رجع بدر لخدمتو وراندا مازال جالسة فالدار ووقتما جبدات ليه موضوع خدمتها تايقلب ليها الهضرة وينسيها فيه، وقتها بقا غير ليه هو ولبنتها وحياتهم غادا مزيان ومدلعين بعضياتهم وحبهم كايزيد يقوى نهار على نهار وكل ماتاحت ليه فرصة تايخرجهم يساريهم ومرااات تايسفرهم لمدينة جديدة يكتاشفوها .. داير كل مافجهدو باش يسعدهم ويحقق ليهم كل ماحلمو بيه وماخلي تاحاجة تنقصهم أول تقلقهم، صارو هوما عائلتو وحبابو وحياتو ومن غيرهم مايقدر يعيش ولو دقيقة، موضوع والديه مابقاتش جبداتو ليه من واحد نهار طلع ليه دم وزعف عليها واخا بعدها خذا بخاطرها وحزرها ونفس الوقت حذرها انها تعيد تهضر فيه وهي دخلات سوق راسها وخلاتو منو ليهم هوما والديه وماشغلهاش فيهم، شيماء تاتديها نهار فسيمانة لعند جدودها يشوفوها، كاتخليها ليهم الأحد كاملو ظل معاهم من الصباح تا العشية عاد تاترجع ليها هي وبدر يرجعوها بحالها وسفيان عمرها شافتو مازال وهو كذلك غير تايسمع بيهم جايين وتايخوي القنت وفالأصل مابقاش يعمر الفيلا ولا أغلب وقتو الخدمة وفدارو، وعقلو ديما تايخمم فهدى مابغاتش تزول من بالو، هاد الأخيرة لي فاليدات كلشي وبميزة وخذات شهادة الإجازة وبدات تقدم للمباريات وتدعي الله يسر ليها وتخدم فأسرع وقت باش تقدر تعاون ماماها لي صحتها بدات تراجع ومابقاتش حمل تمارة ..
-------------------------------------
واليوم ككل نهار فاقت بكري ووجدات ليه فطورو والدوش ديالو وحوايجو كذلك، فيقاتو من نعاس دخل دوش وبدل عليه ولحق عليها للكوزينة لقاها تاتوكل بنتها .. باسهم بجوج وصبح عليهم وجلس حداهم تايشرب قهوتو، صاوبات ليه مسمنة بالفرماج والمربى عطاتها ليه كلاها، مسح بمنديل ورجع كرسي اللور ناوي ينوض وهي تشد ليه فذراعو باش يرجع يجلس وامتاثل ليها ..
راندا : بدر بيت ندوي معاك عافاك
عاق بيها فشنو غادوي واصلا عارف الموضوع لي كل صباح تاتجبدو ليه وتايهرب منها ولكن دابا ناوي يعطيها جواب نهائي لسؤالها ويودع حد ..
بدر : وي تانسمعك
راندا : هادي مدة طويلة باش مابقيتش مشيت لخدمتي وتعجبت أن الإدارة ماراسلاتنيش وماحاولوش يعرفو سبب غيابي مع العلم أنا قدمت شهادة ديال سيمانة فقط ونرجع ودابا كملت 3 شهور والعام غايسالي والامتحانات بداو شحال هادا ونتا ماخليتينش وكل مرة تقوليا هضرة فشكل بغيت نفهم شنو هادشي؟
بدر : راندا الخدمة نسايها الله يرضي عليك، هانتي جالسة فدارك ماخاصك تاخير علاش اتخدمي؟ جلسي قابلي بنتك وشوفي احتياجاتنا حنا فقط، ويلا كنت نقصر معاك فشي حاجة قوليها ليا والعيب يلا عارضتك
راندا : بالعكس غير هو أنا كنت مرتاحة فيها وشاغلة وقتي
بدر : دايا مامرتاحاش فالدار جنب بنتك هممم؟ وشنو غانديرو فشيماء؟ ناويا تلوحيها للحضانة (شد فيدها) راندا علاش تاتقلبي على تمارة؟ من قبل كنتي خدامة حيت بديتي من زيرو واحتاجيتيها ولكن دابا لا مابقيتيش محتاجاها وأنا مكلف بكلشي وبيت مراتي تفرغ غير ليا أنا ولدارها صافي ولشيماء ولوليداتنا لي غايجيو من بعد
بقا محاول معاها تاقنعها بزز ..
بدر : وراقك أنا غانساليهم ليك اوك؟ (باسها فحنكها) غانمشي دابا تعطلت وتابعني اجتماع مهم
راندا : الله يعاونك احبيبي
باس شيماء كذلك وهز محفظتو وخرج لخدمتو، وهي تنهدات وناضت شمرات على ذراعها ودارت بالدار نظفاتها ورتباتها وبنتها فمشايتها تاتلعب وسط الدار، قضات وقتها فالكوزينة تاتجرب فالشهيوات والحليوات ..
------------------------------------
أنت تقرأ
عشق البدر
Romansaقصة درامية بامتياز .. تحكي عن فتاة يتيمة عاشت المعاناة حتى دخل حياتها من أرجع النور لها أحبها دللها وعطف عليها قبل أن يفقد حياته في حادثة غريبة غامضة وترجع أرملة تعيش في ظلمة وتفقد الأمل من كل شيء فهل الأمل سيعود لحياتها من جديد؟؟ تابعو القصة لتجدو...
