عشق البدر

البارت 42

بدر : شحال كنت موحشهم
راندا (بخجل) : ب بدر
بدر : عيون بدر وقلب بدر وعشق بدر
راندا : كانبغيك بزاف
بدر : وأنا كثر احبيبتي
تفكرات بنتها لي خلاتها الفوق ..
راندا : ويلي نسيت شيماء
طلقات منو وطلعات بزربة فالدروج وطالون حيداتو التحت حيت زير ليها رجليها، حلات البيت فين كانو جالسين ولقاتها ناعسة فوق مخذة على كرشها، وهي واقفة فالباب تاتشوفيها حسات بيه وراها معنقها من خصرها وظهرها ملاصق مع صدرو وحاط ذقنو على كتفها وعينيه على شيماء عجبو منظرها وهي ناعسة ..
بدر : ملاك سبحان الله
راندا : هي شمعة حياتي
بدر : احم احم وأنا
راندا : انغيرو من دابا ولا شنو
بدر : بطبيعة الحال
راندا : ههه نتا حياتي، انهزها نديها لبلاصتها
حيد يدو عليها ودخلات هزاتها بين يديها بشويا وشيماء تاتحرك فمها بحال يلا شادا بزولة، دازت من حداه نيشان لبيتها وهو طفا الضو وتبعها وقف فالباب متكي عليه ورجليه ويديه مربعهم عند صدرو وحاضيها كيفاش تاتعامل مع بنتها والحنان لي عطاها الله، حطاتها فوق السرير وباستها فخذها ووقفات عندو مبتاسمة وهو ساهي فيها ..
راندا (تاتحرك يدها قدام وجهو) : هييهو بدر فين مشيتي
بدر : علاش نتي هاكا
راندا (بعدم فهم) : مافهمتش!
بدر (قرب ليها وشد يدها بجوج قبلهم) :  حنينة ومقبولة لدرجة كبيرة
راندا (حشمات) : هادشي لي عطا الله هه
بدر : وأنا تانحمدو ونشكرو حيت عطاك ليا
بدا يقرب ثاني منها زهي فهماتو وبعدات منو بزربة راجعة اللور خافت القضية تتطور وخاصة أنهم فبيت النعاس ودغيا داكشي يوقع وهي مازال مامستعدة فالوقت الحالي ..
راندا : ب بدر ماجاكش نعاس؟
بدر : تاتجري عليا دابا ولا
راندا : اا لا ماشي هاكاك غ غير جاني النعاس ومشا الحال وغدا صابحا خدامة فهمتي
بدر (عقد حجبانو) : مافيها باس يلا غيبتي نهار وزايدون قضية الخدمة مازال اندويو عليها
راندا (خرجات فيه عينيها) : شنو زعما! اتقوليا نجلس ولا شنو
بدر : نأجلو هاد الهضرة لمن بعد، انمشي دابا ونخليك ترتاحي تصبحي على خير
باسها فحنكها وخرج من البيت خلاها واقفة بلاصتها .. نزل مع الدروج وطفا الضواو كاملين وحيد بريزات من الضو وخرج ساد الباب وراه وقصد دارو ..
أما راندا تنهدات وفسخات قفطانها وجمعات شعرها بمقبط ولبسات بيجامتها ودخلات للحمام حكات سنانها ونزلات فداك الظلام دارت القفل للباب ورجعات لبيتها تخشات حدا بنتها وغمضات عينيها ودغيا غفات بعد نهار داز طويل وعامر عيات فيه .. ليلة كانت فرح للبعض وقرح للبعض الآخر وأيضا مخططات شيطانية للبقية ..
------------------------------------
سطعات شمس الصباح معلنة عن بداية يوم جديد .. تهزات الخامية ودخلات مها لعندها لقاتها مسرحة ففراشها وكل رجل فين مرمية والغطا مليوح نصو فالارض ونص لاخور ملوي على نصها وصباع رجليها مزاحمين مع الحيط ويد تحت راسها واليد الاخرى هازاها مع الحيط كي تعودات تنعس ماشعرات غير بمخذة ثقيلة جاتها للوجه وناضت قافزة تاتحك فنيفها لي تقاس وعينيها دمعو من حر الدقة، حلات عينيها بزز والشعا مسلط عليهم، شافتها واقفة عليها ويدها على جنابها وباينا صابحة مقندشة ثاني ..
صفاء : مي مالكي على هاد دقة ماحرامش عليك؟ ناويا تحمقيني ولا شنو
الأم : راه نتوما لي حمقتوني وقربتو تشوفوني فالزنقة تانضرب بالحجر، واش غانبقى دايمة ليكم ولا شنو هااا؟ كل واحد فين مجبد عييت نفيق ووالو تقولو ميتين
صفاء : واغير بشويا عليك، شحال فالساعة دابا؟
الأم : 7 هادي
صفاء (حيدات الغطا وناضت تاتولول) : ويلي ويلي تعطلت، مالك امي مافيقتيني مع ستة ياك وصيتك البارح
الأم : من الخمسة وأنا نبرح وشي ماحاشاها ليا يا المساخط، تا داك الموصيبة دخوك راه خليتو ناعس يدبر راسو يخدم ولا يخرى مالي يانا على حالتي لهلا يجعلكم كي تفيقو كاااع
صفاء ساطت بجهد وهزات جلابتها لي معلقة فقنت الماريو لبساتها فوق بيجامتها ولوات شالها على راسها وشافت فالمرايا وجهها قادات ليه اللصقة ودارت رجليها فصندالة ديال مها عطاتها ليها وخرجات مع الباب خلات مها حلقها خارج بتعياط عليها ترجع تفطر، نخلاتها وكملات طريقها تاتزرب ..وصلات للطريق ووقفات تاتنهج وتشير للطاكسيات الكبار لي دايزين من تما وكلهم عامرين ..
صفاء : اليووووم يجريو عليا مافيهاش، وانا بزز باش لقيت هاد الخدمة، ياااربي توقف معايا ياربي وتسهل ليا فشي ركبة توصلني دغيا ياربي
بدات تدعي وعينيها على طريق ويدها مسرحة تاتشير، تاسمعات صوت موطور وقف حداها ودارت لقاتو سبع ..
سبع : صفاء صباح الخير
صفاء : صباح الخير اخويا
سبع : طلعي نوصلك
صفاء : ها لا لا بلاش دابا يوقف شي طاكسي شكرا
سبع : يلا تسنيتيه هنا بقيتي راه تايجيو عامرين من الموقف، طلعي نوصلك را كنت خارج وشفتك تاتجري باينا مزروبة .. طلعي طلعي راه هانيا ولد دربكم زعما ماعندك مناش تخافي
مالقات قدامها تا حل آخر وخاصها تزرب، تشجعات وركبات وراه وقالت ليه العنوان وكسيرا هو، غادي بسرعة وهي شادا فالحديدة دالموطور ومبعدة منو والبرد تايعطيها للوجه ..