فالاول فاجآتو بتصرفها وماتوقعهوش واخا كان شاك بلي تاهي تاتحس بشي حاجة من جهتو ولكن كان يقول مع بالو طريق الوصول لقلبها مازال طويلة وخاصو يزيد يصبر ولكن دابا فاش جاتو من اللخر وفصحات على شعورها وقالت جوابها واعتارفات ليه بحبها ماينكرش أنه حس بنشوة وسعادة كبيرة داخليا، هز راسو للسما مبتاسم وهي مراقباه وقلبها تايخفق بقوة، هبط عينيه لوجهها لي فتنو من أول نظرة وعينيها لي سحروه وطيحوه فشباكها، زاد عنقها كثر خاشيها فصدرو وتايدوز يدو على ظهرها، دقات قلبو سمعاتهم وعرفات شعورو فديك اللحظة بلا مايحتاج يقولو وتاهي بادلاتو العناق مغمضة عينيها تاتشم فريحتو لي هبلاتها وموحال تحيد من نيفها .. نساو راسهم ونساو الناس لي غاديين جايين حداهم وكايشوفو فيهم وكاين لي وقف وبقا حاضيهم والفضول قاتلو على الجنسية ديالهم واش مغاربا ولا يهود ولا شنو، مازال ناس محافظين وبحال هاد الوضعيات فالزنقة تاتجيهم فشكل وكاين لي ماتايتسوقش وأبطالنا مافطنو براسهم تا سمعو تصفيق وبعدو على بعضياتهم ودارو شافو شكون وهو يبان ليهم كوبل اجنبي واقفين تايشوفو فيهم باعجاب وتايصفقو ليهم ويشجعوهم (دارو انجاز رومانسي زعما هههه) تبسم ليهم بدر وحياهم وشد فيد حبيبتو وقصدو اللوطو نيشان ركبو راجعين فحالهم وهي مصدعاه على بنتها لي خلات ..
راندا : ويلي نسينا راسنا ابدر وتعطلت على بنتي
بدر : طالما كاينا فأيادي أمينة فبلا ماتخافي عليها
راندا : ولكن توحشتها، نهار كامل ماشفتهاش، قلبي تايرتاح غير فاش تكون قدام عينيا
بدر : وتانا غانكون مرتاح كثر يلا كنتو بجوج بيكم معايا، غاندوي مع مالين دار ونفاتحهم فموضوعنا
راندا (بقلق) : خايفا ابدر
بدر :مناش؟
راندا : خايفا مايوافقوش عليا راك عارف أنا أر
بدر (قاطعها) : هادي حياتنا اراندا وحنا بجوج لي عندنا الحق نقررو فيها لاغير، بنادم ماتايهمنيش واخا يكون والديا ماغانتسوق لحد ونتي أهم، داكشي علاش خوي راسك من هادشي
راندا : بغيت كلشي يكون برضى الجميع ابدر، مابغيتش يوقعو شي خلافات لا من ناحية الأهل ديالك ولا من ناحية با الحاج وخالتي
بدر : يرضاو مايرضاوش والله ماهامني اراندا، مهم عندي وافقتي وغانعيشو بجوج
راندا : ياربي يدير لي فيها الخير ياربي
كملو طريقهم وهو كايتغزل بيها وهي حشمانة وفنفس الوقت طايرا فالسما، وصلو للحومة ووقف اللوطو بعيد شويا على الراس تحت رغبتها ..
بدر : مابقا والو وغاندخلو بجوج ويدينا مشابكين وهازين راسنا
راندا : ان شاء الله
بدر : نشوفك غدا؟
راندا : ماكرهتش ولكن مانقدرش نتعطل ثاني على بنتي
بدر : نخرجوها معانا شنو باليك؟
راندا : لا لا بلاش
بدر : والمعمول؟ مايمكنش نبقا بلا مانشوفك لقاي لينا حل ولا عرفتي شنو انا غدا غاندوز للدار لهيه نهضر معاهم
راندا : واخا نتسناك ترد عليا باش تانا نعلم با الحاج وخويا
بدر : اوك
راندا : يالاه بسلامة
مدات يدها للباب حلاتو ويالاه اتخرج وهو يشدها من يدها وجرها لعندو عنقها وباسها فجبهتها عاد خلاها تخرج .. بقا تايشوف فيها تابعدات منو ونزل هو تابعها من اللور، دقات على هدى ودخلات لعندهم للدار عاد دخل هو بلا مايشوفو حد وطلع فحالو فالدروج وهو تايسمع فهضرتهم وراندا تاضحك مع بنتها ..
راندا : ياكبيدة ديالي وشحال توشحتك
عنقاتها تاتشم فرويحتها وهدى واقفة حداهم ..
هدى : ماشاء الله عليها مهدنة بزاف شابها لماماها هه
نعيمة : راندا جلسي تعشاي معانا
راندا : والله مانصيب اخالتي مرة خرى ان شاء الله
نعيمة : لواه ابنتي جيتي عيانة وتمشي تصاوبي العشا اللهم كولي معانا موجود موجود وسيري دك الساعة
راندا : كليت شي حاجة برا قبل مانجي اخالتي غير بصحتكم وسمحوليا
مازادتش حكرات عليها نعيمة وودعوها ومشات لدارها ..
طلعات نيشان لبيتها بدلات حوايجها وبدلات لبنتها وتخشات هي وياها ففراشهم عاطياها البزولة تاترضع وعقلها غايب مع لي خذاه ليها وتاهو كذلك جالس فالصالة والبيسي مشعول قدامو مبدل حوايجو ولابس كيطمة دالنعاس وساهي قدامو تايتفكر اللقطة لي اعتارفات ليه فيها بأنها كاتبغيه واللمعة لي كانت فعيونها، ابتاسم وهز تيليفونو دوز نمرتها ماتسناش بزاف وجاه الرد ديالها ..
راندا : ألو
بدر : شنو كادير حبيبتي
راندا : والو، غير تانرضع شيماء
بدر : لقيتيها مزيان بعدا؟
راندا : مخيرة گااع
بدر : توحشتك
راندا : هه عاد تفارقنا زعما
بدر : ونتي قدامي وموحشك ودابا بعيدة على عينيا شنو فنظرك هاا؟
راندا (بدلع) : بااادر
بدر : عيوون وقلب وروح بدر
سكتات تاتسمع ليه عاضا على شفايفها وهو ماسكتش وبقا معاها لوقت طويل تايهضرو ويتعاودو تاحسات بعينيها ايتسدو عاد قطعات معاه وغفات وهو بقا سهران خدام ..
وفالصباح كي عادتها مشات لخدمتها وهو شد الطريق لدارهم عند والديه ناوي يجبد معاهم الهضرة .. دخل عليهم لقاهم فايقين بكري كي موالفين وتايفطرو، شافوه وتصدمو حيت ماتايجي تاكايتاصلو بيه ويطلبوه يجي عندهم واليوم مصبح عليهم، لقا السلام وجلس حداهم ..
فوزية : ولدي لاباس؟
بدر : الحمد لله الواليدة ونتوما اش خباركم
جمال : اللهم لك الحمد، شنو سر هاد المجية باينا شي حاجة تما
فوزية : ويلي اجمال، يجي وقتما بغا دارهم هادي ماشي ضروري تاتكون شي حاجة عاد يجي يطل علينا، باينا توشحنا ياك اولدي؟
أنت تقرأ
عشق البدر
Romanceقصة درامية بامتياز .. تحكي عن فتاة يتيمة عاشت المعاناة حتى دخل حياتها من أرجع النور لها أحبها دللها وعطف عليها قبل أن يفقد حياته في حادثة غريبة غامضة وترجع أرملة تعيش في ظلمة وتفقد الأمل من كل شيء فهل الأمل سيعود لحياتها من جديد؟؟ تابعو القصة لتجدو...
