال وصل ليهم قبل ودك ساع مانعرفوهم فين مشاو، مراتي ماغايآذيهمش ولكن العيالات الاخرين ماغايفلتوش من يديه بالخصوص البنت لي عندو معاها مشكل ايوا خدم عقلك وبدا تفكر، ماتبقاش داوي خاوي
سبع : وباش عرفتيه وصل ليهم؟
بدر : وهادشي لاش جايبكم لهنااا باش نشرح ليكم كلشي ولكن يلا بقيتو تزربو بلا ماتسمعو ماغانستافدو تا حاجة وحنا الخاسرين
سبع شاف فسفيان وهضر معاه غير بالعينين زعما يشوفو شنو عندو وسفيان وافقو الرأي ..
سفيان : قول شنو عندك تانسمعوك
بدر : يالاه ندخلو للداخل
سبقهم هو اللول وداز من جنب راندا بلا مايشوفيها تجاهلها كأنها ماكايناش تما وهادشي غاظها .. تبعوه كاملين من اللور تايشوشو بيناتهم تاوصلو لعندو كان جالس فوق كانابي وسط صالة وقدامو طبلة صغيرة فوقها محفظة سوداء خاصة بالحاسوب، جاسو كاملين وحل المحفظة جبد منها الحاسوب شعلو وبقا تايرون فيه شحال تابانت الصورة، كبر حجمها ودور ليهم تايشوفو وسفيان وسبع قربو ليه مزيان مصغرين عينيهم وتايدققو، كان جمال جالس فالمكتب ديالو وقدامو حكيمي المساعد ديالو تايدويو، بدر جهد الصوت وبداو يتصنتو ..
جمال : هادوك باقيين فنفس البلاصة؟
حكيمي : اييه اسيدي ورجالنا حاضيينهم تما
جمال : مازال ماعرفتي شكون كاين فالدار غيررهم؟
حكيمي : لا اسيدي، منين دخلات مرات سي بدر لديك دار مابقاتش خرجات وغير مولات دار لي تاتخرج تقدا وترجع فحالها والتصاور كلهم عندك اسيدي، بناني وصاحبو تايجيو عندهم مرة مرة ويمشيو فحالهم، ولكن يلا بيتينا نعرفو شكون فيها
جمال : وي وماشي غير غاتعرفو بيت هاد الليلة يكونو عندي كلهم
حكيمي : واخا سيدي
جمال : يالاه دير خدمتك والحراسة تبقا على ولدي
حكيمي : ولد سيادتكم كاين فدارو ورجالنا مراقبينو
جمال : مزيان تقدر تمشي
عند هنا وحبس بدر الفيديو وشافيهم كيفاش مصدومين ..
بدر : شفتو دابا علاش سبقتو وجبتكم هنا
سفيان : حاط ليه كاميرا فالبيرو عندو؟
بدر : وي، غانتصرف معاه بطريقتو
سفيان : وكي درتي خرجتي من دارك وهوما مراقبينك وكيفاش تخلصتي من رجالو لي كانو حاضيين البنات؟
بدر : فاش وصلني العنوان وشفت هاد الفيديو وصيت ناصر هو تكلف وسيفط شي دراري جبدو الصداع مع رجال جمال لهاوهم تادخلو رجالي انا وخرجو البنات من تما .. وغير طماأنيت عليهم وحيت عارف راسي مراقب هضرت مع جاري عندو خوه مريض كل شويا تجيه كريز وتايهزو للطبيب ودرت راسي بلاصتو ولبست حوايجو وخرجني من الإقامة وهوما شافوه وماداو ماجابو، بعدني على تما وبقا واقف يتسناني بينما رجعت ثاني عندو .. دابا من هادشي كاااامل واش غاديرو يديكم فيدي تانطيحوه ولا نعوم بحري بوحدي؟
راندا : ونتا شكون غايطيحك؟ ماتنساش راسك راك تانتا مورط فهادشي
بدر (تجاهلها) : دابا كلمة وحدة اه لا؟؟
سرح يدو قدامهم وسفيان شافها ورجع شاف فالاخرين يستاشر معاهم تاسبقو سبع وحط يدو فوق يد بدر ..
سبع : انا معاك، بيت نشوفو تايتعذب كي عذب ناس عزاز عندي
سفيان (حط يديو تاهو) : وتانا غانكون معاكم تاينال العقاب ديالو وخويا يرتاح فقبرو
بدر ارتاح نسبيا فاش وافقو يتعاونو معاه واخا نظرات راندا الحاقدة ألموه ولكن قرر يتجهالها أفضل ليهم بجوجهم تايساليو مع جمال وديك ساعة تكون الهضرة بيناتهم ويوصلو للحل واخا مايرضيهش هو المهم هي ترضى ..

يالاه غايطفي الحاسوب وهو يحبسو سفيان ..
سفيان : خليه مازال محتاجينو
بدر : فاش؟
سبع (جبد قرص مدمج) : غانشوفو هادا
سفيان : البارح كنا فالسبيطار لي قلتي لينا كان ناعس فيه باك، وسولنا على الطبيب المشرف بواسطة الاسم الكامل لي عطيتيني ولقيناه قدم استقالتو، اضطرينا نتاحلو شخصية موظفين ودخلنا بزز لقسم الموارد البشرية، انا لهيت الموظفة لي تما وسبع دخل للحواسيب وبدا يقلب تاجمع معلومات عليه بما فيهم عنوان الاقامة، وغير خرجنا من تما مشينا لقسم المراقبة ومن زهرنا تلاقينا مع رشايوي عطيناه الفلوس وخلانا ندخلو تما وبدينا نقلبو تاطحنا على التسجيل دنهار لي دخل فيه باك واليوم لي زارو فيه داك لي مات، كلشي كاين فهاد القرص، فاش خرجنا من السبيطار مشينا نيشان لفين ساكن الطبيب هضرنا معاه وهددناه وهو خاف واعتارف لينا بكلشي وسجلناه بلا ماينتابه
سبع دخل القرص وسط الحاسوب وطلقو وبقاو يتفرجو فيه تا سالا ..
أم صفاء : حياني الله تاوليت نشوف المسلسلات التركية مباشرة قدام عينيا
صفاء : مي سكتي وخلينا نسمعو الله يهديك
راندا : هادا مستحيل يكون انسان، ولي شافو مايثيقش هادشي
سفيان : كاين هاد القرص وكاين الشاهد لي عاودليا تفاصيل الحادث وكاينا صفاء وتصاور لي وصلو لراندا
سبع : هه ماكانش عارف ان دوك تصاور غايتخاذو ضدو هو، يحسابو كاع ناس مكلخين
بدر : وباقي عندي الملفات لي شديت من عند صفاء وملفات خرين غايغرقوه كثر من القتيلة ودابا باقي غير يعتارف
سعاد : ايوا صافي بلغو بيه وقدمو هاد الدلائل للمخزن
بدر : ماكافيينش وساهل يمحيهم، خاص شي فخ يكون مدروس مزيان لي يطيح فيه مايبقا ينوض وانا لي غانتكلف بيه
سفيان : ويلا عاق بيك؟ ولا قلب كلشي على ظهرك
بدر (باستهزاء) : صراحة يديرها ويفوتها انا لي عارفو مزيان (ناض وقف) احم مهم أنا غانمشي دابا باش مانعيقش وسيد تايتسنا، سفيان يلا خرجتي من هنا ماتعولش ترجع باقي لانتا لا صاحبك، هاد البلاصة مأمنة ولكن يلا طاح عليها هو بحالا مادرنا والو
سفيان : وشنو المعمول مايمكنش نخليوهم بوحدهم هنا
بدر : ماعندك علاش تخاف، الرجال لي برا دايرين خدمتهم وماغايوقع ليهم والو ماتنساش راه ولادي تاهوما هنا .. غانوليو نتلاقاو فدار لانعيمة .. الله يعاونكم هاد ساعة
خرج بلا مايدور وراه وراندا بقات متبعاه ودموع مجمعين فعينيها تا غاب وناضت طلعات الفوق باش ماتنهارش قدامهم، وسفيان حس بيها وتنهد هو لي فاهم حالتها حيت تاهو تايحب وحبيبتو مقفرها معاها وصعيب تسامحو على كلامو الجارح لكرامتها وشرفها، تسرح فوق الكانابي يستاراح وخاصة انه مانعسش الليل كامل وهو يدور مع سبع ويقلبو، سبع تاهو ناض تسرح بعيد عليه وصفاء وسعاد ناضو يجيبو ليهم ماياكلو وام صفاء طلعات صينية الفطور لراندا وبززات عليها تا كلات .. الدراري قضاو معاهم النهار كامل مونسينهم تا العشية ورجعوو فحالهم وخلاوهم يتباكاو خايفين عليهم .. وبدر بقا فدارو تايخمم تا لقا الخطة لي غاتبين الحقيقة كلها والمجرم يتعاقب والدنيا تهنى واخا تاهو غايمشي فيها وماغايقدرس يحضر لزيادة ولدو ..