دخلات لدارها هازا طعارج لي جمعات حطاتهم فوق الطبلة وحيدات جلابتها ومشات نيشان للكوزينة وبدات طياب الدجاج لي جابتو بالليل وغسلاتو ونقاتو فاش علمها بدر وهو لي عطاها الفلوس تقدا لي خاص والحلوى والباقي سيفطهم ليها هو وغير دخلات وداد من المدرسة وهي تعرض ليها فالباب ..
نعيمة : حطي شكارتك وسيري لدار راندا عاوني ختك فالجميع وقولي لراندا قالت ليك ماما شويا وتدوز عليك تلقاك جمعتي حوايج الحمام ومابغاتش تسمع لا
وداد : تانا بيت نمشي معاكم
نعيمة : لا ماكاين لي يقابل هنا، غانمشي غير أنا وياها وهدى وبنات جيران راني علمتهم
وداد : ديما حاگريني أنا عيب عليكم
نعيمة (حمرات فيها) : تغبري من قدامي لا؟
وداد : هااهي غاتغبر
خرجات تاتسوط وتنگر ونعيمة رجعات لشغلها مگفضة كمامها .. وصلات وداد للدار ولقات الباب محلول دخلات تاتعيط لهدى لي خرجات عندها من الصالون لابسة بيجامة طويلة سروال وفوق ديالو حد الفخاذ وواسعة شويا وخرقة جامعة فيها شعرها وعنقها عريان وبيجامة مغطية صدرها بلغاتها بكلام مها ..
هدى : واخا هانا نقولها ليها دابا، شوفي ختي الله يرضي عليك ردي البال للبنات واخا؟
وداد : واش وليت ليكم مربية الاجيال أنا هاا؟
هدى : كوني تحشمي
وداد ساطت بجهد عاقدة حجبانها وربعات يديها عند صدرها وبدات تهزز فرجليها وهدى حابسا الضحكة بزز على حركتها وعارفا أنهم عيقو عليها بزاف هاد الايامات ولكن بقا غير هاد النهار يدوز مزيان وكلشي يسالي، قربات ليها وباستها فحنكها وجرات ليها خذوذها بقرصة خفيفة كاتحاول ضحكها ونالت مرادها وطلعات وداد للفوق مبتاسمة عند صغيورات تقابلهم .. هدى دازت للدوش جمعات ماعن الحمام والسطولة وطلعات عند راندا للبيت كانت هازا تيليفونها وباينا تاتصوني على شي حد شافت هدى وحيداتو ..
هدى : ماما تاتسنانا باش نمشيو للحمام، جمعي حوايجك وقالت ليك مابغاتش تسمع لا
راندا : واخا زين هانا نجمعهم
هدى : وتانا غانمشي نضرب تا للدار نجمع دياولي ونرجع عندك
راندا : اوك
مشات هدى وراندا رجعات صونات على الرقم ووالو ماخدامش تاتجاوبها غير العلبة الصوتية تا عيات ورماتو فوق السرير وجلسات حداه بجهد تاتسوط مغوبشة ..
راندا "فنفسها" : علاش طافيا تيليفونك؟ ولاش غبرتي هاد المدة ثاني ياك واعدتيني تكوني معايا فنهاري وهانا احتاجيتك ومالقيتكش، واش نتي بيخير؟ ولا واقعة معاك شي حاجة اعيشة! ماكرهتش نشوفك وبزز منك تعاودي ليا كلشي ولكن ماعندي منين نعرف بلاصتك بفففف
مسحات دمعتها وناضت حلات باليزتها وجبدات حوايج لي غاتدي للحمام لواتهم فخرقة بيضة دارتهم فصاك ونزلات للتحت لقات سطولة فالمراح مجموع فيهم كلشي قلبات ثاني لاتكون شي حاجة ناقصة ولقات كلشي هو هاداك، طلات فالصالون لقاتو مجموع وطلامط مجبدين وزربية نقية وعاطيا منو ريحة زوينة وتا طبلة لي فيها تلفازة منظفة، ابتاسمات ودعات مع هدى فخاطرها وهي واقفة تاتبرگگ سمعات صوت الغنا وطعارج وهي تخرج للباب تشوف اش كايم لقات بنات جيران وسطهم نعيمة وهدى تايغنيو وكل وحدة باش تاضرب شي هازا طعريجة شي طارة شي صينية بمعالقها شي مقوصة، تدهشات ونفس الوقت حشمات والانظار كلها مصوبة جهتها وتايزغرتو ويباركز ليها وهي قلبها تايضرب بجهد حيت هادشي مادارتوش فزواجها الاول مع عادل كان داز دغيا خفن زربن .. جراتها نعيمة من يديها دارتها جنبها ودخلو البنات هزو الصاك والسطولة وتبعوهم بالغنا وكلشي تايوقف يتفرج وهي حشمانة، وصلو للحمام ودخلو كاملات ونعيمة كانت حاجزاه داك نهار وكلشي على حساب بدر لي خطط لهادشي كامل وعارف شنو غايديرو، دخلو للجلسة فين تايحيدو الحوايج وعطاتها ريحة دالبخور منو وكان نقي تايشعل والطيابات استقبلوها بالصلاة والسلام على رسول الله ونعيمة عطاتهم الحليب، زولو حوايجهم والبنات تايضحكو فرحانات ودايرات بيها، دخلو للداخل وداوها نيشان للسخون والشمع مشعول فالقنات، جلسات وكل وحدة شدات بلاصة كان ديالهم بوحدهم داك نهار وحطو السطولة يعمرو وهي جالسة ماخلاوها تحط والو، خوات عليها نعيمة الما دافي والبخار يدا يطلع فالسخون تا ولاو نقيطات هابطين مع لحمهم، جبدات بواطة دالصابون البلدي وخلطات معاه الحنة وعصرات فيه الحامض وبدات تخلط تا سالات وهزاتو بديها تادوز عليها والبنات تاهوما دارو نفس الشي وتايتسابقو باش يخرجو معاها قد قد حيت ماغاتعطلش، دوزات ليها لحمها كامل ودارت تا لوجهها وغسلات ليها الوجه دك ساعة باش مايتحسسش وخلات ليها لحمها تاداز شوية دالوقت عاد غسلاتو ليها وجبدات بواطة خرى ماعرفاتش اش فيها طلاتو ليها لشعرها ولوات عليه غطاء الرأس، وشدات هي كيس وهدى كيس وكسلوها بجوجات واخا حشمات ماخلاوهاش تعارض، فركوها مزياااان تاولات حمرا، شللو ليها ودازت ليها نعيمة لشعرها غسلاتو مزيان وفركاتو بصباعها وجبدات حجرة دالگدام حكات ليها رجليها وفاش كملات دارت ليها الصابون بريحة تهبل وخوات عليها سطل دالما آخور وجابت ليها بينوارها الأبيض لواتها فيه ولوات ليها شعرها ففوطة بيضة وعطاتها نعال فرجليها وخرجاتها بالزغاريد والبنات طارو للسليب ديالها هزوه شللوه وسط الما وخواه عليهم "زعما باش يتبعوها فالزواج ههه"
أنت تقرأ
عشق البدر
Romanceقصة درامية بامتياز .. تحكي عن فتاة يتيمة عاشت المعاناة حتى دخل حياتها من أرجع النور لها أحبها دللها وعطف عليها قبل أن يفقد حياته في حادثة غريبة غامضة وترجع أرملة تعيش في ظلمة وتفقد الأمل من كل شيء فهل الأمل سيعود لحياتها من جديد؟؟ تابعو القصة لتجدو...
